Sáhkavuorru Sámi Allaskuvla
-
- Kultur og samfunn
-
Sámi allaskuvla podcasta Sáhkavuorru mas beasat oahpásmuvvat dutkamii ja dutkanfáttáide guoimmuhan vugiin. Podcasta prográmmajođiheaddjit leaba girjjálašvuođa professor Harald Gaski ja filbmadahkki Per Josef Idivuoma.
Podcastas leat 2 áigodaga, ja oktiibuot 10 episoda ja juohke episodas beasat oahpásmuvvat Sámi allaskuvlla dutkiide ja dutkanfáttáide. Sii čilgejit álkkes vuogi mielde iežaset dutkanprošeavttaid birra, seammás go muitalit manin sii beroštišgohte juste daid áššiid guorahallat mii šattai sin karriearan.
Ulbmil podcasttain lea gaskkustit dutkama ja dutkiid fágalaš sisdoalu guoimmuheami bokte. Seammás garvit dutkiid árbevirolaš ovdanbuktinvuogi – logaldallama.
Prográmmaráiddus ilbmá ođđa Podcast juohke goalmmát vahku gitta ođđajagi rádjái. Fáttát maid birra ságastallet leat sámi báikenamat, juoigan, duodji ja álgoálbmotjournalistihkka. Ja dieđusge juovllaid áigge ságat sámi biepmuid birra, ja manin dat leat nu dearvvaslaččat.
-
Boazosámiid giella eatnamiid birra - Helena Omma
Helena Omma lea Sámi allaskuvlla doavttergrádastipendiáhtta. Son guorahallá boazosámiid giela eatnamiid birra. Son háliida bargguinis dokumenteret man ollu árbevirolaš máhttu lea juohke sánis, ja manin dasa gánnáha bidjat fuomášumi.
-
Badjel 50 jagi juo bargan ovddidit sámegiela ja sámi servodaga - Ole Henrik Magga
Son lea Sámi allaskuvlla vuosttaš professor ja Sámedikki vuosttaš presideanta, ja lea fágaolmmožin ja politihkkárin áŋgirit ja gierdilit bargan ovddidit sámegiela dili skuvllas ja servodagas.
-
Doibmet go máidnasat šat dán áiggi mánáidgárddiin? - Marikaisa Laiti
Marikaisa Laiti lea dutki Sámi allaskuvllas. Son čuovvu sámi mánáidgárddiid dainna ulbmiliin ahte dokumenteret mii dán áigge doaibmá bures sámi mánáid oahpaheamis, ja mo ovdánahttit sámi pedagogihkka boahtte áigái.
-
Buohtastahttá árbevirolaš máhtu dieđalaš máhtuin - Inger Marie Gaup Eira
Sámi allaskuvlla dutki Inger Marie Gaup Eira lea guorahallan sámegiela muohtasániid, ja movt dat adnojit earenoamážit boazovázzi gielas. Son atná árbevirolaš máhtu vuođđun su dutkanbargguin, ja nu ovdánahttá fágaidrasttildeaddji dutkama.
-
Mii lea innovašuvdna sámi geahčestagas? - Samuel Valkeapää
Samuel Valkeapää lea duojár ja duodjelektor Sámi allaskuvllas. Son oaidná ahte máilbmi lea johtilit rievdame ja dás son gažada makkár sajádat duojis ja árbevierus lea dán ovdáneamis. Dássážii lea leamaš dehálaš bisuhit sámi árbevieruid, muhto dat mii orro ovddusguvlui šaddame deháleabbo lea doalahit árbevieru innovatiivan.
-
Sámi báikenamat - Kaisa Rautio Helander
Dán Podcastas oahpásmuvat Kaisa Rautio Helanderii ja sámi báikenammadutkamii. Kaisa lea professor Sámi allaskuvllas ja lea riikkaidgaskasaš báikenammadutkama áššedovdi. Podcastas gulat buriid ovdamearkkaid Kaisa dutkansuorggis, ja son maiddá muitala mii dat lei mii oaččui su čuovvulit dakkár bálgá iežas dutkamis.