Poterkëscht vum INLL Poterkëscht

Wëllkomm zréck an der Poterkëscht!

Haut héiere mir, wéi eng Persoun vun engem Rendez-vous (Date) erzielt (Niveau A2.1).

Vill Spaass beim Nolauschteren!

---

Transkript:

Ech erzielen iech mol eng witzeg Geschicht. Ech war de leschte Freideg op engem Date. Ech hunn den Typ op enger Dating-App kenne geléiert an ech wëll jo keen no sengem Ausgesi beurteelen, mee hien huet guer net esou ausgesi wéi op de Fotoen. Op de Fotoen hat hie schéi laang Hoer, hie war zimmlech sportlech an huet och grouss ausgesinn.  

Mir hunn eis um 19:30 bei engem Restaurant getraff a wéi ech hie scho vu Wäitem gesinn hunn, war ech schockéiert! Hien huet guer net esou ausgesi wéi op de Fotoen ... Hien hat eng Glatz a war méi kleng wéi ech! Mee ëmmerhi war e sportlech. Ech war wierklech rosen an enttäuscht, mee ech sot mer, dass e jo vläicht e gudde Charakter huet.  

Wéi mer bis am Restaurant souzen a geschwat hunn, ass mer direkt opgefall, dass hien immens sympathesch, intelligent a witzeg ass. Ech hunn deen Owend wierklech vill gelaacht.  

No eisem Owend hunn ech decidéiert, deem Ganzen nach eng Chance ze ginn a mir treffen eis d’nächst Woch, fir zesumme Schlittschong fueren ze goen. 

Wëllkomm zréck an der Poterkëscht!

Haut schwätze mir iwwer Vakanz. Fir d'éischt héiere mir en Dialog, wou eng Persoun um Telefon iwwer hir Vakanz schwätzt (Niveau A1). Duerno héiere mir eng Koppel, déi eng Vakanz plangt (Niveau A2.2).

Vill Spaass beim Nolauschteren!

---

Transkript

Dialog 1:

Mamm: Moie Philippe! An, wéi ass et an ärer Vakanz? 

Philippe: Super! Haut sinn et 30 Grad an d’Sonn schéngt. Ech gi geschwënn op d’Plage. A wéi ass d’Wieder doheem? 

Mamm: Net immens. Hei sinn et just 15 Grad an et reent schonn de ganzen Dag. 

Philippe: Dat ass awer schued. Hei um Mier ass d’Wieder perfekt.  

Mamm: Flott! Wat maacht dir dann nach esou dës Woch? 

Philippe: Den Owend gi mir an e Restaurant typesch Platen aus der Regioun iessen. Muer maachen ech e Surfcours an iwwermuer maache mir en Ausfluch an eng kleng Stad. Mir ginn e Schlass kucken an e bësse shoppen.  

Mamm: Dat kléngt flott! Kaf der Bomi e klenge Souvenir a schéck denger Tatta eng Postkaart, da freet si sech. 

Philippe: Jo, dat maachen ech. Wat méchs du dann dës Woch nach esou? 

Mamm: Haut maachen ech net vill. D’Wieder ass jo schlecht. Den Owend gëtt et och en Donnerwieder. Mee vu muer u gëtt d’Wieder erëm besser. Et ginn 20 Grad a Sonn. Ech schaffe mat dengem Papp am Gaart a mir fuere vläicht op d’Musel spadséieren. 

Philippe: Flott! Sou, Mamm, ech muss elo goen, d’Martine waart op mech. Bis geschwënn! 

Mamm: Äddi mäi Jong! 



Dialog 2:

Lena: Nik, wuer solle mer dëse Summer an d'Vakanz fueren? Nik: Ech hu guer keng Anung... Ech wëll awer gär de Lucky mathuelen, dat heescht, mir fuere mam Auto a bleiwen an Europa, gell?

Lena: Op alle Fall! Ok, dann nenn mer deng Top 3 Destinatiounen! Meng si Schweden, Dänemark an d'Provence.

Nik: Flott! Hmm...op der éischter Plaz ass Holland, op der zweeter Plaz d'Dolomiten an op der drëtter Plaz d'Schwäiz, mee deen Deel ëm Fribourg. Da kënne mer d'Florence besiche goen.

Lena: O, deng Iddie sinn awer och gutt! Wat wéilts de dann an Holland maachen?

Nik: Majo, virun allem kitesurfen. Ech hu viru Kuerzem an engem Video gesinn, datt een net just am Atlantik kitesurfe kann, mee och um IJsselmeer. Dat ass e risege Séi an Holland.

