Europa Aktuell radio 100,7

Géintiwwer der presuméierter deloyaler Konkurrenz vu China versichen net nëmmen d'USA, mee och d'EU, sech ze wieren. Ob a wéi dat geléngt, kommentéiert den Olivier Hanrion vun der belscher RTBF.

Ee Strategiepabeier leet no, datt déi Europäesch Investitiounsbank d‘Entwécklung vu klengen Atomreakteren ënnerstëtze soll. E muss nach vun de Memberlänner guttgeheescht ginn. D‘Lëtzebuerger Positioun steet nach net fest, esou de Finanzministère.

An der Chambre des Salariés huet gëschter Owend de Ludovic Voet, e belsche Syndikalist vum Europäesche Gewerkschaftsbond, e Virtrag gehalen iwwer den europäesche Sockel vun de soziale Rechter. Ënner de Gäscht vun där gutt besichter Konferenz war z. B. d'Martine Deprez, Ministesch vun der Sécurité sociale.

Vu wéini u solle Kanner een Handy oder eng Tablett hunn? A Frankräich hat de President Emmanuel Macron den Avis vun Experten gefrot. D’Recommandatioune vun där Kommissioun si streng: Kanner sollten eréicht vun 3 Joer un vrun engem Ecran dierfe setzen, Handyen sollten eréicht vun engem Alter vun 11 Joer un erlaabt sinn, an dat an den éischte Joeren och ouni Accès op den Internet. Déi franséisch Regierung ass am gaangen iwwert entsrpiechend Gesetzer nozedenken a géif och gären eng Diskussioun op EU-Niveau doriwwer ustoussen.
Lëtzebuerg awer wëll bis op Weideres net op dee Wee vu Verbueter goen.

Jugendorganisatiounen a ganz Europa fuerderen, den Alter iwwerall an der EU op 16 Joer erofzesetzen. D’Decisioun awer läit bei de Memberlänner. An do bleift d’Approche ënnerschiddlech.

Zu Lëtzebuerg ass keng Ännerung geplangt, obschonn den Educatiounsminister dofir wier, den Alter erofzesetzen.

A Spuenien gouf gëscht an der Regioun Katalounien gewielt - ee Vott, deen och als Virschau op d'Europawalen an engem Mount ugesi gouf. Et ass fir d'éischte Kéier zanter 1980 datt d'Separatiste verluer hunn - an d'Sozialisten haut la main haute als Gewënner aus deene Walen erfir ginn. Explikatiounen vun eiser Korrespondentin Aurélie Chamerois.