Samoan Devotional Open Heavens Samoa

OPEN HEAVENS
MATALA LE LAGI MO LE ASO SA 5 ME 2024
(tusia e Pastor EA Adeboye)
 
Manatu Autu: O Lē talepe faavae – (Protocol Breaker)
 
Tauloto -Tusi Paia– Esekielu 21:27  “Ou te fulisia, fulisia, fulisia, e lē toe i ai lava lea, se‘ia afio mai o ia ‘ua i ai le tonu, ‘ona ‘ou avatua ai lea ‘iā te ia...”
 
Faitauga - Tusi Paia: Mataio 15:22-28


Na talepe e le Atua faiga faavae ina ua avea Solomona e fai ma tupu i le 1 Tupu 1 auā e le’i mautinoa o ia o le suli e soso’o i le nofoalii. Na mautu le talitonuga o Atonia o lona taimi tonu lea I le nofoalii, na ia taumafai fo’i e fāoa le mālō a’o soifua Tavita. E ui i amioga a Atonia ma le tele o isi uma mafuaaga e ono lē agava’a ai Solomona e avea ma tupu, na gaioi le Atua ma faataunuu lona lava finagalo ma fa’amautinoa e fai Solomona ma tupu.
 
I ni tausaga ua mavae, na sau se tasi o o’u atali’i ma fai mai, “Tamā, ua o’u mana’omia se galuega fou, ma ua valaauina a’u i se fa’atalanoaga o se avanoa na o’u talosaga I ai, Sa o’u talosaga mo le tulaga o le Pule Lagolago.” E tau amata atu le tatalo mo ia ae fai mai. “Leai Tamā aua e te tatalo, tau lava o le fai mai o sau upu.” O’u fai atu loa, “O le a sologa lelei le faatalanoaga (interview).” Na tali atali’i, “Amene.” Na toe sau i le aso na soso’o ma le tala fiafia, “Tamā, ou te taunuu atu i le faatalanoaga, na o latou faasino a’u i le potu fono ma fesili mai i ni fesili se tolu (3), “O ai lou igoa?, O le a le avanoa na e talosaga mai i ai, a o afea e mafai ai ona e amata?” Sa o’u tali atu i ai, o taeao.”
 
Sa o’u fa’amālō atu I le atali’i ae faapea mai, “ Tamā, fai mai se isi au upu.” Sa ou faapea atu, “o le Atua mata’utia na ia avatu iā te oe le galuega o le a ia si’itia lou tulaga i se taimi vave.”
Na toe sau i le aso na soso’o ai ma le gatete i le fiafia ma fai mai, “Tamā, na o’u taunuu i la’u galuega fou, matou feiloai ma i latou na faia faatalanoaga o le galuega fai mai ou te alu ese ma le fono ananafi ae faamavae le Pule Sili. Na o latou fesili mai po ua o’u sauni e avea ma Pule Sili o le ofisa ma o’u tali atu Ioe.” Na o’u toe fa’amālō i le atali’i ae faapea mai, “Tamā, fai mai se isi upu.” na o’u toe faapea atu ai, “O le Atua na ia amatalia le galuega lelei ia te oe o le a ia fa’aatoatoaina.” Talitonu mai oe, na toe sau i le aso na soso’o toeitiiti a lē mafai na tautala, fai mai, “ Tamā na o’u taunuu i le fale faigaluega ae faamatala mai ua o latou iloa na ala ona faamavae le Pule Sili ona ua ofo i ai e le kamupanī o loo matou tauvā le faaluaina o lona totogi o loo maua, i le matou ofisa, ma ua faapea ai ona o latou siitia faaluaina fo’i lo’u totogi ne’i o’u musu.” Sa o’u toe faamālō i le atalii ae toe faapea mai fo’i, “Tamā fai mai se isi au upu.” Sa o’u tausua i le atalii.” Ua e mana’o e te maua atoa le kamupani?”
 
O lo’u Atua, e lē mana’omia se mulimuli I faiga faavae pe a finagalo e faaeaina lana fanau. Fai mai Salamo 115:3, e faia e ia o mea uma ua ia finagalo i ai. Ou te tatalo mo oe i le asō ia talepe e le Atua faiga faavae uma ae si’itia oe i le tumutumu, I le suafa o Iesu, Amene.
 
