La populara Radiotelevisiun Svizra Rumantscha (RTR)

Il musicant e cumponist grischun ha anniversari.

En la «populara» da RTR gratulain nus oz a Bruno Brodt. Il musicant e cumponist che stat a Zizers è naschì ils 7 da zercladur dal 1959 a Cuira, cun 11 onns ha el cumenza a sunar e gia 3 onns pli tard è el daventà commember da la chapella «Grischuna». Quella era vegnida fundada da Stefan e Mathis Brodt, Niklaus Jäger e Hansjürg Donatsch ed è stada ina da las furmaziuns impurtantas da la musica populara grischuna e sunava sin in aut livel e sa preschentava sin il palc per bleras occasiuns. Cun la chapella Grischuna ha el sunà 40 onns, ha registrà divers portatuns ed ha cumponì passa 80 tocs. El ha er fundà il «Bündner Ländlermix» per sa preschentar a la festa federala da musica populara dal 2011 a Cuira – e sco cumponist è el er stà zunt diligent ed ha cumponì var 80 sauts, sco «Capricorn grischun», «Kravall im Stall», ubain il «Sapperlot». Quests tocs vegnan interpretads da chapellas grischunas e da tut la Svizra.

Ina «populara» cun las chapellas Erni, Fränzlis da Tschlin, Tasna, Jünaiver, Engiadina, Colani, Engadiner Ländlerfründa, Clavadatsch, Amis da musica populara Scuol e la Chapella da Ludwig Oswald.

Oz faschain nus in viadi tras l'Engiadina e nus tadlain sauts da chapellas da questa regiun, pero era da la Val Müstair e da Bravuogn. Vus udis ina «populara» cun las chapellas Tasna, Jünaiver, Engiadina, Colani, Engadiner Ländlerfründa, Clavadatsch, Amis da musica populara Scuol, e nus laschain era sunar la Chapella da Ludwig Oswald, in musicant oriund da la Val Müstair. Sin il program èn sauts sco: La talianina, Il sot da Crusch, Valser da Flurin S-charplaz, Davo la faira, Barba Not da Seraplana, e Sül Alp Zadra.

Cun Herbert Pixner, la Maschlmusig, ils frars Unterhofer, ils Vinschger Tanzlmusikanten e la Südtiroler Okarinamusig.

Oz faschain nus ina visita tar noss vischins dal Tirol dal Sid. Il viadi da l'Engiadina Bassa sur il Pass dal Reschen en il Vnuost è curt e fingia en ils tschientaners passads hai da bleras relaziuns sur cunfin entras l'uvestg da Cuira e la claustra da Mariamunt. E fin il 1600 vegniva discurrì rumantsch e blers nums locals vegnan da quest temp. Suenter l'Emprima Guerra mundiala è il Tirol dal sid daventà part da lItalia e la convivenza è stada savens difficila.

Ozendi è il Tirol dal Sid ina regiun che prosperescha, er grazia al turissem. I dat però er l'agricultura, ina gronda producziun da maila ed ils viticulturs produceschan buns vins. E lura: ina bella tradiziun da musica populara e chant cun furmaziuns da famiglia - e bleras chapellas en tut las regiuns: en las Dolomitas ladinas, en la val dal Isarc, a Brixen, en il Pustertal, las regiuns da Meran e Bozen ed en il Vnuost: Vus udis interpretas e chapellas sco la Maschlmusig, ils frars Unterhofer, ils Vinschger Tanzlmusikanten, Herbert Pixner e la Südtiroler Okarinamusig. E lur instruments èn l'orgel da maun, la citra, l'arpa e la ghitarra.

Cun orgelets e clarinettas: sauts che procuran per buna luna.

Musica populara era oriundamain la musica per far festa, per star da cumpagnia e per ballar. Perquai èn blers tocs plain schlantsch e rassa e per giudair ina bella saira. En la populara dad oz udis sauts da quest gener, quai èn tocs sco: «Bim Bäre-Karl z'Gonte», «Ürner-Ländler», «Buaba wend nid hei» ubain «Bim Ueli in dr Polterastuba». Quists tocs vegnan interpretads dal Trio Wildbach, dal Schwyzerörgeli Trio Josias Jenny, dals Quöllfrisch-Buebe, ils Bündner Spitzbueba, dal Schwyzerörgeliquartett Hiubi Chiubi ed autras chapellas che fan musica cun schlantsch e che procuran per buna luna.

Cun las chapellas Zavretta, Echo vom Säntis, Alpengruss, ils Fränzlis da Tschlin e Silvretta.

Schottischs, ländlers e martgas han bler schlantsch e savens in ritmus pli spert. Tut auter tar ils valsers, las allemandas, mazurcas e las polcas. Quests sauts èn pli patgifics e sco fatgs per ina saira agreabla. Vus udis sauts sco: Piz Zavretta, Alpenluft, Am Schattigseeli, Dr Kämifäger uf Bsuach e la bella mazurca La faira da Strada.

Per vus sunan las chapellas Silvretta, Echo vom Säntis, Arflina, Ohalätz, Alpengruss, Örgelischnupfer, il Trio Sunneberg, ils Schwyzerörgeli-Fründa Felsberg, ils Bergüner Ländlerfründa, ils Fränzlis da Tschlin, Res Schmid & Gebrüder Marti e Josias Jenny e seis musicants.

Musica populara dals Älplerbüebu, dal Schwyzerörgeli-Duett Burgener-Bühler, dals Ländlerfrinda Aletsch ed autras furmaziuns dal Vallais.

Er en il chantun Vallais datti tradiziuns e musica populara. Da Visp fin sisum il Goms vegnan chapellas e furmaziuns interessantas che fan musica populara. Per exempel il «Schwyzerörgeliquartett Genderbüebu», la chapella «Ländlerfrinda Aletsch» ed er la chapella «Echo vom Riederhorn». Dapli udis questa gievgia saira a las 19:00, cun sauts sco: Wildwescht uf dr Riederalp, Fleschtola-Chilbi, Der Brüttanz ubain Treffpunkt Binn.