Бірінші бо‪л‬ Олжас Байбосын

Танымал актер Әшім Ахметов БІРІНШІ БОЛ қонағы болды. Футболға қатты қызығады – "Реал" жанкүйері. АПЛ матчтарын жібермей көреді екен. 

Әшім Ахметов футбол скауты болғысы келетінін айтты. Нағыз таланттарды табу үшін ел аралап, қабілеті мықты қазақ балаларының бағын ашқысы келеді. 

Актердің ойынша, Қазақстанда жетістікке жеткен жас таланттардың көбі тоқмейілсіп, даму жолынан шығып қалады. Тіпті, бұл барлық салаға қатысты көрінбейтін "індет" екенін айтты. Әлі күнге дейін екі дүркін олимпиада чемпионы шықпай жатқанын да осы "қасиетімізден" көреді. 

АПЛ-да доп тебетін қазақ қашан туады? Қазақстан құрамасын ЕУРО мен МУНДИАЛЬ сияқты мәртебелі додаларға сүйрейтін лидерлер қашан пайда болады? Париж олимпиадасынан тағы алтынсыз оралмаймыз ба? Бүгінгі подкаста осы мәселелер сөз болды.

Спорт жаңалықтары

Дұрыс тәжірибе. Өйткені, футболшының әрекетіне баға беруге моральдық құқы бар. Тьерри Анри шабуылшының, Гари Невилл қорғаушының әрекетіне дәл бағасын беріп, басым тұсы мен осал жерін дөп басып айта алады.

Енді біз осы тәжірибені БІРІНШІ БОЛ жобасында жасағалы отырмыз. "Бірінші бол" – қазақ сегментіндегі Sky Sports болмақ. Өйткені, бұдан былай Қазақстанның бірнеше клубында ойнаған, ұлттық құрама сапында 17 матч өткізген Елдос Ахметов тұрақты сарапшымыз болады. 

Елдос Ахметов ҚПЛ және Қазақстан кубогы аясындағы матчтарға тоқталып, ұлттық құрама ойындарына БІРІНШІ БОЛ жүргізушілерімен бірге талдау жасап отырады. Қазақстандағы әр тур, әр футбол бәсекесін ой елегінен өткізіп, жаманын "жасырмай", жақсысын "асырмай" баға береді. 

Қазақстан кубогы: "Қайсар" неге ойсырай жеңілді? "Тобыл" биыл турнир фавориті ме? SD Family неге жауапсыз 6 гол жіберді? Осы сұрақтарға жауап іздегіңіз келсе, Елдос Ахметов қатысқан алғашқы подкасты қабыл алыңыз.

https://1bol.kz/

Алдияр Жапарханов БІРІНШІ БОЛ қонағы болуға былтыр уәде берген. Бірақ павлодарлық "Ертіс" клубының жағдайына алаңдап, банкроттыққа шақ қалған тарихи команданы қайта жандандыру жолында аянбай қызмет етіп, футбол туралы подкастымызға енді ғана жолы түсіп отыр.

Бүгінгі әңгімені ЕУРО-ға екі қадам қалғанда сүрінген Қазақстан құрамасы және еліміздегі спорт инфрақұрылымынан бастадық. "Астана Арена" жабық, онда жөндеу жұмыстары, Көшпенділер ойынына дайындық жүріп жатыр. Алматының орталық стадионы да UEFA талаптарына сай келмей қалуы мүмкін. 2016 жылы Орталық стадионда күрделі жөндеу жұмыстары жүргізіліп, УЕФА стандарты бойынша 4-ші категорияны алған еді. Сол уақыттан бері стадионның талапқа сәйкес келмейтін тұстарын ретке келтіруге уақыт берілген, алайда көрсеткен негізгі ескертулер бүгінге дейін орындалмаған екен. 

Ендеше Қазақстан ұлттық құрамасы алдағы матчтарын қайда өткізеді. Күзде Ұлттар лигасы келе жатыр, В дивизионында Австрия, Словения, Норвегия елдерімен бір квартетте ойнаймыз. Эрлинг Холанд, Мартин Эдегор, Давид Алаба сияқты атақты футболшылар қайда ойнайды? 

Әрине, негізгі әңгіме "Ертіс" клубының берешегі мен келешегі жайында болды. "Ертіс" клубын сақтап қалу жолында команда сапында ойнаған экс-футболшылардың бәрімен келіссөз жүргізілген. Кезінде уәде етілген жалақыны ала алмай кеткен Карлуш Фонсека 100 млн теңгеге жуық қарызын кешіретінін айтыпты. "Ертіс" сапында ойнаған сербиялық легионерлер де қарызын кешіретін болыпты. "Ертіс" құрамында ойнаған павлодарлық (жергілікті) футболшылардың бәрі де қарызын кешірім, өтеуін сұрамайтын болыпты. Қазақстандық 3-4 футболшы ғана қарызын өндіріп алуды көздеп отыр екен. 

