SBS Tibetan - SBS བོད་སྐད་སྡེ་ཚན‪།‬ SBS Audio

ཨོ་སི་ཁྲུ་ལི་ཡའི་གྲོང་ཁྱེར་སིཌ་ནིང་ནང་གནས་སྡོད་བུ་མོ་བསྟན་འཛིན་ཆོས་མཚོ་ལགས་ལོ་ན་ ༨ སྐབས་སུ་ཀླད་པའི་སྐྲན་ནད་ཚབ་ཆེན་ཞིག་ཕོག་ནས་སྐབས་དེར་འཆི་གསོན་གྱི་མཚམས་སུ་སླེབས་ཡོད་ཀྱང་། རྗེས་སུ་སིཌ་ནིང་གྲོང་ཁྱེར་ནང་ཡོད་པའི་བྱིས་པའི་སྨན་ཁང་ Sydney Children's Hospital ནང་དུས་ཡུན་ཟླ་བ་ ༨ ཙམ་རིང་སྨན་བཅོས་བྱས་ནས། ད་ཆ་ན་ཚ་ལས་ཡོངས་སུ་དྲག་བསྐྱེད་བྱུང་ནས་ཁོ་མོ་སླར་ཡང་སློབ་གྲྭ་འགྲོ་ཐུབ་པ་བྱུང་ཡོད།

གལ་སྲིད་ཁྱེད་རང་གི་ནང་ལ་གློག་ཆས་དང་གློག་རྫས་རྙིང་པ་རིགས་དེ་འདྲ་ཡོད་ཚེ་ཁྱེད་རང་གིས་ག་རེ་བྱེད་ཀྱི་ཡོད་དམ། དེ་ཚོ་བསྐྱར་དུ་བེད་སྤྱོད་གཏོང་ཐབས་བྱེད་ཀྱི་ཡོད་དམ། ཨོ་སི་ཁྲུ་ལི་ཡའི་ནང་གློག་ཆས་ཀྱི་རིགས་ས་ཐོག་ཏུ་གང་བྱུང་གཡུག་ཆོག་གི་མེད། དེ་ཡང་བརྙན་འཕྲིན་དང་། གློག་ཀླད། ཁ་པར། གློག་རྫས་རིགས་སོགས་གློག་ཆས་དང་འབྲེལ་བའི་ཅ་དངོས་རིགས་དུས་རྒྱུན་ང་ཚོས་གད་སྙིགས་བླུག་སའི་སྣོད་ནང་གཡུག་ཆོག་གི་མེད་པ་རེད།

དེ་རིང་ཕྱི་ལོ་ ༢༠༢༤ ཕྱི་ཟླ་ ༦ ཚེས་ ༡༦ ཉིན་ཨོ་གླིང་ས་གནས་ཆུ་སྒང་གིས་གོ་སྒྲིག་འོག ཨོ་སི་ཁྲུ་ལི་ཡའི་གྲོང་ཁྱེར་སིཌ་ནིང་ནང་མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླངས་དམག་གི་སྒྲིག་འཛུགས་དབུ་བརྙེས་ནས་མི་ལོ་ ༦༦ འཁོར་བའི་དུས་དྲན་སྲུང་བརྩི་གནང་ཡོད་པ་རེད།

ཨོ་སི་ཁྲུ་ལི་ཡའི་གདོད་མའི་མི་རིགས་ཨ་བྷོ་རེ་ཇེ་ནལ་དང་ཊོ་རེ་སི་གླིང་ཕྲན་གྱི་མི་ཚོས་ངག་རྒྱུན་ལོ་རྒྱུས་དང་། སྒྱུ་རྩལ་བརྒྱུད་ལམ་ལ་བརྟེན་ནས་རང་གི་རིག་གཞུང་གི་ལོ་རྒྱུས་དང་ཆོས་ལུགས་ཀྱི་དད་པ། ཡུལ་དེའི་གཞི་རྩའི་ཤེས་བྱ་སོགས་ཤེས་རྟོགས་དང་གཞན་ལ་བརྒྱུད་བསྒྲགས་བྱེད་ཀྱིན་ཡོད་པ་རེད། སྒྱུ་རྩལ་རིག་གནས་ནི་ཁོང་ཚོའི་ཐུན་མོང་མ་ཡིན་པའི་རིག་གཞུང་དང་སྲོལ་རྒྱུན་ལ་རྒྱུས་ལོན་བྱེད་པའི་སྒེའུ་ཁུང་ལྟ་བུ་ཞིག་ཀྱང་ཡིན།

ཉེ་བའི་ལོ་ཤས་ནང་ཨོ་སི་ཁྲུ་ལི་ཡའི་ནང་འཚོ་བའི་འགྲོ་གྲོན་ཟས་རིགས་དང་ཅ་དངོས་སོགས་ཀྱི་རིན་གོང་ཤུགས་ཆེ་འཕར་ནས་མི་མང་རྣམས་དཀའ་ངལ་ཤུགས་ཆེ་འཕྲད་བཞིན་པའི་སྐབས་འདིར། ན་ནིང་ཨོ་སི་ཁྲུ་ལི་ཡ་གཞུང་གིས་མི་སྒེར་དང་ཁྱིམ་ཚང་རྣམས་ལ་ཅ་དངོས་ཉོ་བྱེད་སྐྱེད་ཀ་མི་དགོས་པའི་བུན་གཡར་ལས་རིམ་ཞིག་འགོ་འཛུགས་བྱས་ཡོད་འདུག

ཉེ་ཆར་ཕྱི་ཟླ་ ༥ ཚེས་ ༢༦ དང་བོད་ཟླ་བཞི་པ་ཚེས་ ༡༨ རེས་གཟའ་ཉིན་མ་ཉིན་བདག་བཅག་གི་སྟོན་པ་སངས་རྒྱས་བཅོམ་ལྡན་འདས་སྐུ་བལྟམས་དང་། མངོན་པར་རྫོགས་པ་སངས་རྒྱས་པ། སྐུ་མྱ་ངན་ལས་འདས་པ་བཅས་དུས་ཚིགས་གསུམ་འཛོམས་ཀྱི་ས་ག་ཟླ་བའི་དུས་ཆེན་དང་སྟབས་བསྟུན། ཨོ་གླིང་དབོན་སྤྲུལ་ཆོས་ཚོགས་ཀྱིས་ཨོ་སི་ཁྲུ་ལི་ཡའི་མངའ་སྡེ་ཁུན་སི་ལན་ཌིའི་གྲོང་ཁྱེར་བྷིར་སི་བྷིན་ནང་སྟོན་པ་བཅོམ་ལྡན་འདས་ཀྱི་ཞལ་ཐང་མཐོང་གྲོལ་རིན་པོ་ཆེ། མཐའ་འཁོར་དུ་གུ་རུ་རིན་པོ་ཆེ་དང་། ཚེ་ལྷ་རྣམ་གསུམ་བཅས་བཞུགས་པའི་ཧྥི་ཊི་ ༣༥ ཅན་གྱི་ཞལ་ཐང་ཆེན་མོ་ཞིག་མི་མང་ལ་མཇལ་ཁ་གཤམ་སྟོན་གནང་ཡོད་པ་རེད།