Tatalo
Tama, talepe ni faiga faavae e tatau ona talepeina ma faamanuia ia te a’u, i le suafa o Iesu, Amene

OPEN HEAVENS
MATALA LE LAGI MO LE ASO TOONAI 4 ME 2024
(tusia e Pastor EA Adeboye)
 
Manatu Autu: O Fea Lau Fa’aaliga? – (Where Is Your Vision?)
 
Tauloto -Tusi Paia– Sapakuka 2:2  “Ua tali mai fo‘i le ALI‘I, ‘iā te a‘u, ‘ua fa‘apea mai: ‘Ia e tusi le fa‘aaliga, ‘ia e togitogi i papa, ‘ina ‘ia momo‘e o ia lē na te faitauina..”
 
Faitauga - Tusi Paia: Sapakuka 2:2-3


E mafai ona susulu malosi le malamalama I fafo, ae afai ua puaoa lau vaai, e lē mafai ona e iloa lona susulu malamalama. Fai mai Kenese 27:1 ua toeaina Isaako ma ua puaoa ona mata, ua lē mafai ai ona vaai. Ua ta’u mai ai iā te oe, a po lē vaai a se tagata o lona uiga ua vaivai.
I le Failauga 12:1-3 ina ua faapea mai Solomona “. ..ma fa’apouliuligia e o vaai i fa’amalama,” o le uiga o lea fa’aupuga, “ina ua lē toe iloa e ou fofoga se mea ona ua e matua.” O lona uiga o le isi auala e te iloa ai ua e matua o le po o lau vaai. O loo ta’u mai i le tusi o Ioelu 2:28 a o’o ina e toeaina e suia fa’aaliga i miti. O le fa’aaliga sa’o e tatā’ia tagata e tamomo’e (Sapakuka 2:2) e fa’amautinoa o loo fa’ataunu’uina, a’o i latou e fai miti e masani ona na o le miti ae leai se mea e faia e faataunuu ai le miti.
 
I ni tausaga ua mavae, sa o’u talanoa i toeaiina e toatolu, o i latou fo’i o a’u uō māfana, ma o’u fai i ai o le uiga o le matua o tausaga o le soifua o le “tagata fai miti,” afai o lo’o i ai pea sau miti o lo’o tuli, o lona uiga e te le’i matua. O le mafuaaga lea o lo’u tausua i nisi taimi, na o i latou e matutua iā te a’u e toeaiina auā o loo o’u galue pea i la’u miti. O lona uiga o lea lava o’u te laititi e ui ua 82 o’u tausaga.
 
E faamomoi loto le vaai atu i tagata talavou a ua matutua auā ua leai se fa’aaliga. Ioe, e talanoa e uiga i miti mo lo latou lumana’i peita’i ua na o ni mo’omo’oga auā e te lē o vaai o galulue aga’i ia latou miti. A ou vaai i tagata talavou faapea, e masani ona o’u faapea ifo iā te a’u, “Uso talavou, o fea lau fa’aaliga?”
 
A avea se tagata ma fai miti ae lē o se fai fa’aaliga, o lona uiga ua matua le uso. O lea fo’i uso ua lata ona uma ona aso i luga o le fogaeleele. Fai mai le Tusi Paia i le Faataoto 29:18, “A leai se fa’aaliga e fa’asalalauina le nuu; a o le ua tausi i le tulafono, amuia o ia.” I se isi fa’aupuga, afai ua leai se fa’aaliga i se tagata, ua amata ona mou atu le uso.
Ou te talitonu o loo fetalai le Atua i se tasi o faitau i lenei faamalosi. Sa i ai au fa’aaliga tetele, peita’i o le taimi nei, ua galo ia te oe, ua e lē toe manatuaina. Ala mai i luga! O le a lau faaaliga o lo’o e galue malosi ia ausia, I le suafa o Iesu. Amene.

