Europa Aktuell radio 100,7

A Groussbritannie gëtt de 4. Juli en neit Parlament gewielt. Bei de leschte Wale viru 5 Joer hat ee Sujet de Walkampf dominéiert - dat war de Brexit, also den Austrëtt vu Groussbritannien aus der EU. Dës Kéier schéngt awer deen Austrëtt, dee jo 2016 gestëmmt an 2020 vollzu gouf, kaum ee Sujet ze sinn. D'Marie Billon suivéiert de Walkampf fir eis a mellt sech vu London.

Wäert et an Zukunft an der EU eng pro-europäesch Plattform am Europaparlament ginn - a wa jo wéi eng Partei kënnen dozou gezielt ginn?
Déi Fro steet ganz uewen no den Europawalen - aus deenen déi riets a rietsextreem Parteie gestäerkt ervirgaange sinn. Aktuell gëtt iwwer d’Verdeele vun de sougenannten Top Jobs diskutéiert - an do géifen déi Parteien elo gären ee Wuert matschwätzen. Bis elo hu sech d’Europäesch Vollekspartei, d’Sozialisten an déi Liberal déi Posten ënnereneen opgedeelt. Ob et dobäi bleift, ass nach net sécher. D’Danièle Weber mat Detailer iwwer déi neisten Entwécklungen an deem Beräich.

Haut (24.6.) virun enger Woch haten d'Staats- a Regierungscheffen aus de 27 EU-Länner decidéiert - fir do mol nach näischt ze decidéieren. Ze besetze sinn nach aner Posten - mat virop deem vun der Presidence vun der Europäescher Kommissioun. Dee fréiere portugisesche Premier Antonio Costa, dee Conseilspresident wëllt ginn, ass fir säin Deel a Portugal an eng Korruptiounsaffär implizéiert - déi just elo erëm nei an de Medien opgerullt gouf. Hie bleift awer an der Course.

No engem éischter positive Bilan, deen d'Belsch fir sech kann zéien, stellt sech elo d'Fro, wat ee sech vun der ungarescher Rotspresidence erwaarde kann, déi schonn eleng mam Motto "Make Europe great again" fir grouss Diskussioune suergt. De Wiessel ass den 30. Juni an den Olivier Hanrion vun der belscher RTBF probéiert ee Réck- an Ausbléck.

Zanter méi wéi zwee Joer ass de russesche Krich an der Ukrain amgaangen. An zanterhier ass Polen eng vun den Dieren an d'Ukrain esou wuel fir Waffeliwwerunge wéi och fir déi vun humanitären Hëllefsgidder. Déi international Flich vun der Ukrain aus goufen annuléiert - dowéinst ginn elo vill Kranker a Krichsblesséiert vu Polen aus a Spideeler an Europa transferéiert, fir datt si do kënne soignéiert ginn.
Eise Korrespondent Adrien Sarlat hëlt eis mat an de Medevak Zentrum, wou déi Blesséiert op der ukrainescher Grenz ukommen - éier si dann uechter Europa verdeelt ginn.

D’Europäesch Kommissioun lancéiert Strofprozedure géint verschidden EU-Länner, dorënner eis Noperen a Frankräich an an der Belsch. Dat well hir Staats-Defiziter a Scholden ze héich ze sinn.
Et ass een éischte Schrëtt, huet et gëschter zu Bréissel geheescht, mat Sanktiounen ass an dëser Phas net ze rechnen.