368 episodes

Luister na daaglikse potgooie met geloofsnadenke deur die teoloog en leraar, dr. Ronell Bezuidenhout. Jy kan beslis verwag om uitgedaag te word. Ronell se fokus is om “hoop” deur haar boodskappe bring. Die bedoeling daarvan is om jou te inspireer om elke dag bruisend aan te pak. Die kort potgooie word elke oggend vroeg gelaai. Luister op jou selfoon of enige rekenaar: dalk saam met jou oggendkoffie, op pad skool of werk toe, of selfs as jy net rustig in die natuur wil asemskep. Ronell sê sy skryf nie "dagstukkies" nie; sy bied daaglikse toerusting wat jou uitdaag om die "vaste kos" van geloof te verteer. "Die lewe is vir niemand maklik nie, maar dit hoef ook nie te wees nie! Jy het altyd 'n keuse hoe jy die lewe benader.” Hierdie meditasies wil jou help met daardie daaglikse keuses. Ronell is een van die eerste vroue-predikante van die NG Kerk. Haar beroepsroete het haar via Port Elizabeth (1990-2003) en Johannesburg (2003-2018) tot na die kusdorpie, Groot-Brakrivier, gebring, waar sy nou by 'n Lutherse gemeente in Rondevleihoogte betrokke is. Sy is 'n gevestigde skrywer, wat oorwegend aandag gee aan die interpretasie van antieke geloofsgewoontes vir moderne, besige mense. Vele boeke het al uit haar pen gekom. Sy bedryf ‘n groeiende digitale bediening, reis landswyd as gasprediker, retraite-aanbieder en geleentheidspreker en as 'n geloofsbegeleier ondersteun sy selfs mense buite Suid-Afrika.

Ronell Bezuidenhout: Daaglikse meditasie-potgooi en Veelkleurig-onderhoude Ronell Bezuidenhout

    • Religion & Spirituality

Luister na daaglikse potgooie met geloofsnadenke deur die teoloog en leraar, dr. Ronell Bezuidenhout. Jy kan beslis verwag om uitgedaag te word. Ronell se fokus is om “hoop” deur haar boodskappe bring. Die bedoeling daarvan is om jou te inspireer om elke dag bruisend aan te pak. Die kort potgooie word elke oggend vroeg gelaai. Luister op jou selfoon of enige rekenaar: dalk saam met jou oggendkoffie, op pad skool of werk toe, of selfs as jy net rustig in die natuur wil asemskep. Ronell sê sy skryf nie "dagstukkies" nie; sy bied daaglikse toerusting wat jou uitdaag om die "vaste kos" van geloof te verteer. "Die lewe is vir niemand maklik nie, maar dit hoef ook nie te wees nie! Jy het altyd 'n keuse hoe jy die lewe benader.” Hierdie meditasies wil jou help met daardie daaglikse keuses. Ronell is een van die eerste vroue-predikante van die NG Kerk. Haar beroepsroete het haar via Port Elizabeth (1990-2003) en Johannesburg (2003-2018) tot na die kusdorpie, Groot-Brakrivier, gebring, waar sy nou by 'n Lutherse gemeente in Rondevleihoogte betrokke is. Sy is 'n gevestigde skrywer, wat oorwegend aandag gee aan die interpretasie van antieke geloofsgewoontes vir moderne, besige mense. Vele boeke het al uit haar pen gekom. Sy bedryf ‘n groeiende digitale bediening, reis landswyd as gasprediker, retraite-aanbieder en geleentheidspreker en as 'n geloofsbegeleier ondersteun sy selfs mense buite Suid-Afrika.

    Dag 2 van meditasie-reeks #WeesWys

    Dag 2 van meditasie-reeks #WeesWys

    “Iemand wat nederig is en respek het vir die Here, kry rykdom, eer en lewe.…” (Spr  22:4)

    Ook Job het geleer dat mense wat die Here dien die wyse mense onder ons is.  Hy brei verder uit:  “om die kwaad te vermy, dit is insig” (Job 28:28).  As wysheid die vermoë is om met ‘n goddelike perspektief na die lewe te kyk, het Job dit veral nodig gehad!  Die lewe het Job behoorlik deur die meule gestuur!   So, “waar word wysheid gevind, en waar is die woonplek van insig,” wil Job weet (28:12).  As dit so moeilik is om wysheid te bekom, is dit seker logies dat wysheid op die “moeilikste plekke” gesoek moet word.  

