រឿង Mark Zuckerberg ផុសរូបពពែពីរក្បាល និង Elon Musk ឈប់ប្រើ Bitcoin ឱ្យទិញ Tesla Sakada Techie Show

កាលពីថ្ងៃ ១១ ខែឧសភាកន្លងទៅនេះ Mark Zuckerberg បង្ហោះរូបពពែពីរក្បាលនៅលើគណនី Facebook ផ្លូវការ ធ្វើឱ្យសហគមន៍អ្នកនិយម Bitcoin នៅឯ Reddit និង Twiiter ឯណោះកំពុងតែជជែកគ្នាបែកផ្សែង។

ជជែកគ្នាក៏ដោយសារពពែពីរក្បាលដែល Mark បង្ហោះមានមួយក្បាលដែល Mark បានដាក់ឈ្មោះថា Bitcoin ដែលជាលុយគ្រីបតូកំពុងល្បីនោះ ហើយក៏ស្របពេលដែលថ្ងៃទី១១នោះទីផ្សារគ្រីបតូពិភពលោកហាក់ឡើងពណ៌ក្រហមដាំក្បាលបន្តិចផង។

នៅលើបណ្ដាញសង្គមមានអ្នកខ្លះលើកឡើងថា Mark Zuckerberg មានទិញ Bitcoin ទុក ឯអ្នកខ្លះទៀតក៏លើកឡើងថា Mark កំពុងតែដុតដៃដុតជើងធ្វើលុយគ្រីបតូខ្លួនឯងក្រោមឈ្មោះថា DIEM ប្ដូរមកពី Libra នោះ។

តែសម្រាប់អ្នកស្រឡាញ់សត្វវិញមើលឃើញផុសនោះថា ជាការគម្រាមកំហែងសម្រាប់ជីវិតសត្វទៅវិញ ដោយហេតុថា Mark Zuckerberg ប្រកាន់គោលការណ៍មួយថាគាត់មិនញាំសាច់ទេ ប្រសិនបើសាច់នោះគាត់មិនសម្លាប់ដោយខ្លួនឯង ហេតុនេះមានការព្រួយបារម្ភខ្លះដែរថា Mark អាចនឹង ចាត់ការពពែនោះនៅពេលណាមួយ។

សម្រាប់ Mark Zuckerberg មិនត្រូវបានគេដឹងថាគាត់មាន Bitcoin ជាផ្លូវការប៉ុន្មាននោះទេ ហើយក៏សូមបញ្ជាក់ផងដែរថានៅក្នុងខណៈពេលនេះតម្លៃ Bitcoin ហាក់ធ្លាក់់ចុះខ្លាំងបន្តិច បន្ទាប់ពីឡើងខ្ពស់កប់ពពកដល់ ៦ម៉ឺនដុល្លារ មកពេលនេះមានតម្លៃខ្ទង់ ៤៩០០០ ដុល្លារតែប៉ុណ្ណោះ។

គូសបញ្ជាក់ផងដែរថា ក្នុងថ្ងៃដដែលនេះផងដែរ Elon Musk ក៏បានបង្ហោះសារមួយនៅលើ គណនី Twitter របស់គាត់ផងដែរ​ ទាក់ទងទៅនឹងលុយគ្រីបតូ Dogecoin ដោយធ្វើជាសួរទៅកាន់អ្នកគាំទ្រថា គាំទ្រទេបើគាត់ប្រើកាក់នេះនៅក្នុងក្រុមហ៊ុន Tesla នោះ។



ថ្មីៗនេះផងដែរ Elon Musk គាត់បង្ហោះ ថា Tesla ឈប់ប្រើប្រាស់ Bitcoin ក្នុងការទូរទាត់រថយន្តមួយរយៈសិន លុះត្រាតែអ្នក Mine BTC រត់ទៅប្រើ Green Energy វិញ។