Cыяба‪н‬ ЭЕ/АҮ

"Миңсанаттын" бүгүнкү коногу Рюноскэ Акутагава, Габриел Маркес баштаган классик жазуучулардын аңгеме, повесттерин кыргыз тилине которгон Назгүл Осмонова. Биз котормочу жана акын айым менен азыркы окурмандын талабы, адабиятка мамиле тууралуу маектештик.

Дарыгер, психолог, режиссер, акын, сүрөтчү жана башка кесиптердин, миң кыл өнөрдүн ээси Ибадылла Ажибаев Европада даректүү тасмаларын көрсөтүп жүрөт. Анын фильмдери эл аралык фестивалдарда жеңип, авторго төгөрөктүн төрт бурчуна жол ачты.

Өскөнбай Бердибаев мургабдык акын. Кыргызстанга көчүп келгенине он жылдай болду. Өскөнбайдын жакында "Памир-Алай берметтери", "Тоолор баяны", "Ак-Байтал ашуусу" деген үч китеби жарык көрдү. Ар бир ырында кичи мекенин кылдат сүрөттөп, улуу тоонун коюнунда калган көчмөндүн урпактарын, алардын салт-санаасын даңазалап, ата конушун сагынып жашаган акын менен баарлашабыз.

“Миң санат” түрмөгүнүн бул чыгарылышында акын Толук Бек Байзактын маегин тыңдай аласыз. Дээрлик 30 жылдай миграцияда жүргөн калемгер чыгармачылыгындагы соңку жаңылыктары, мекенге болгон ички кусалыгы тууралуу кеп кылды.

"Миң санат" подкастында саясий сатира, сөз эркиндиги, жарандык турум, миграциядагы турмуш тууралуу калемгер, "Сынган миллиондун" автору Самат Уранкай менен маек курдук.

Кыргыз Эл жазуучусу, Токтогул атындагы мамлекеттик сыйлыктын лауреаты Өскөн Даникеев “жазуучу болом деп дегеле ойлогон эмесмин” дейт. Анын негизги кесиби – тоо инженери. Кыргыз адабиятына алтымышынчы жылдары кирип, "Кыздын сыры", “Бакир”, “Көз ирмемдеги өмүр”, “Арман” "Көкөй кести" ж.б. аңгеме, повесть, романдары менен таанылган. “Сызма геометрия” окуу куралын кыргыз тилинде жазган. Жазуучу өмүрүндө өтөгөн иши, замандаш-калемдештери, мекендин, кыргыз тилинин, карылыктын кадыры тууралуу Бурулкан Сарыгулова менен “Азаттыкка” үчүн “Сыябан маек” курду.