    Ek het op die Vrystaatse Goudvelde groot geword – daar ken ‘n mens die swaar lewe van mynwerkers, vol risiko’s van rondstortings; asbestos-siekte; gehoorverlies a.g.v. ewige geraas. Dít om klip en rots te myn!  As jy soveel moeite doen om goud te bekom; wat is wysheid werd as “goud kan dit nie koop nie…” (Job 28:15).  Waar dan moet jy gaan?  En dit ontdek Job:  “Net God weet hoe die pad daarheen loop, net Hy ken die woonplek van die wysheid” (v23).

    Om te dink dat die blyplek van hierdie waardevolste van waardevolle in die mens gevind sal word!  Maar nie enige mens nie; net die mens wat die Here dien en die kwaad vermy (aldus v25).  In wêreldse standaarde is dit dwaasheid – waar sien jy die eenvoudigste mens en die een met aansien word oor dieselfde kam geskeer!  Tog, dit leer ons later in die Nuwe Testament ook:  “wat vir die wêreld die onsin van God is, is groter wysheid as die wysheid van mense…” (1 Kor 1:25).  God werk anders as wat ons ooit sal verwag - by God kry die nederige altyd rykdom!

    GEBED:  Here, leer my nie met die wêreld se standaarde die lewe te evalueer nie, maar met U standaarde.
     
    POTGOOIE: Jy kan die dagstukkies van die #WeesWys-reeks daagliks ook op alle bekende potgooi-platforms luister.  Vir meer inligting: https://ronellbezuidenhout.buzzsprout.com/

    MUSIEK: Op Dag 2 van #WeesWys luister ons na die Grammy-bekroonde Tamela Mann se vrystelling van 'n pragtige nuwe enkelsnit, "Superheroes Prayer".  Die  ballade, grasieus uitgevoer saam met mede-vokale kragstem Yolanda Adams, is geskryf en vervaardig deur bekroonde Kirk Franklin.
    "So dikwels soek ons na iets, iemand, om ons te help en ons hoop te gee, en nie te besef waarna ons soek nie, was nog altyd daar," sê Tamela Mann. "God is ons hulp en hoop, en Hy is altyd beskikbaar vir ons. Hy is die uiteindelike Superheld."
    https://youtu.be/LForEtUFKDI

    • 3 min
    Dag 1 van meditasie-reeks #WeesWys

    Dag 1 van meditasie-reeks #WeesWys

    “Die woorde van wyse mense maak kennis iets begeerliks” (Spr 9:2)

    Niks in die lewe – behalwe genade – val in jou skoot nie.  Om ‘n gelukkige huwelik te hê vra harde werk; om ‘n suksesvolle besigheid op die been te bring vra matelose opoffering; om ‘n goeie verhouding met jou kind te hê, vra toewyding.  Net soos met geduld word ‘n mens nie met wysheid gebore nie; jy leer by ander wyse mense hoe om wys te wees.  As jy wysheid kortkom, so leer Jakobus, dan moet jy daarvoor bid en God sal dit vir jou gee (Jak 1:5).  Maar, selfs om te bid, vra ‘n doelbewuste keuse en toewyding.  

    Wysheid – vir my – is ‘n ingeoefende gawe om vanuit God se perspektief na omstandighede te kyk.  Soos Paulus in Rom 12:1-2 sê, net mense wat hulself “as lewende en heilige offers” aan God gee, sal mense se denke sal vernuwe word.  Eers “dan sal julle ook kan onderskei wat die wil van God is, wat vir Hom goed en aanneemlik en volmaak is.”  Wysheid is ‘n sekere onderskeidingsvermoë – en Fil 2:9-10 leer dat jou daarvoor liefde moet hê wat “toeneem in begrip en fyn aanvoeling, sodat julle die dinge sal kan onderskei waarop dit werklik aankom.”  

    Met die Bybel as ons riglyn; die lewe as ons leerskool; medegelowiges as rolmodelle, en die Heilige Gees as Helper, het ons álles wat nodig is om wysheid te bekom.  

    Wysheid, so leer die Bybel “begin by die dien van die Here” (Spr 9:10).  Wysheid loop dus hand-aan-hand met gehoorsaamheid aan die wil van God.  Geloof in (en gehoorsaamheid aan) God is dus die beginpunt van wysheid, maar dit is dan weer wysheid wat die vrugbare grond bied waarin ons geloof in God kan floreer.    

