លោកស្រី ឆន សុគន្ធា៖ ៩១ភាគរយនៃអ្នកសារព័ត៌មានដែលផ្តល់មតិ ពួកគេបារម្ភអំពីសុវត្ថិភាព

របាយការណ៍​ស្ទង់​មតិ​មួយ​ បាន​រក​ឃើញ​ថា​ ៩១​ភាគរយនៃ​អ្នក​សារ​ព័ត៌មាន​ដែល​បាន​ចូល​រួម​ស្ទង់​មតិ​ បាន​ឆ្លើយ​ថា​ពួកគេ​ព្រួយ​បារម្ភ​អំពី​សុវត្ថិភាព​អាយុ​ជីវិត​ នៅពេល​បំពេញ​វិជ្ជាជីវៈ​ជា​អ្នក​សារ​ព័ត៌​មាន​ឯករាជ្យ​នៅកម្ពុជា​ ហើយ​៤៤​ភាគរយ​បាន​អះអាងថា ធ្លាប់​ជួប​បញ្ហា​សុវត្ថិភាព​ ក្នុង​ឆ្នាំ២០២៤​។​ ក្នុង​បទ​សម្ភាស​ជា​មួយ​វិទ្យុ​បារាំង​អន្តរ​ជាតិ​ RFI​ នៅ​ថ្ងៃទី​១​ខែ​កក្កដា​នេះ ​លោកស្រី ឆន សុគន្ធា នាយិកា​នៃ​មជ្ឈ​មណ្ឌល​កម្ពុជា ដើម្បី​ប្រព័ន្ធ​ផ្សព្វ​ផ្សាយ​ឯក​រាជ្យ​(CCIM)​ បាន​ថ្លែងថា​ ការ​ស្ទង់​មតិនេះ​ ដើម្បី​ចង់ដឹងថា ​តើ​អ្នកសារ​ព័ត៌​មាន​ដែល​រាយការណ៍​ពី​រឿង​រសើបៗ ​មាន​បញ្ហា​ប្រឈម​អ្វី​ខ្លះ ​ក្នុង​ន័យ​ឲ្យ​ភាគី​ពាក់​ព័ន្ធ​ជួយ​រក​ដំ​ណោះ​ស្រាយ​។