OPEN HEAVENS
MATALA LE LAGI MO LE ASO FARAILE 3 ME 2024
(tusia e Pastor EA Adeboye)
 
Manatu Autu: Faavavau – (Eternity)
 
Tauloto -Tusi Paia– 1 Tesalonia 4:17  “Ona fa‘afuase‘i lea ‘ona ‘aveina a‘e o i tatou o ē ola ma totoe, fa‘atasi ma i latou i ao, ‘ina ‘ia fetaia‘i ma le Ali‘i i le vā nimonimo; ‘ona tatou fa‘atasi pea lava lea ma le Ali‘i...”
 
Faitauga - Tusi Paia: Ioane 14:1-3


Mo nisi tagata, o le faavavau o se nofoaga e le tatau ona soona mafaufau iai se tagata. Peitai o le mea moni, o le nofoaga e faavavau, e le tatau ona faagalogalo e se tagata. O le tulaga moni, e tatau i tagata uma ona fesili i le fesili lenei, o fea ou te iai e faavavau? Ua saunia e le Atua tali i nei fesili i le Tusi Paia ma ua tusia manino ina ia avanoa mo tagata uma, aua foi e le finagalo o ia i le mataupu i le nofoaga e faavavau e faateia ai tagata pe a oo iai. O le mafuaaga lea ou te ofo ai i le toatele o kerisiano e nonofo I lenei lalolagi e aunoa ma le manatu i le nofoaga e faavavau. O nisi o kerisiano e te iloa lelei atu lava i o latou olaga ma amioga I le galuega a le Atua. E soifua e peiseai o le a nonofo i le lalolagi e faavavau, peitai o loo faapea mai le Eperu 13:14, 'Auā ‘ua leai so tatou ‘a‘ai tumau ‘i‘inei, a ‘ua tatou sā‘ili i le atalī. '
 
E le faapea olaga o tagata o le faatuatua. O mea e taulai iai la latou vaai, o upu e faia ma latou tautinoga, e te iloa ai e manatu mamafa i le nofoaga e faavavau. Fai mai le Eperu 11:16, A o lenei, ‘ua latou naunau lava i le nu‘u e sili ‘ona lelei, o le fa‘alelagi lea; o le mea lea e lē mā ai le Atua ‘iā te i latou, ‘ina ‘ia ta‘ua o ia o lo latou Atua; auā ‘ua saunia e ia o le ‘a‘ai mo i latou.
 
E ese le matagofie o lenei tautinoga. Ou te naunau foi a’u iai, ma ou te tatalo ia e maua foi se tautinoga faapenei, I le suafa o Iesu. Aua e te avea tuinanau o lenei lalolagi ma le faaseseina e le oa ma le tamaoaiga e ono nenefu ai lou faamoemoega i le nofoaaga ua saunia e Keriso mo oe. E moni le nofoaga e faavavau, ma o le itu e nofo ai le tagata e faavavau e fua I le ituaiga olaga o loo ola ma soifua ai I le lalolagi nei (Roma 2:3-10). O le nofoaga ua saunia e Keriso mo oe, o se nofoaga e te le toe iai se oti, o se nofoaga o le olioli ma mea matagofie (Faaaliga 21:1-7). Ao le isi itu, o lo’o iai se isi nofoaga e nonofo ai i latou uma na teena le alofa tunoa o le Atua ia Keriso. O lenei nofoaga na saunia e faasala ai le tiapolo ma ana temoni, ma o i latou o lo’o soifua I ni olaga e faafiafia i le lalolagi, faamalie o latou tino, pe taitaiina foi e le tiapolo, e faasala faatasi I latou I lea nofoaga (Mataio 24:41). O se nofoaga e faavavau le mu i le afi ma tiga. Ia aua lava nei maua ai oe i lea nofoaga, i le suafa o Iesu. O le auala e sola ese ai ma le faasalaga ma le tiga e faavavau, o le lafoai o lou ola ia Keriso i le aso, afai ua uma ona e faia, ola ma soifua faapaiaina ma taulai lau vaai i le ola e faavavau.
 
Tatalo
Tama, ia aua lava nei ou misia le ola e faavavau, i le suafa o Iesu, Amene. 