    Mag wysheid soos ‘n boom groei, sodat die skadu daarvan vir ander begeerlik sal word.

    GEBED:  Here, ek wil vanuit U perspektief na die lewe kyk … leer my daarom om U te dien! 

    POTGOOIE: Jy kan die dagstukkies van die #WeesWys-reeks daagliks ook op alle bekende potgooi-platforms luister.  Vir meer inligting: https://ronellbezuidenhout.buzzsprout.com/

    MUSIEK:   Op Dag 1 van #WeesWys kyk ons na die liriekvideo van die lied “Perfect Wisdom of Our God” deur Keith en Kristyn Getty.
    Uit die liriek: 

    Oh grant me wisdom from above,
    To pray for peace and cling to love,
    And teach me humbly to receive
    The sun and rain of Your sovereignty.
    Each strand of sorrow has a place
    Within this tapestry of grace;
    So through the trials I choose to say:
    "Your perfect will in your perfect way."

    Keith en Kristyn Getty is vooraanstaande moderne gesangskrywers in die wêreld, met 'n ongelooflike katalogus van liedjies wat regoor die wêreld gesing word, insluitend die bekende gesang, "In Christ Alone”.  Gebore in Noord-Ierland en gebaseer in Nashville, is hulle multi-bekroonde kunstenaars met Keith wat die eerste musikant van die moderne era is wat die Ridderlike Orde van koningin Elizabeth II ontvang het vir diens aan musiek en gesangeskryf.

    https://youtu.be/hSnzYnOe6kI

    • 3 min
    Dag 30 van Meditasie-reeks #Brandpunt

    Dag 30 van Meditasie-reeks #Brandpunt

    Dertig dae gelede het ons hierdie reeks begin met die herinnering dat ons “vrye toegang het tot 'n kragbron wat met 'n sterk stroom - ononderbroke - vloei waarby ons mag inprop.  'n Kragbron direk uit God se hand!  'n Brandpunt wat die gloed van God kan laat skyn.”

    Met Jesus se hemelvaart het Hy (in Hand 1:9) beloof, “Julle sal ‘KRAG’ ontvang wanneer die Heilige Gees oor julle kom”.  Onbeperk.  Vrylik beskikbaar.  Dit is ons geskenk.  Intussen het Pinkster aangebreek.  Die krag is oor ons uitgestort.  

    Vir jou en myself bid ek ook die woorde toe wat Paulus vir die gemeente in Kolossense gebid het:  “Mag ons vrugte dra deur goeie werke en toeneem in die kennis van God. Mag God deur sy wonderbare krag (aan ons) alle sterkte gee om in alle omstandighede geduldig te volhard” (Kol 1:10-11).   Dank God dat ons nie hierdie werk uit ons eie hoef te doen nie, maar dat dit juis God is wat “deur sy Gees uit die rykdom van sy heerlikheid aan ons die krag sal gee om innerlik sterk te word" (Ef 3:16.)  

    Baie dankie dat jy hierdie Pinksterreeks saam met my gevolg het.  Mag die Gees van Wysheid ons met ons nuwe reeks bystaan wat van môre af die tema van wysheid voortsit.


    GEBED:  Kom, o Skepper Gees, 
    Lewendmakend Gees; 
    Kom in al U volheid. 
    Kom in al U krag.  
    Lei my in U waarheid; 
    Leer my van die Vader en Seun.  
    Wees U ook my Trooster. 
    Kom, o Skepper Gees.*

    (* aangehaal uit die Liedboek No 23)
     
    KUNS-INSPIRASIE:  Ikoon deur onbekende skrywer, “Uitstorting van die Heilige Gees”,  12de eeu, in die Nasionale Museum van Georgia.

