Europa Aktuell radio 100,7

D’EU huet wëlles, der Ukrain weider Militär- an Infrastrukturhëllef a Milliardenhéicht zoukommen ze loossen. Déi Fongen awer stieche fest, well ee Land blockéiert: Et ass Ungarn, wat permanent Nee seet. Déi aner 26 EU-Länner hunn net ganz vill Moyene fir dogéint virzegoen.

D’Situatioun am Noen Oste war op en Neits ee vun de Sujeten gëschter bei der Reunioun vun den Ausseministere vun de 27 EU-Länner.
Wéi soll d’EU domat ëmgoen, datt den Internationale Geriichtshaff zu Den Haag, de leschte Freideg ordonéiert hat, Israel misst seng Offensiv am Süde vun der Gazasträif stoppen? Dat war eng vun de Froen, iwwer déi diskutéiert gouf - eng eenheetlech Äntwert ass do vun de 27 net ze erwaarden - och net, wat d’Unerkenne vun engem onofhängege palästinensesche Staat ugeet. D’Danièle Weber huet déi Diskussioune fir eis suivéiert.

Zwou Woche virun den Europawale läit de rietspopulistesche Rassemblement National a Frankräich mat 31 Prozentpunkten an de Sondagë wäit vir an huet bal duebel souvill Support wéi d’Regierungspartei. Leschten Donneschdeg stounge sech den RN-Spëtzekandidat Jordan Bardella an de Premierminister Gabriel Attal an engem Televisiounsdebat géigeniwwer an hunn hir Visioune fir Europa verdeedegt. Wat mécht den RN esou staark, a wéi eng Sujete kéinte fir d’Wielerschaft a Frankräich entscheedend sinn? De Max Tholl mat enger Analys

Déi verschidden Debatten mat Spëtzekandidaten uechter d’Unioun sinn dës Woch och vu ville Bierger net wierklech wouergeholl ginn, stellt den Olivier Hanrion haut a senger Europachronik fest – a proposéiert en éischter ongewéinlech Beschreiwung vun der EU.

Déi fënnef Spëtzekandidate fir d’Europawalen hunn zu Bréissel mateneen debattéiert. Dësen Debat war live ze suivéieren, net nëmmen am Parlament selwer, mee och a 26 anere Stied queesch duerch d’EU. Den Erliefniszenter Europa um Kierchbierg war eng vun deene Plazen, wou interesséiert Bierger d’Diskussioun matverfollege konnten. D’Sophie Schroeder war op der Plaz an huet do och e puer jonk Spectatricë begéint.

Ëmfroe soen extreem rietse Parteie grouss Gewënner fir d'Europawale viraus - wat deen aktuelle Rapport de Force am Europaparlament kéint gehéiereg duerchernee bréngen. Déi etabléiert Parteie reagéieren dorop ganz ënnerschiddlech. Déi Europäesch Vollekspartei, déi den Ament déi gréisste Fraktioun am Parlament stellt, signaliséiert Ouverturen no riets - wärend Sozialisten, Liberal a Gréng eng Zesummenaarbecht mam rietse Bord ganz demonstrativ ausschléissen.