Palabras Andadeiras palabrasandadeiras

Na nosa última etapa, aprendemos sobre un dos grandes pintores galegos do século XX, Luís Seoane, detémonos na canteiría, fundamental para entender esa fraga de pedra que é Compostela, coñecemos as unllas de San Lázaro, un dos pratos tradicionais de Santiago, e os vínculos de Federico García Lorca coa cidade.

Estamos achegándonos a Santiago. Nesta etapa, aprenderemos como o maxistral Ramón María del Valle Inclán imaxinou o pazo arzuán de Brandeso, coñeceremos a excelencia do queixo Arzúa-Ulloa, e bailaremos cunha das grandes cantantes populares do pasado século, Ana Kiro, que percorreu todas as festas de Galicia.

Camiñamos á sombra da serra do Careón, e aprendemos sobre o valor ancestral deses seixos que vas ver insertados en moitos edificios galegos, xa desde a Prehistoria. Coñecemos ao escritor Xosé Vázquez Pintor e degustamos o doce típico de Melide, os melindres. Achegámonos ao compositor internacional Fernando Vázquez e fascinánomos coa lenda da ponte Furelos.

Desde o corazón da comarca da Ulloa, coñecemos unha das xoias do patrimonio medieval galego, o Castelo de Pambre, e descubrimos outro dos elementos característicos da paisaxe rural galega: os hórreos. Tamén é tempo para saber dunha curiosa publicación nacida en Palas de Rei, o Mintireiro Verdadeiro, que chegou a ser o libro máis editado en Galicia. E saberemos dos nubeiros.

Nesta etapa sorprendémonos coa historia de Portomarín e a marabillosa Ribeira Sacra que comeza. Achegámonos á curiosa figura do Dr. Saa, Manuel Rodríguez Saa, un mago e hipnotizador que triunfou en París a principios do século XX. Coñecemos os famosos augardentes da zona e achegámonos ata o impresionante castro de Portomaior, onde nos detemos na lenda das tres irmás. Antes de chegar a Palas de Rei, temos que admirar a marabillosa igrexa de Vilar de Donas.

Neste programa coñecemos os muíños e as infraestruturas da auga. No país dos mil ríos, a riqueza etnográfica ao redor do uso deste ben é enorme. Falamos dos produtos da comarca, desde as carnes de porco celta ata os deliciosos santos das sobremesas. Coñecemos a poeta Marica Campo e bailamos ao paso dun curioso pasodobre publicitario do século XIX.