Lena: Cool! Ma dat kléngt jo perfekt! An op engem Séi kann een och nach vill aner Aktivitéite maachen, wéi schwamme goen, Kanu oder Kajak fueren, mat engem Boot fueren, op der Plage liesen, a sou weider.

Nik: Wéi laang solle mer da goen?

Lena: Mat der Hirees wëll ech awer 10 bis 14 Deeg goen. An ech wëll awer och verschidde Stied kucke goen an dir net 2 Woche laang beim Kitesurfen nokucken!

Nik: Natierlech! Soll ech mech dann ëm de Logement këmmeren an du méchs e Plang, wat een alles kucke goe kann?

Lena: Ok!

Nik: Léiwer Camping, Hotel oder en Appartement lounen?

Lena: Mmhh, e Campingcar oder eng Roulotte si mir ze kleng. En Hotel ass ze deier an Hënn sinn a vill Hotellen net erlaabt. Ech si fir en Appartement.

Nik: Gutt, da kucken ech emol, wat ech fannen.

Wëllkomm zréck an der Poterkëscht!

Haut héiere mir en Dialog, an deem eng Persoun iwwer de Programm vun hirem Konveniat schwätzt (Niveau A1-A2.1).

Vill Spaass beim Nolauschteren!

---

Transkript:

A: Denk drun, e Samschdeg ass mäin 20-Joer-Konveniat. Da sinn ech net heiheem. 

B: A jo! Wéi ass dann de Programm? 

A: De Rendez-vous ass um 10.30 bei der Schoul, mee et fänkt um 11 Auer un. Mir maachen eng Visite guidée vun der Schoul an duerno drénke mir e Patt zesummen. Um 12.30 ass dann en Iesse mat Buffet, mee d’Christine, d’Catherine an ech gi léiwer eng Pizza an eis Liblingspizzeria iessen. Sou wéi fréier! 

B: Flott! Wie kënnt dann nach? 

A: Aus menger Klass kommen nach d’Stéphanie, d’Charlotte, d’Mandy, den Tom, den David an den Dan. An ech mengen och nach d’Lena, d’Lynn, de Christophe an de Gilles. 

B: Topp! Wat maache si dann elo? 

A: D’Stéphanie an den Dan si bestuet an hunn e Jong. D’Stéphanie ass Bioproff an den Dan ass Engleschproff. D’Charlotte huet zwee Kanner an ass de Moment am Congé de maternité. Hatt ass och Bioproff. D’Mandy schafft als Model an als Fotografin. Hmm....den Tom ass Affekot...an den David ass de Manager vun engem Betrib. D’Lena...ass Architektin, ... d’Lynn ass Chirurgin, ... de Christophe ... ass Pilot. 

B: An de Gilles?  

A: Ech weess et net. Hien ass net op de soziale Medien.  

B: Aha! Hues de deng Informatiounen all vun do?  

A: Ma nee! Mat e puer sinn ech och perséinlech a Kontakt! 

B: Kënnt d’Marie och? 

A: Nee, hatt wunnt an Australien an huet keng Zäit ze kommen. 

B: Schued! 

A: Jo... 

B: Kommen och Proffe vun der? 

A: Ech hoffen, et kommen der e puer. Mir hunn eis zënter 10 Joer net gesinn. Ech freeë mech schonn drop!  

Wëllkomm zréck an der Poterkëscht!

Haut lauschtere mir zwou Persounen no, déi iwwer hiren Dag vu gëschter schwätzen. (Niveau A2.1-A2.2)

Vill Spaass beim Nolauschteren!

---

Tranksript:

Laure: Moien Alex! An, wéi war däin Dag gëschter? 

Alex: Salut! Gutt. Ech si géint néng Auer opgestanen an hu mer direkt eng Taass Kaffi gemaach. Du sinn ech eng Véierelstonn mam Hond trëppele gaang an duerno hunn ech nach eng Stonn Yoga gemaach. 

Laure: Wow, dat kléngt no engem relaxe Moien. Ech si jalous! Ech hu bis siwen Auer geschlof an hu mech du séier gewäsch an ugedoen. Um hallwer aacht hunn ech de Bus geholl a sinn op d’Aarbecht gefuer. 

Alex: Seriö? Du hues e Samschdeg geschafft? Dat ass awer blöd! D’Wieder war jo esou gutt. Hues du dann no der Aarbecht nach eppes Flottes gemaach? 

Laure: Jo, ech hu just bis eng Auer geschafft. Eis Epicerie ass samschdes nëmme moies op. Duerno hunn ech mech mat e puer Frënn an der Stad getraff. Mir hunn eppes op enger Terrass gedronk a sinn duerno nach e bëssen an d’Butteker gaangen. Ech hu mir an engem Kleederbuttek eng flott nei Posch kaf. A wat hues du mëttes gemaach? 

