Tabakalera Hotsak Tabakalera

Tabakalera Hotsak seriean hamaika dira jorratu ditugun gaiak eta ezagutu ditugun pertsonak. Tabakaleratik igaro diren artisten, zinemagileen, musikarien eta ikerlarien lana ezagutu dugu, besteak beste. Baina denboraldia amaitzeko Tabakalerako publikoari erreparatu nahi izan diogu, zeuri alegia. Bertan egunero egoten den jendearen soinuak ekarri dizkizugu azken kapitulu honetan. 

Jantzi kaskoak eta adi!

Loiolako izkin batean du bere gotorlekua Juntura kooperatibak. Arkitektura eraikuntzetatik harago lantzen dute. Espazioa eta beren erabilerak jarriz jomugan. Orain Situakzioak ekimenean parte hartu dute Tabakaleran. Emma Kunzen arte garaikidea aitzakia gisa hartuta, haurrentzako lagunkoia eta inspiragarria izango den instalazio batekin. Miki Lamedica eta Nagore Goñi Junturako kideek azaldu digute beren lanaren berri. 

Bi garai, bi emakume eta bi artista izango dira atal honetako protagonistak. Emma Kunz eta Nora Aurrekoetxea. Kunzen obra erakusgai egoteaz gainera eta hainbat artista garaikide ere gonbidatu ditu Tabakalerak artista suitzarrarekin elkarrizketa moduko bat sortzeko. Tartean Nora Aurrekoetxea d**o, erakusketarako espreski 'Diva' obra eskultorikoa egin duena. Jone Alaitz Uriarte Tabakalerako arte garaikideko lantaldeko kideak azaldu digu ekimena. 

Harpidetu eta zabaldu lagun eta senide artean.

Euskal espazio programa, Euskal Herria Aerospace edo  plastikoak birrindu eta birtziklatzeko lantokia, edo elektronika eta 3D diseinu tailerra. Edozer izan daiteke Hirikilabs laborategia. Fab Lab deitzen zaie halako espazioei. Massachusetts-eko Teknologia Institutuan (MIT) 2001ean sortu zen adiera ingelerazko Fabrication Laboratory-ren akronimotik. Maker mugimenduaren galtzarbean sortu zen Tabakalerako espazio hau ere, eta Talde Irekiak ekimenaren baitan edonork parte hartu dezake bertan, edozer egin edo konpontzeko. Kapitulu honetan HIrikilabseko ateak zabalduko ditugu Ibai Zabaletaren eskutik.

Harpidetu eta zabaldu lagun artean. 

Oilategi batean ezin dira bi oilar baino gehiago egon. Baina txitoak jaiotzen direnean, haietarik batzuk arrak dira. Zer egin haiekin? Zer egin oilarrekin? Dilema hau du abiapuntu Maddi Barberri herriko emakume batek kontatuta zion istorioak. Zinemagileak kontakizuna 'Claros de bosque' filma sortzeko aitzakia gisa erabili du. NOKA emakumezko zinemagileentzako mentoring programan parte hartu du Barberrek eta Mar Coll zinemagilea izan du gidari eta laguntzaile sorkuntzaren bidean. Biekin hitz egin dugu kapitulu honetan. 

Harpidetu eta zabaldu lagun artean!

Mikel Laboaren 'Lekeitioak' lanaren berrinterpretazioa egin du  Garazi Navasek 'Komunikazio inkomunikazio'-ren programaren baitan.  Musikenen lizentziatu berri den akordeoilari egonezina da Navas, eta, nahiz eta oso gaztea izan, proiektu ugaritan hartu du parte (Bilboko Orkestra Sinfonikoarekin batera, adibidez), eta hainbat sari irabazi ditu. Beste arlo batzuetako artistekin elkarlanean aritu ohi da, poesia, antzerkia, dantza edota instalazio artistikoekin, besteak beste. Gaur egun, musika garaikidearen eta musika tradizionalaren arteko loturaren inguruan ikertzen dihardu, beti interpretazioaren aldetik. Gaurko kapituluan soinuaren, doinuaren eta zarataren arteko arrakaletan espeleologia egingo dugu. 

Harpidetu eta zabaldu lagun artean!