OPEN HEAVENS
MATALA LE LAGI MO LE ASO TOFI 2 ME 2024
(tusia e Pastor EA Adeboye)
 
Manatu Autu: Alefa ma le Omeka (Alpha and Omega)
 
Tauloto -Tusi Paia– Isaia 46:10  ’O lo‘o fa‘aali talu mai le amataga o mea e mulimuli; mai anamua fo‘i o mea ‘ua lē faia; o lo‘o fai ane, “E tu la‘u pule, ‘ou te faia fo‘i mea uma ‘ou te loto i ai.”.
 
Faitauga - Tusi Paia: Ioane 1:1-5


I le Faaaliga 1:8, o lo tatou Alii o Iesu Keriso na faaali mai, o ia o le Alefa ma le Omega. Mulimuli ane i le Faaaliga 121:6, na ia faamatalaina o ia o le Amataga ma le Faaiuga. O le faamamafa ua toe aumai i le Faaaliga 22:13, 'O a‘u le Alefa ma le Omeka, o le amataga ma le gata‘aga, o le muamua ma le mulimuli.”  O lona uiga o mea uma e amata ma faaiu ia te ia. 
 
O lo’o aumai i le fuaitau o lo’o taua I luga, e manino lelei e leai se mea e mafai ona e amataina e aunoa ma le faatagana a le Atua ma e le mafai ona e faaiu se mea e aunoa ma lana faatagana. O le talalelei lenei mo oe, aemaise pe afai o le a e amataina se galuega. Talanoa muamua I le Alefa ma le Omeka. 
 
O le Atua o ia lea na foafoaina le lalolagi ma o ia foi na te faamutaina. I nisi faaupuga, o mea uma i le lalolagi o loo ia pulea, o lona uiga, afai o loo e latalata ia te ia ma e faatagaina o ia e taitai i lou olaga, e lelei ma faigofie atu lou olaga aua o Lē e pulea le lalolagi o lo’o taitai ia te oe. O le tulaga lea e faapea mai ai le Faataoto 3:5 Ia e fa‘atuatua i le ALI‘I ma lou loto ‘atoa; ‘ae ‘aua le fa‘alagolago i lou lava atamai’.
 
 E silafia lelei e le Atua le mea o le a tupu ae lei tupu. E na te silafia le nofoaga e ono lamatia ai oe ma le vaega o loo nanaina ai ou manuia. Ua ia fetalai mai le Isaia 45:3, e na te foa‘i atu fo‘i ‘iā te oe ‘oloa o lo‘o i le pogisā, ma ‘oloa lilo o lo‘o i mea nanā; E na te silafia nei mea uma aua o ia o le Amataga ma le gataaga. O le mea lea na tusia ai e Tavita ma le mautinoa 1O le ALI‘I, o lo‘u leoleo mamoe o ia; e leai se mea ‘ou te mativa ai. 2Na te ‘ave a‘u i le mea e i ai le vao mu‘a ‘ou te ta‘oto ai; na te ta‘ita‘i ‘iā te a‘u i tafatafa o vai e tafe lemū (Salamo 23:1-2).
 
E mafai ona ou fesili atu, o ai lou leoleo mamoe? O ai e taitaiina oe I lenei olaga? O au a ia, ou te iloa ou te vaivai tele e le mafai ona ou faia mea I lenei lalolagi e faalagolago ia te au, ma o le tulga lea ou te faia ai le Alefa ma le Omega o lou leoleo mamoe. Ina ua ou saili e faatau se fanua mo le Ekalesia RCCG, na ou moomoo i se tasi o fanua ona e lata i le auala tele, ma i lou mafaufau itiiti lava, ua matua lelei ma le atoatoa. Peitai na taitai i matou e le Atua i le fanua o loo iai nei le Lotu, lea ua faamautuina e sili mamao atu aua o ia o le gataaga. O i latou e faamoemoe i le Atua e ta’ita’i i latou i faaiuga fai, e lē taitai ona salamo ona o ia faaiuga. Faataga le Atua e ta’ita’i i au faaiuga ma so’o se mea e te faia. E na te silafia le iuga mai le amataga, i le suafa o Iesu, Amene. 

