NAIZ IRRATIA - Haria | naiz.eus Naiz Irratia

Ekhiñe Atorrasagasti eta Iker Bizkarguenaga kazetariek hirigintza eta euskal hiriburuen turistifikazio prozesuak izan dituzte hizpide. Horrez gain, Baxoa azterketa gainditzeko lanean diren Maddi Egiguren eta Lilwenn Larralde ikasleek azterketak euskaraz egiteko ezintasunen berri eman digute.

Udal hauteskundeen emaitzak ikusita, norabide aldaketa bat espero zuen EH Bilduk Donostiako Udalaren jardunean. Eneko Goia alkatearen hitzak haizeak eraman ditu. Herritarren beharrak baztertu eta interes pribatuen neurriko hiri eredua bultzatzen jarraitzen dela kritikatu du Juan Karlos Izagirrek.

Paue eta Lourdes artean kokatutako Betharram eskola katolikoko 30 bat ikaslek salaketak jarri dituzte, han pairatu zituzten eraso fisiko, psikologiko eta sexualen berri emanez. Astero Euskal Herriko 50 bat ikasle joaten ziren. Jean Claudek bere testigantza eskaini dio NAIZ Irratiari.

Errelatoa, memoria, generoa eta transmisioa. Iraganaren eraikuntzak orainean duen isla aztertuko dute datorren ekainaren 20 eta 21ean Usurbilen, Jakin jardunaldien baitan. Auziaren konplexutasunaz jakitun, gaia jorratzeko unea dela deritzo Lorea Agirre Jakineko zuzendariak, NAIZ Irratian.

Otsailean iragarri zuen Eusko Jaurlaritzak Emantzipa programa. Gazteei bideratutako hileroko 300 euroko laguntza dakar. Esperotako erantzun baikorra izan duela dio Miren Saratxaga Gazteria zuzendariak. 

Katalunian, Europear Parlamentuko hauteskundeen ostean, astearte honetan indarrean jarri da Amnistia Legea. Horretaz mintzo da Gorka Knörr Junts-eko kidea NAIZ Irratian, bai eta igandeko emaitzari buruz ere.