Um Bols radio 100,7

Duerch déi héich Zënse sinn d’Aktivitéiten um Wunnengsmaart, wat de Kaf a Verkaf vun Haiser ugeet, ëm 47 Prozent par rapport zum leschte Joer gefall. Zanter bal zwee Joer probéiert d’Sara hiert Haus ze verkafen - ouni Erfolleg. D’Ana Angel huet sech mat der Sara am eidelen Haus getraff.

Vun allen Industrieberäicher ass d‘Zementsindustrie eng vun deenen, déi am meeschten CO2-Emissioune produzéiert. Déi geplangten Dekarboniséierung fir de Klimaschutz stellt och déi Lëtzebuerger Zementindustrie virun e groussen Challenge.

Vill Jonker ginn e Sonndeg fir d‘éischte Kéier wielen. Op enger Table ronde am Lycée Aline Mayrisch huet de Pierre Reyland véier Premièreschüler:inne, déi fir d‘éischte Kéier wiele ginn, begéint a mat hinnen iwwer hir Erwaardunge fir dës Chamberwale geschwat.

Mol net eng Woch ass et hier, datt ganz Lëtzebuerg am Stau stoung. Ee schwéiert Accident op der A1 hat dofir gesuergt, datt d’Autobunn komplett huet misse gespaart ginn. Fir Leit, déi all Dag mam Auto op d’Schaff fueren, heescht dat: vill Gedold matbréngen. Mam ëffentlechen Transport entkënnt een zwar esou engem Trafik, Gedold muss een trotzdem matbréngen.
Mir hunn eng Fra begleet, déi d’Gedold huet, all Dag mam ëffentlechen Transport vun Ëlwen an d’Stad schaffen ze fueren.

197 Mënschen ouni Daach iwwer dem Kapp goufen zejoert eleng an der Stad gezielt. D’Donkelziffer dierft awer méi héich sinn. An: Eng 10.500 elengerzéiend Eltere ginn et zu Lëtzebuerg, bal 30 Prozent dovunner befanne sech, de leschten Zuele vun STATEC no, ënner der Aarmutsgrenz. Mir hu mat Betraffene geschwat.

D’Schoul huet nees ugefaangen. An d’Alphabetiséierung op Franséisch geet virun. An der Nelly Stein Schoul zu Schëffleng leeft de Pilotprojet vun der franséischer Alphabetiséierung elo am zweete Joer. De Pierre Reyland war kucken, wat d'Kanner an Enseignanten do schon alles geléiert hunn an der franséischer Filière.