OPEN HEAVENS
MATALA LE LAGI MO LE ASO LULU 1 ME 2024
(tusia e Pastor EA Adeboye)
 
Manatu Autu: Faatuatua I le Atua (Trust God)
 
Tauloto -Tusi Paia– Faataoto 3:5   ‘Ia e fa‘atuatua i le ALI‘I ma lou loto ‘atoa; ‘ae ‘aua le fa‘alagolago i lou lava atamai’.
 
Faitauga - Tusi Paia: Faataoto 3:5-8


O le toatele o tagata e faapea mai latou te faatuatua I le Atua ma o latou loto atoatoa, e te ono ofo aua latou te faalagolago lava i lo latou iloa ma taumafai e fuafua lelei o latou ola i le olaga nei. O le fesili, o le a le loloto o lo tatou iloa? E tatou te iloa ea e pei ona silafia e le Atua? E tatau ona e malamalama e le mafai ona tutu ni kapeteni se toalua i le foe o le vaa i le taimi e tasi. E lua lava vaega, muamua pe ete faataga le Atua e taitai i lou olaga, lona lua pe ete tuua o ia i fafo. E le tatau ona e iai i le nofoa o le taavale ae faatoa manatua le Atua pe a o’o i faafitauli, e tatau ona e faatuatua ia te ia ma le atoatoa ma faalagolago ia te ia mo mea uma. Afai o oe moni o se afafine poo se atalii o le Atua, e tatau lava ona taitaiina oe e ia (Roma 8:14). 
 
E le faigofie i le amataga le faatuatua i le Atua, e galue o ia ia te oe a’o ia taitai ia te oe, e na te aoaoina ma faatonu oe ina ia e lelei. Afai e te faatuatua i le Atua e taitai oe, o so’o se mea e te tago iai e manuia. O Aperaamo o se tagata na faatuatua i le Atua ma le atoatoa ma na matua manuia. Na ia lafoai mea uma na ia iloa ae alu atu i se laueleele na folafola atu le Atua o le a ia faaali atu ia te ia. Na ia alu atu e aunoa ma se fuafuaga mautu, ua ia filifili e faatuatua i le Atua i le ala atoa. E lei leva, ua ia faatupulaia lona mauoa ua iai tamaloloa e 318 e latou te o e tau mo ia, ma sa nonofo faatasi uma i lona fale (Kenese 14:14). E matautia le tulaga o le tamaoaiga na ia maua ua oo ina ia teena le meaalofa a le tupu ina nei faoa le viiga ona o lona mauoa tele. 
 
A e faatuatua i se tagata, e te le fesili ini fesili le aoga. A e ulufale i se vaalele, e te faatuatua i le pailate e nate aveina oe i le nofoaga o loo e malaga atu iai ma le saogalemu, e te le fesili pe vaai i lona laisene, pe suesue foi po’o lelei le vaalele. Afai e te faatuatuaina tagata e tausia lou saogalemu ma le ola, e le sili atu ea le faatuatua i le Atua maualuga?
 
Na aoaoina au e faatuatua i le Atua mai le amataga o lau savaliga aua na aoaoina au e lau faiaoga aso Sa e faapea, a oo se tamaitiiti i se mea maualuga, a fai atu lona tama e oso, e le faia ni ana fesili aua foi o lo’o ia mautinoa e sapo ia e lona tama. O le taimi na aoaoina ai au i lenei mataupu, na amata loa ona ou matua faatuatua i le Atua, ma afai mai e oso, ou te oso ma lou iloa e na te sapo ia te au. O mea uma ua matou ausia i le RCCG e oo mai i le aso, e faavae uma lava i le faatuatua. A fai mai galue ma alu i o, ou te alu, e leai ni manatu e faaalia. Faatuatua i le Atua ma lou loto atoa ae aua e te faalagolago i lou lava atamai, i le suafa o Iesu, Amene. 

