Superando a ficción Radio Galega

Unha parella de espías rusos vive camuflada na sociedade norteamericana. Unha familia idílica formada por un matrimonio con dous fillos. Durante anos ocultaron a súa verdadeira identidade e enganaron a todo o mundo, incluídos os seus propios fillos.

Foron mulleres pioneiras, empresarias e creadoras dos cosméticos e artigos de maquillaxe que seguimos usando hoxe en día. Levaron vidas paralelas, pero tamén foron inimigas íntimas. Eran Elizabeth Arden e Helena Rubinstein.

Segundo dixo dela Joaquín Sabina, “era tan pobre que non tiña máis que diñeiro”. Unha serie de desgrazas fixeron que herdase unha fortuna e converteuse na muller máis rica do mundo. Pero os cartos non puideron acabar coa maldición que a acompañou toda a vida. Era Cristina Onassis.

Con 60 anos, cando parecía que xa fixera todo na súa carreira como actriz, apareceu unha serie de televisión co papel da súa vida. Esa mesma serie serviu para homenaxear unha muller real: unha anciá afeccionada a resolver crimes. Eran Angela Lansbury e Frances Glessner.

Igual que na obra de Lorca, esta historia transcorre nun mundo no que unha muller que non ten fillos non ten valor. A protagonista deste capítulo foi rexeitada polo seu amor e polo seu país por ser estéril. Era Soraia, a princesa dos ollos tristes.

Unha xornalista estadounidense no século XIX e un escritor monárquico na España franquista. Que teñen en común? Os dous finxiron estar tolos para vivir a experiencia de ingresar nun sanatorio mental. Eran Nellie Bly e Torcuato Luca de Tena.