Ávvir Ávvir, Avvir

Vaikke buohkain lea psyhkalaš dearvvašvuohta, de eai duostta buohkat muitalit iežaset dili birra. Sara Kristine Vuolab lea válljen rabasvuođa, ja son muitala Sáhkapoddas lossamiela ja balu birra. Son lea maid rahčan givssideami, borranváttuid ja ávnnasmolsundávdda geažil. 

Ávvira Sáhkapoddas juhket olbmot iežaset eallinvásáhusaid, mii čuovvut ođasgova ja áššedovdit čilgejit áššiid dárbbu mielde. Sáhkapodda lea min sáhkaruitu. 

Mannan dálvvi guohtunroassu čuozai garrasit boazodolliide ja lossa barggut leat váikkuhan sin dearvvašvuhtii. Máhtte Niillas Gaup muitala movt son vásihii guohtunroasu ja oaivvilda ahte váilevaš sihkarvuođadoaimmat dagahit ahte boazodolliid dearvvašvuohta lea garra dilis. 

Gunhild Berit Sara Buljo massii eatnistis mánnán ja danin leamaš sutnje hui dehálaš veahkehit eará álgoálbmotmánáid. 17 jagi áigi vuođđudii Mama Sara veahkkeorganisašuvnna, ja dán doibmii lea bidjan olu návccaid ovdal go ođđajagis mearridii mannat ealáhahkii. 

Movt galgá ráhkisvuođa dikšut huššas árgabeaivvis, makkár árbevierut leat čadnon dasa go galgá nuppis jearrat náitalit ja lea go nu ahte sámi dievddut eai huma dovdduid birra? 
Johan Ivvar ja Linn Henriette Gaup muitaleaba movt soai deaivvadeigga 18 jagi áigi, makkár sudno ráhkisvuođabálggis lea dássážii leamaš birra ja movt soai dikšuba iežaska ráhkisvuođa.

Kárášjohkalaš Elen Kirsten Anti bázii botnehis morrašii maŋŋel go massii iežas 16-jahkásaš gándda iešsorbmemii 1996:s. Son muitala ahte Ken Robert lei movttegis gánda geas ledje áigumušat eallimis, muhto ahte fáhtehalai lossamillii maŋŋel go ii ožžon skuvlasaji dahje barggu.

Ávvira Sáhkapoddas juhket olbmot iežaset eallinvásáhusaid, mii čuovvut ođasgova ja áššedovdit čilgejit áššiid dárbbu mielde. Sáhkapodda lea min sáhkaruitu. 

Kárášjohkalaš Anne Marie Johnsen lei dušše nieiddaš go 2. máilmmesoahti buollái. Son muitala ahte soahtemuittut čuvvot eallenagi. 89-jahkásačča mielas lea surgat go Ruošša fallehii Ukraina guovvamánus, ja dál doaivu ahte ii dárbbašivčče vásihit ođđa máilmmisoađi.