OPEN HEAVENS
MATALA LE LAGI MO LE ASO LUA 30 APERILA 2024
(tusia e Pastor EA Adeboye)
 
Manatu Autu:   - E faataua e ia lou tino (He cares about your body)
 
Tauloto -Tusi Paia– 1 Korinito 6:19   “Tou te lē iloa ‘ea, o lo ‘outou tino o le malumalu lea o le Agaga Pa‘ia ‘ua i totonu ‘iā te ‘outou, o lo‘o ‘ua ‘iā te ‘outou mai le Atua, e le ‘aiā fo‘i ‘outou ‘iā te ‘outou?


Faitauga - Tusi Paia: 1 Korinito 6:19


Fai mai le 1 Tesalonia 5:23 “ ‘Ia ‘ato‘atoa ‘ona fa‘apa‘iaina o ‘outou e le Atua lava e ona le manuia; ‘ia tausia lava lo ‘outou agaga ‘atoa uma, i le ma le loto, ‘atoa ma le tino, ‘ia lē mata‘uleagaina, i le afio mai o lo tatou Ali‘i o Iesu Keriso.”
O le fuaitau lenei ua manino mai ai, e finagalo le Atua ina ia tausia o tatou agaga, loto, ‘atoa ma le tino, ‘ia lē mata‘uleagaina se’ia oo i lona toe afio mai. E fete’ena’i lea manatu ma le tala e gagana ai nisi, e fa’apea e manatu le Atua na o le Agaga ma le loto ae lē manatu I le tino. E matuā tāua i le Atua lou tino, ma e lē finagalo le Atua e mata’u leagaina fua oe. E na te faatāuaina ofu e te la’eiina, (1 Timoteo 2:9) e oo i le fa’aaogaina o lou tino (1 Korinito 9:27) pe tā sau tatau ma pe’a I lou tino pe leai (Levitiko 19:28). E na te fa’atāuaina lou tino e pei foi ona ia faatāuaina lou agaga.
 
O le mea moni, o le tulaga e iai lou agaga o le a atagia ai foi foliga o lou tino. O le mea e i totonu,  o le a aliali mai i fafo. I le tele o tausaga ua tuanai sa ou valaauina nisi o faifeau e faiaoga i le Redeemed Christian College. Ua latou faasoa i tamaiti a’oga ua lilifa tele a’u a’oa’oga i le tausia o tulafono, ma tele ala fua e taotaomia ai le pule saoloto I le faaaogaina o a latou tino, a’o le Atua e na te faataua e na o le agaga. Ou te o’o atu i le vasega ua matua talitonu tamaiti a’oga i faasoa a faia’oga ia. Sa ou lagona e manaomia lo’u fa’asa’oa o lenei a’oa’oga le talafeagai. Na ou faaalia I le vasega moli ‘ai e lua; o le tasi e lanu meamata a o le isi e lanu moli ma ou faapea atu: ‘O le fea o ia moli, ua pula? Sa latou faasino mai le moli lanu samasama. Ona ou fesili lea, e faapefea ona tou iloa? Ua tali mai, e faigofie ona iloa I le lanu i fafo, ua pula le moli i totonu. Ona ou faapea atu lea, ’afai ua ia te oe Keriso i totonu ae a lē aliali mai i fafo, o lona uiga e le o iai Keriso i totonu o lou tagata mai le amataga’.
 
Tusa pe e te fiafia iai pe leai, a tilotilo tagata i ou foliga vaaia, e latou te faia ni faamasinoga o lou kerisiano e fua i mea e te faia i lou tino. Afai e te foliga e pei o tagata o le lalolagi, e latou te talitonu e leai lava se mea e ese ai oe ma isi tagata. E latou te le faalogo i le Tala Lelei o lo’o e lauga atu ai pe afai o lo’o e ofuina ofu e pei o se tamaitai talitane, po’o se tagata fa’asoesa. Aua nei mafua ia te oe ona liliu ese se tagata mai le faaolataga, le talalelei ia Iesu Keriso ona o foliga vaaia o lou tagata, tausia lou tino ina nei mata’u leagaina fua. E mafai ea ona iloa e tagata ua e faaolaina tau lava o le va’ai atu ia te oe?  I le suafa o Iesu, Amene.