Artg musical Radiotelevisiun Svizra Rumantscha (RTR)

Da l'iniziativa d'intginas musicantas e musicants laics e da professiun enturn Walter Blumer ed en collavuraziun cun il chor baselgia St. Martin e ses cantor Heinz Girschweiler è sa furmada il 1994 ORCHESTRINACHUR – in orchester da var 20 persunas. Uss, 30 onns pli tard, ha l'orchester laic chattà sia plazza da nischa en la vita culturala grischuna e giauda gronda reputaziun. L'Artg musical porta il concert da giubileum e discurra cun la dirigenta Anita Jehli.

L'emprim chor viril en il Surses è vegnì fundà d'ina dunna: Sabina de Latour, u sco ch'ella vegn era numnada – Bina Latour. La dunna oriunda da Breil (Surselva) ha gì in grond talent da musica, sunava clavazin ed orgla ed il 1849 ha ella fundà ensemen cun intgins umens il Chor viril baselgia Savognin.

Ussa po il chor guardar enavos sin in lung temp d'existenza cun bleras istorgias, aventuras e success. Il chor celebrescha ses anniversari sur in pli lung temp, cumenzà cun in concert da commemoraziun il december 2023, sur il punct culminant l'entschatta matg 2024 fin in inscunter intern cun dunnas e partenarias dals commembers l'atun 2024.

L'Artg musical purtretescha il chor che giauda gronda stima e reputaziun en il Grischun.

L'emissiun speziala per Pasca porta l'oratori da Pasca da Johann Sebastian Bach e la sinfonia nr. 2 «Auferstehung» da Gustav Mahler.

Duas ovras fitg differentas cun in cuntegn sumegliant. Entant che Bach sa basa sin l'istorgia biblica da la levada da mort en vita da Jesus Cristus ha Gustav Mahler creà cun sia segunda sinfonia in'ovra pompusa. Quella ha tschintg e betg mo quatter parts. Ella cumenza cun la mort e chala cun la levada, dentant betg da Jesus Cristus, mabain en general.

Duas ovras sco fatgas per la dumengia da Pasca.

En l'Artg musical spezial per il venderdi sontg datti musica vocala ed instrumentala adattada per quest di da la paina e da la suffrientscha da Jesus Cristus: ses truament, sia via cun la crusch fin al crest, nua ch'el vegn crucifitgà e nua ch'el mora la finala.

Questa via da dolur ha Alvin Muoth mess en maletgs musicals e creà cun «La Veia dalla crousch» l'emprim oratori rumantsch insumma. Ils onns 1992/93 ha il musicist oriund da Razén scrit l'oratori «La Veia dalla crousch» per chor viril, mezsopran ed orgla. Il text è da Peder Cadotsch. 

Er auters cumponists èn s'occupads cun il venderdi sontg. Giovanni Pierluigi di Palestrina per exempel ha scrit l'ovra per chor a capella «Improperi del Venerdi Santo». En la liturgia catolica èn ils «improperi» ina retscha da responsoris, ina part da la passiun dal Segner il venderdi sontg.

In concert dal festival da jazz a Helsinki, 1967

La chantadura da jazz Sarah Vaughan ha concertà cun grondas bands avant ch'ella è daventada artista solista. Cun la victoria d'ina concurrenza da talents che ha gì lieu en il teater «Apollo» a Harlem ha ella lantschà sia carriera da chantadura. Ella ha lavurà ensemen cun bandleaders sco Earl Hines e Billy Eckstine avant ch'ella è daventada interpreta da solo. 

Sarah Lois Vaughan è naschida ils 27 da mars 1924 a Newark/New Jersey. Las emprimas experientschas sco chantadura ha ella fatg en il rom d'ina concurrenza da talents che ha gì lieu en il teater «Apollo» a Harlem. Suenter ch'ella aveva ristgà da sa participar ha ella gudagnà il 1942 la concurrenza cun sia chanzun «Body and soul». Ella ha survegnì l'attenziun d'in auter vocalist, numnadamain da Billy Eckstine, che ha persvas Earl Hines d'engaschar Vaughan per chantar cun ses orchester.

Il 1944 ha Vaughan bandunà Hines per entrar en la nova band dad Eckstine. Cun Eckstine sunavan er il trumbettist Dizzy Gillespie ed il saxofonist Charlie Parker, dus dals piuniers da la nova furma da jazz che è vegnida enconuschenta sco bebop.
Il proxim decenni ha Vaughan producì dapli musica da pop tar la gronda chasa discografica Mercury Record. Ella ha chantà hits sco «Whatever Lola Wants» (1955), «Misty» (1957) e «Broken-Hearted Melody» (1959). Vaughan ha dà concerts en ils Stadis Unids ed en l'Europa, uschia er il 1967 a Helsiniki cun il Bob James Trio, il concert che nus udin hoz. Suenter ils onns 1950 è sa midà il gust musical dal grond public e la carriera da Sarah Vaughan è vegnida interrutta. Ella è però restada ina interpreta populara, surtut cura ch'ella chantava live. Ses public era fascinà da sia vusch loma ed intensiva, ses chant e ses tuns emoziunals.
Tar las registraziuns che Vaughan ha fatg pli tard tutgan interpretaziuns da chanzuns dals Beatles e musica brasiliana. Il concert final ha ella dà il 1989 en il Blue Note Club da New York. Ella è morta ils 3 d'avrigl 1990 cun 66 onns a Hidden Hills, in quartier da citad da Los Angeles en California. 

En il Grischun hai dà temps, nua che bunamain mintga vitg aveva ses chor viril. Ozendi è la situaziun in'autra. I dat oravant tut anc ils chors virils regiunals, ma strusch pli chors virils locals. Il problem è enconuschent: ozendi han tut las uniuns da batter cun la mancanza da la nova generaziun. I dovra sforzs spezials per pudair mantegnair las uniuns e per survegnir novs chantadurs.

Ensemen cun Clau Scherrer e Jachen Janett discutain nus davart questa problematica. E natiralmain ch'i dat bler chant viril en l'emissiun.