Alex: Cool! Ech sinn nom Mëttegiessen an de Park gaangen an hunn do e bëssen op enger Bänk gelies. Duerno sinn ech nach séier e puer Saachen an de Supermarché kafe gaangen. Owes hunn ech e puer Frënn fir ze grillen invitéiert. A wéi war däin Owend? 

Laure: Flott! Ech hu mir eppes z’iesse bestallt an hu gemittlech e Film op der Tëlee gekuckt. Ech war immens midd a sinn um zéng Auer um Kannapee ageschlof! 

Alex: Dat ass mir och scho geschitt! Bass du dann haut de Moien och um Kannapee erwächt? 

Laure: Nee, ech sinn an der Nuecht erwächt. D’Tëlee war jo nach un! Ech hu se ausgemaach a si séier a mäi Bett gaangen. Mee so, d’nächst Kéier muss de mech awer och invitéieren, wann s de eng Grillparty méchs! 

Alex: Natierlech. D’nächst Woch ass e Feierdag, do hat ech souwisou geplangt, e puer Frënn bei mech heem z’invitéieren. Du kanns gär kommen! 

Laure: Cool! Do hunn ech och fräi. Dat klappt. Merci fir d’Invitatioun! 

Alex: Gär geschitt. Bis dann! 

Wëllkomm zréck an der Poterkëscht!

Haut lauschtere mir zwee Dialoger iwwer d'Gesondheet (Niveau A2.2).

Eventuell sinn e puer interessant Rotschléi fir iech dobäi.

Vill Spaass beim Nolauschteren!

---

Transkript

Dialog 1

Luca : Moie Melanie, wéi geet et ? 

Melanie : O, net esou gutt. Ech mengen, ech hu mech erëm erkaalt. 

Luca : O nee, dat deet mer leed. Waars de scho beim Dokter ? 

Melanie : Nee, nach net. Ech hu just e puer Pastille fir den Hals geholl. 

Luca : Dat ass jo scho gutt. Drénks de och genuch ? 

Melanie : Jo, ech hunn haut schonn zwou Tasen Téi mat Hunneg, Zitroun an Ingwer gedronk. Ech probéieren och ëmmer, zwee Liter Waasser ze drénken. 

Luca : Du solls och oppassen, datt s de genuch Vitamminen anhëls. Ëss de genuch Uebst a Geméis ? 

Melanie : Ech menge jo. Mee ech war d’lescht Woch an der Vakanz a mir hu vill am Restaurant giess. Dat war dunn net esou einfach. 

Luca : A, da kann et och sinn, datt se dir do eppes agefaang hues.  

Melanie : Jo, mir sinn och mam Fliger geflunn an d’Klimaanlag huet déi ganzen Zäit kal op mech geblosen … 

Luca : Ma da wonnert et mech net, datt s du elo den Hals wéi hues ! Ech huelen ëmmer en décke Pullover mat an de Fliger.  

Melanie : Doru muss ech d’nächst Kéier denken. Ech si just genervt, well ech iwwermuer mäin Orall am Italieeneschcours hunn a fit well sinn. Hues du nach e puer Tipps fir mech, wéi ech séier nees gesond ginn ? 

Luca : Jo, et ginn e puer Saachen, déi s du déi nächst Deeg maache kanns. Pass op, datt s de genuch schléifs, et sollen op d’mannst 8 Stonne sinn. Du däerfs dech och elo net ze vill stressen. Bleif eventuell en Dag doheem an erhuel dech. A kach eng gutt Zopp, dat hëlleft bal ëmmer. 

Melanie : Merci, ech wäert mer deng Rotschléi zu Häerz huelen. 

Luca : Gär. Wann et der iwwermuer net besser geet, da géif ech awer bei den Dokter goen. 



Dialog 2:

Olivier: Moien! Wéi geet et? 

Jessy: O, net immens. Ech sinn an der lescht oft midd an net a Form. 

Olivier: Dat deet mer leed. Méchs du Sport? Vläicht géing et der hëllefen, wann s de méi oft eraus an déi frëscht Loft gees.  

Jessy: Hmm... vläicht. De Moment maachen ech guer kee Sport. Ech hunn net vill Zäit mat der Aarbecht. 

Olivier: Du kéints probéieren, e puer mol d’Woch spadséieren ze goen. Du muss jo net direkt all Dag eng Stonn an de Fitness goen, mee schon zwanzeg Minutten dobaussen an der Mëttespaus kënnen hëllefen. 