"Ертіс" енді қашан Қазақстан премьер-лигасына оралады? Команда қашан еңсесін түзейді? "Ордабасы" биыл Еурокубок ойындарында ұзаққа шаба ала ма? Міне, осы және басқа да мәселелерді белгілі әзілкеш Марат Достаев пен "Ирина Кайратовна" резиденті Алдияр Жапарханов БІРІНШІ БОЛ жүргізушілерімен бірге талқылады.

https://1bol.kz/

Көпшіліктің сұрауы бойынша белгілі әнші Нұрлан Еспанов тағы да БІРІНШІ БОЛ қонағы болды. Нұрекең шашы желбіреп отырып елді елжірететін әңгіме айтып берді. 

Нұрекең әңгіме айтуды "өнер" деңгейіне жеткізген. Майын тамызады, тыңдаған адамның аузының суын ағызады. 

Нұрлан Еспанов бұл жолы да көсілді, түсірілім басталған сәттен бастап қамшы салдырмады. Әдемі әзілін де, ішіндегі ғыжылын да айтып, шер тарқатты. Тіпті, өзін келемеждеп, мазақ ететін оқырманына жауап та берді. Ол футбол мен әзілді түсінбейтін адамдарды "әрі ойнауға" шақырды.

Қазақстан ұлттық құрамасының амбассадоры Нұрлан Еспанов егер осы шығарылым 90 мың қаралым жинаса, тағы да БІРІНШІ БОЛ қонағы болып, болашағы зор талантты балаларға сый-сияпатын беруге уәде етті.

https://1bol.kz/

Футболдан Қазақстан премьер-лигасы басталғаны жаңа еді, ұлттық құрама халықаралық үзіліске шығып кетті. 

Соңғы уикендте ішкі біріншілік қайта жанданып, кей клубтар 3-турын, кей клубтар 2-ші матчын өткізді. 

ҚПЛ-ге қатысты сұрақ көп. 

Кеше "Астана" - "Елімай" арасындағы матчта семейлік клубтың негізгі құрамында бір қазақ футболшысы шыққан жоқ. Дені - легионер. Қазақстандық футболшылардың арасында тек Сергей Кейлер мен Дмитрий Шмидт қана жүр.

Бүгін осы матчты және ҚПЛ аясындағы басқа да ойындарды талқыладық.

Астана қаласында Афина олимпиадасының чемпионы, Баркер кубогының иегері Бақтияр Артаевтың жүлдесі үшін бокстан халықаралық турнир өтіп жатыр. Жарысқа Тәжікстан, Қырғызстан, Өзбекстан сияқты елдердің де боксшылары қатысып жатыр. 14 салмақ категориясы (жастар – 7, жасөспірімдер – 7) бойынша төрт елден жиналған 286 спортшы бақ сынап жатыр. 

Осы дода қарсаңында той иесі Бақтияр Артаевпен арнайы әңгіме құрып, қазақ боксының қазіргі жай-күйі, Париж олимпиадасы жайлы талқыладық.

Олимпиада чемпионы Астанадағы турнирді ұйымдастыруға кім мұрындық болып жатқанын айтты. Алдағы жылдары бұл турнир (Бақтияр Артаевтың жүлдесі үшін) дәстүрге айналып, оған қатысатын елдердің географиясы да кеңеюі мүмкін. 

Одан бөлек, Бақтияр Артаев қазір немен айналысып жүргенін айтып, соңғы 2-3 жылдан бері неге көп көрінбей кеткенін түсіндірді. Боксшы қазір бизнесте жүр. Тараз қаласында мейрамхана мен сән салонын ашып, 50 шақты адамды жұмыспен қамтамасыз етіп отыр екен. 

Ел арасында "Бақтияр Артаев олимпиаданың үздік боксшысына берілген Баркер кубогын сатып жіберді" деген әңгіме бар. Боксшы бұл әңгіменің қайдан шыққанын түсіндірді және Баркер кубогын сатпағанын, қазір оның дубликатын күтіп отырғанын айтты. 

Өте қызық подкаст болды. Артаев енді мемлекеттік қызметке орала ма? Қызмет ұсынса дайын ба? Міне, осы және басқа да әңгімелерді естігіңіз келсе, подкасты соңына дейін көріңіз.