Midnight Rant Syed Ashhad
-
- Kunst
Recitations of poetry from my Instagram page. All content posted is original. https://instagram.com/midnight_rant?igshid=iugdi44fjrm4
-
Mai.n
A supposedly improved attempt at writing and reciting a Ghazal. Attempt is the driving word here. Duniya ke liye sahib-e-shakhsiyat hoon main
Khud ke liye bas tumhara intezar hoon main
Mere qareeb ab koi aashna, koi baam-o-deewar nahi
Apni barbadiyon ka khud hi sipah-salaar hoon main
Mashvira ye hai ki jitni jaldi ho sake, qula kar loon main
Khud apne takhayuul se aazad hone ko beqarar hoon main
Yun to na hua ki itna chup raha hoon kabhi main
Haan par ab sunne walo'n se zara hoshiyar hoon main
Koi dekhe to zinda-dili ka aabshaar hoon main
Koi haal poochhe to naala-e-dil-fighar hoon main
Teri furqat mein jo raatein bita di hain maine,
Teri aagosh mein ho kar bhi unka talabgar hoon main
Maine kab ke tark kar diye the ishq ke saare muqaam
Haan par is pur-ummeed dil ke aage be-ikhtiyar hoon main
Bohat gehri jadd'ein hain meri, mujhe chhedne ka phir soch lo
Tum agar fusun-o-khiza'n ho to kaif-o-bahar hoon main
Bichhadte waqt usne kaha tha Ishq jaavedani hai
Uska maan rakhne ke liye uske baad ka sab bhoolne ko tayyar hoon main -
Babbbar
This is a very short story about a cat that a friend of mine had and a funny incident that happened with him
-
Hum log 🔥
Raat kaali thi to raat bhar jaagte rahe hum
Diye apne khoon se jalate rahe hum
Dil-e-afsurda ko sanwaarte rahe hum
Akhuvat ke, ek-dili ke geet gaate rahe hum
Unke har chot ko sehlaate rahe hum
Marham apne wajood ka lagate rahe hum
Aansu pochhte, cheekho'n ko behlate rahe hum
Sadak par bikhre hausle uthaate rahe hum
Mumkin tha behekna to hoshiyar rahe hum
Maathe par haunsle taake tayyar rahe hum
Munafiq na ho jaayein so bedaar rahe hum
Na-munsib tha jhukna so yun he bezaar rahe hum
Apne tooti phooti khushiyon mein shaad rahenge hum
afsurdagi mein bhi be-dar-o-baam aabad rahenge hum
Sitam-gar ki bediyo mein bhi tab-e-aazad rahenge hum
Tumhari humari zindagi to faani hai, taareekh mein be-miad rahenge hum -
Chai aur tum ❤️
Bohat din hue tumhare saath chai nahi pi
Baith ke baatein nahi ki, ithlaaye bhi nahi.
Tum aur tumhari elaichi jaisi taza-tareen baatein
Main aur Mera adrak se meethe talkh tanz
Mein har baar tumhe dekhta hoon
Aur ram jaata hoon tumhari adakari mein
Kaise aur kab kis baat ko josh ke ubaal se bolna hai
Aur kaise kab bas halke halke muskura kar khaulana
Mera kabhi chai na peene ka guroor bhi to
Tumhari sohbat ki talab ne he toda tha
Ab har dafa chai ki chuski le kar hansi aati hai
Shayad mujhe tumse pyaar tabhi ho gaya tha
Khair ab aao mil bhi lo,
chai peeni hai tumhare saath
Tum har baar ki tarah apne saare qisse sunana
Main ghoonth dar ghoonth Aankho se ye nazm kahunga -
Safar
Meri aankho ki veeraniya'n na dekh, mujhe bezaar na jaan
Mere maathe ki lakeeron ko dekh, mere safar ko pehchaan -
Roshna
maine tumhari kayi alhad angdaiyo'n ko
apne khwabo'n ke saahil par umadte dekha hai
Meri siyah zindagi ki raushna maine tumhe,
Chaandni raaton mein jugnu'on se ladte dekha hai
Bohat mamooli ada hai palk'on ka uthana aur gir jaana
Is saadgi mein bhi maine dono jahaano'n ko bante bigadte dekha hai