Jessy: Dat ass eng gutt Iddi. Virun allem déi Deeg, wou ech am Home Office sinn. Do sinn ech e bësse méi flexibel a kéint effektiv en Tour duerch de Park maachen. 

Olivier: Gesäis de! Oder du gees moies e Stéck zu Fouss op d’Aarbecht oder du fiers mam Vëlo. Dat geet jo an dëser Joreszäit gutt, well et moies fréi hell gëtt an et net esou kal wéi am Wanter ass. 

Jessy: Dat stëmmt. Mee ech hu kee Vëlo ... 

Olivier: Et ass bestëmmt eng Veloh-Statioun an dengem Quartier! 

Jessy: Dat ka sinn. Ech muss mech emol informéieren. Mee ech mengen, ech muss och eppes u menger Ernärung änneren. An der lescht iessen ech net immens gesond ... 

Olivier: Da probéier, einfach e bësse méi Uebst a Geméis z’iessen, a manner Zocker, Fett an Alkohol zou dir ze huelen. Du muss keen extreeme Regimm halen, fir dech gesond z’ernären! 

Jessy: Jo, do hues de Recht. Ech mengen, ech muss mir einfach emol méi Zäit fir mech huelen, a vläicht manner schaffen. 

Olivier: Dat ka gutt sinn! Wann s de wëlls, gi mer de Weekend bei mech an de Bësch trëppelen. D’Wieder soll gutt ginn!  

Jessy: O jo, komm mir maachen dat! 

Wëllkomm zréck an der Poterkëscht!

An der Episod vun haut héiere mir, wat en Doktorand a sengem Alldag mécht. Duerno erzielt d'Mara eppes iwwer säin Hobby, Salsa danzen.

Vill Spaass beim Nolauschteren!

---

Dagesoflaf vun engem Doktorand

Ech stinn normalerweis moies géint sechs Auer op. Ech drénke séier e Kaffi, maache mech fäerdeg a fueren da mam Bus an den INLL. Ech gi véier Mol d’Woch um siwen Auer moies an e Lëtzebuergeschcours. De Cours ass um aacht Auer eriwwer. Dann huelen ech den Tram a fueren op d’Uni. Heiansdo huelen ech och e Vëlo. Moies halen ech oft Virliesungen oder Seminairen. Géint zwielef ginn ech an d’Kantin vun der Uni oder ech brénge mir eppes vun doheem mat. Nomëttes schaffen ech meeschtens an der Bibliothéik. Ech liesen Artikelen a schaffen u mengem Fuerschungsprojet. Heiansdo treffen ech mech och mat mengem Proff, fir iwwer mäi Progrès ze schwätzen an e puer Rotschléi ze kréien. Oft muss ech och Aarbechte vun anere Studente verbesseren. Um sechs Auer fueren ech normalerweis erëm heem. Dann hunn ech endlech e bësse Fräizäit: ech gi spadséieren, maache Sport oder treffe mech mat Frënn. Owes schaffen ech awer och nach e bëssen u menger Thees oder léiere fir mäi Lëtzebuergeschcours. Heiansdo kucken ech duerno nach e Film oder eng Serie, oder ech liesen e Buch. Ech gi spéitstens um zéng Auer schlofen, fir erëm fit fir den nächsten Dag ze sinn. 

---

Hobby: Salsa

Ech gi säit zwee Joer an en Danzcours, an zwar, an d’Salsa. Et gëtt verschidden Zorte vu Salsa, wéi zum Beispill déi puerto-ricanesch Salsa an déi kubanesch Salsa. Ech danzen déi kubanesch Salsa.  

Eemol d’Woch ginn ech a mäi Cours, an deem ech déi verschidde Schrëtt léieren. Weekends ginn oft verschidden Danzowenter organiséiert, wou ech dann dat, wat ech geléiert hunn, nach e bëssen trainéiere kann.  

Wat ech wierklech cool fannen, ass, dass ee keng speziell Kleeder oder Schong brauch, fir kubanesch Salsa ze danzen. Et brauch ee just e bësse Motivatioun a lass geet et.  

Am Cours léieren ech net nëmmen danzen, mee ech léieren och dat eent oder dat anert spuenescht Wuert. Virun allem hunn ech interessant Leit kenne geléiert. De Cours gëtt an enger Brasserie organiséiert an do kann ee virum oder nom Cours eppes drénken a mat de Leit schwätzen. Heiansdo iessen ech och eppes an der Brasserie, well et kritt ee ganz lecker kubanesch Spezialitéiten.