    POTGOOIE: Jy kan die dagstukkies van die #Brandpunt-reeks daagliks ook op alle bekende potgooi-platforms luister.  Vir meer inligting: https://ronellbezuidenhout.buzzsprout.com/


    MUSIEK:  Paslik kyk ons op Dag 30 van #Brandpunt na Stefan Ebersohn se musiekvideo van “Kom, o Skepper Gees”.   Stefan, wat ’n musiekstudio bedryf in Polokwane, het verskeie ander verwerkings wat op YouTube en ander stromingsplatforms geluister kan word. 

    https://youtu.be/UIhb9eyEHHY




     

    • 3 min
    Dag 29 van Meditasie-reeks #Brandpunt

    Dag 29 van Meditasie-reeks #Brandpunt

    In “Spirit at Work” skryf Craig Keener, “Stel jouself voor jy besoek 'n dorp in die nag waar geen ligte skyn nie, geen televisies speel nie, of geen ander kragtoestelle werk nie.  (Klink bekend, nè…) Maar, stel jouself voor dat jy ontdek dat die dorp nie ‘n probleem met kragopwekking het nie.  Dit is bloot dat niemand in die dorp daaraan dink om hulle elektriese toebehore te gebruik nie.  Alles is beskikbaar, maar almal sit in die donker.  Jy sal net jou kop skud!  Soveel keer funksioneer die Kerk soos daardie dorp.  God het aan ons die kragtige werking van Sy Gees gegee, sodat ons ons roeping in die wêreld kan vervul, maar hoeveel van ons maak werklik van God se krag gebruik?”   

    Dit is waar, jy kan net daarvan gebruik maak as jy daarvan kennis dra.  Maar juis te meer – ons doen!  Dit is nie dat ons ons roeping moet volvoer vanuit ons eie krag nie!  Nee, soos Paulus herinner:  “Die krag van Christus kom juis tot volle werking wanneer ons swak is”  (2 Kor 12:9-10).   Maar luister net hoe getuig Paulus, “Ek sal dit nie waag om oor iets anders te praat as oor wat Christus deur my tot stand gebring het om heidennasies aan God gehoorsaam te maak nie. Dit het Hy deur my gedoen met woord en daad, deur kragtige tekens en wonders, in die krag van die Gees van God” (Rom 15:18-19).

    Daar is werklik geen beproewing of uitdaging te sterk om ons roeping as gelowiges uit te leef nie!  Soos Paulus ons herinner, “(Ons) is tot alles in staat deur Hom wat ons krag gee” (Fil 4:13).  En God, wat die “bron van hoop” is, sal jou met al die vreugde en vrede vul, deur jou geloof, “sodat jou hoop al hoe sterker kan word deur die krag van die Heilige Gees” (Rom 15:13).

    GEBED:  U is my bron van hoop!  Dankie dat U Gees my sterk en getrou maak.

    KUNS-INSPIRASIE: Christus in die woestyn, 1939 (Olie op Doek), deur Gustave Van de Woestijne.  Gustave was 'n Belgiese ekspressionistiese skilder. Hy behoort aan die sogenaamde "First Group of Latem", 'n groep kunstenaars wat in die landelike dorpie Sint-Martens-Latem aan die oewer van die Lys, naby Gent, gewerk het. Hy was die broer van die Vlaamse digter Karel Van de Woestijne.

    POTGOOIE: Jy kan die dagstukkies van die #Brandpunt-reeks daagliks ook op alle bekende potgooi-platforms luister.  Vir meer inligting: https://ronellbezuidenhout.buzzsprout.com/

    MUSIEK:   Op Dag 29 van #Brandpunt kyk ons na die liriek-video van Jesus Culture se lied “Holy Spirit”.

    Uit die liriek:

    I've tasted and seen
    Of the sweetest of Loves
    Where my heart becomes free
    And my shame is undone
    In Your Presence Lord
    Holy Spirit You are welcome here
    Come flood this place and fill the atmosphere
    Your Glory God is what our hearts long for
    To be overcome by Your Presence Lord


    https://youtu.be/qNwnOfZ5N8A

    • 3 min
    Hallo. Ek is Ronell Bezuidenhout.

    Hallo. Ek is Ronell Bezuidenhout.

    Hallo, ek is Ronell Bezuidenhout.  Ek het 'n digitale internetbediening en soms vra mense wat maak my skryfwerk uniek aan myself.  Of anders gevra, wat kan hulle verwag?


    • Ek bly weg van maklike antwoorde; die snykant van die lewe het my self al te diep getref om te weet maklike antwoorde help ons nie.
    • Ek is 'n opgeleide teoloog wat my lewe daaraan wy om verantwoordelik met die Bybel te probeer omgaan. Gelyktydig weet ek ook, selfs teoloë word deur die Heilige Gees verras; daar is altyd iets nuuts om te leer.
    • Ek skryf vir mense wat "dieper" wil nadink as net die oppervlakige.  My gehoor is self mense wat al bietjie deur die meule van die lewe gegaan het.  Ek skryf dus nie oor die metaforiese "vitamines-vir-die-siel" nie.  Dalk skryf ek maar vir myself, oor dit wat ek self meer van wil weet, of wat ek moet leer.

