Kuma bɛ aw bolo RFI Mandenkan

San kelen kɔnɔ, Guinée donnatɛmɛfangaɲɛmaa ye politikitɔnw ka baaraw jateminɛko filanan dabɔ kunu araba.

Dɔgɔkun fila de bɛ politikitɔnw bolo sisan ka taa u  yɛrɛ lajɛya jamana kɔnɔnkow minisiriso la ni sɛbɛn dɔw ye.

Misali la u ka tɔnw lakodɔnisɛbɛn u kɔnɔ sariyaw ni tɔndenw lakodɔnsɛbɛn fɔ ka taa se u ka dagaw bɛɛ jamana marabolo minnu kɔnɔ

Sɛgɛsɛgɛli in siɲɛ sabanan ye nin ye kabini General Mamadi DOUMBOUYA nana fanga la. Aw ye mun faamu o ko la.Yala u b’a fɛ ka sira da politikitɔnw ɲɛ jamanaɲɛmaakalata nata de la u ni minnu tɛ ɲɔgɔn kanfɔ wa. 

 Guinée donnatɛmɛfangaɲɛmaa ka politikitɔnw ka baara jatiminɛli, o ye lasanuyali baara gwansan  ye wa?

France fangasina Marine Le Pen ka politikitɔn ka sebaaya sɔrɔ wasaden kalata nataw. O te ka politikimɔgɔw dɔrɔn jɔrɔ, ntolantanaw fana jɔrɔlendon.

Olu b'a la ka tɔn in ka hakilina gɛlenw kɛlɛ. Minnu ɲɛsilendon dunanw ma France jamana kɔnɔ.

France ntolantanaw Kylian MBAPPE, Ousmane DEMBELE, Marcus Thuram, wali Olivier Giroud fɔ ka taa se  jamana in tolantana ŋana kɔrɔ Thiery Henry ma.

A ɲɔgɔn be famu ka kɛ, ntolantanaw k'u sen don politikikow la. Yala aw y'o ko ye cogodi?

Jatiminɛw y'a jira ko Farafina gun kan, kɛmɛsara la an ka kungobaw 45 ɲɔgɔn de halakira k'a sababu kɛ hadamadenw ka kɛwalew ye ani waatiyɛlɛma kɔlɔlɔw ye. Kungojɛnni ani jiritigɛ, o be kɛ Farafina kojugu.

Yala mun be se ka o walew ɲɛkɔrɔtigɛ Manden?. Aw cayara k'aw hakilinaw ci an ma.

A ko gɛlɛyalen don jamana in marabaga kuraw ni kunnafonidiso dɔw ɲɛmɔgɔw cɛ, olu minnu dɔw ka sɔrɔw datugurura waribonw na, k'a sababu kɛ saalensarabaliya ye. Aw y'o ko ye cogo di? Yala kunnafonidisow man kan ka saalen (lanpo) sara wa u ka baara yɛrɛ jɛlenya kosɔn wa? Kuma bɛ aw bolo.

Wa, kuma kɛra fana Farafinna jamanakuntigi kɔrɔw kirili gɛlɛya k'a sɔrɔ u ka mara waati kasaratɔ tɔnw bɛ ka caya ka taga fɛ.