    Terloops, my internetbediening is gratis.  Dit word deur vrywillige donasies moontlik gemaak.   
     
    Lees meer oor hierdie maand se reeks en registreer by: https://ronellbezuidenhout.co.za/weeswys

    • 2 min
    Dag 28 van Meditasie-reeks #Brandpunt

    Dag 28 van Meditasie-reeks #Brandpunt

    Daar is nog soveel om oor die Heilige Gees na te dink.  (Ons het nog nie eers oor die rol van die Heilige Gees in die Ou Testament gesels nie…)  Maar, laat ons steeds by Paulus stilstaan.  Aan die gemeente van Efese skryf Paulus:  “Die Heilige Gees is die waarborg dat ons ook verder sal ontvang wat God belowe het, wanneer Hy almal wat aan Hom behoort, volkome sal verlos” (Ef 1:14).  Soortgelyke woorde skryf Paulus ook in 2 Kor 1:21-22, ”God het ons vir Hom afgesonder, ons as sy eiendom beseël en die Heilige Gees in ons harte gegee as waarborg van wat ons nog sal ontvang.”

    Hierdie woorde oor die identiteit van die Heilige Gees as waarborg, laat my dink aan die liefdestaal in Hooglied 8:6, “Hou my teen jou soos die seëlring op jou bors, soos die seëlring aan jou arm. Die liefde is sterker as die dood… dit brand en vlam soos vuur.” Hierdie beskrywing van die Gees wat aan ons gegee is, is die liefdesverklaring van God wat Homself aan ons verbind met ‘n verloofring; wetend daar wag ‘n huwelik!   Nie goud nie, wel God se eie self wat as pand gegee word.  Net God kan verloor, sou God nie God se eie belofte gestand doen nie.  Om destyds ‘n deposito te betaal, het impliseer dat – as jy nie meer met die transaksie kon voortgaan nie – jy nie jou deposito kon terugeis nie.  Jou deposito was dus ‘n letterlike waarborg dat jy ernstig was oor jou transaksie.

    Presies dít is wie die Heilige Gees is:  die versekering dat jy die beloftes van God kan vertrou.  Nie net beloftes in hierdie lewe nie, maar ook in die lewe na die dood!  Jy het ‘n dubbele versekering:  Jesus en die Heilige Gees!  Daar is niks meer wat God kan gee as God self nie!

    GEBED:   Dankie dat U beloftes nie van my afhang nie, my God, maar van U self.

    KUNS-INSPIRASIE:  Hoofletter vir die “Lied van Salomo” die Winchester-katedraal.   Die inleidende  hoofletter tot die “Lied van Salomo” in 'n twaalfde-eeuse Latynse Bybel. Die Bybel is nou in die biblioteek van die Winchester-katedraal.

    POTGOOIE: Jy kan die dagstukkies van die #Brandpunt-reeks daagliks ook op alle bekende potgooi-platforms luister.  Vir meer inligting: https://ronellbezuidenhout.buzzsprout.com/

    MUSIEK:  Op Dag 28 van #Brandpunt kyk ons na ’n koor-uitvoering van “Set Me As A Seal Upon Your Heart” soos geskryf deur David Childs deur Deming High School Advanced Choir  en die  NMSU's University Singers. 

    Uit die liriek:

    Set me as a seal upon your heart,
    as a seal upon your arm.
    For love is as strong, for love is as strong as death,
    as strong as death.
    Many waters cannot quench love,
    neither can floods drown it.
    Many waters cannot quench love,
    floods cannot drown it.
    Waters cannot quench love,
    neither can the floods drown it.
    Set me as a seal upon your heart,
    as a seal upon your arm.
    For love, is as strong, for love is as strong as death.

    https://youtu.be/PcZbFShzs9M

    POTGOOIE: Jy kan die dagstukkies van die #Brandpunt-reeks daagliks ook op alle bekende potgooi-platforms luister.  Vir meer inligting: https://ronellbezuidenhout.buzzsprout.com/

    • 3 min

Top Podcasts In Religion & Spirituality

Ascension Catholic Faith Formation
D-Group
Christianity Today
Hank Smith & John Bytheway
Blaze Podcast Network
Joel Osteen