【智人：最八卦嘅靈長類】簡述始於七萬年前嘅認知革命；三個理論，說明智人語言嘅獨特之處丨生活雜談EP38丨《人類大歷史》（3）丨哈拉瑞史觀4.1

我哋喺《人類大歷史》嘅第一章提到，雖然智人一早喺十五萬年前就已經出現咗喺東非，但係一直要去到大約七萬年前，智人先開始大規模咁樣遷徙到其他地區，而咁啱得咁蹺，其他人種就開始慢慢滅絕。 其實，喺幾萬年前，呢啲遠古嘅智人嘅外表已經同我哋非常之神似，大腦容量亦都差唔多，但係佢哋相比起其他人種，睇唔到有啲乜嘢特別嘅優勢，亦都無乜嘢犀利嘅工具，喺人種之間，表現平平無奇。 甚至，喺十萬年前，有幾班智人已經率先離開東非，向北遷徙到地中海嘅東部，踏入到尼安德洛塔人嘅領域，但係冇幾耐之後，佢哋就定居唔到落去。呢一班智人失敗嘅原因，冇人能夠確知，可能係因為當地人太過強大、亦都可能因為當地嘅氣候過於寒冷、又或者適應唔到當地嘅寄生蟲。無論原因係乜嘢，我哋都能夠知道，喺七萬年前嘅大遷徙之前，智人一早已經嘗試過遷移，只係失敗告終，而尼安德塔人仍然係中東嘅霸主。 正正係因為智人嘅表現睇落唔係咁好，所以有一啲學者推測，呢一啲智人嘅大腦內部結構仍然同我哋好唔同。即係size上係差唔多，但係認知能力（學習、記憶、溝通）仍然好受限，而你可能同唔到呢啲遠古智人溝通，因為佢哋未必學得識廣東話、接受馬克思主義嘅教條、明白演化論。 「（不過，就算是我們想要學習他們的語言、理解他們的思維方式，可能也同樣困難無比。）」 但係呢支歌仔，去到七萬年前左右就唔同晒。因為呢一次智人係離開東非第唔知幾次行動，總之呢次，智人將尼安德塔人同其他人類物種趕出中東（後嚟仲趕出地球）。冇幾耐之後，智人嘅領地就去到歐洲同埋東亞，喺大約四萬五千年前，佢哋跨過海洋，抵達從來冇人類居住嘅澳洲大陸。 喺七萬年前到三萬年前之間，智人發明咗船、油燈、弓箭、針（可以織布）。 「而且，第一項確實能稱為藝術或珠寶的物品，正是出現在這段期間；同時，也有了確切的證據，證明已經出現宗教、商業和社會分層。」 以上嘅成就係點解能夠得以發生？大部份研究人員相信，咁係因為智人嘅認知能力有咗革命性嘅進展。而喺七萬年前之後嘅智人，亦即係嗰班令尼安德塔人滅絕、移居澳洲、雕出施泰德獅人雕像嘅智人，已經同你我同樣聰明、有創意、反應靈敏。照道理，如果我哋遇到呢班人，應該可以學識彼此嘅語言，亦都可以溝通、交流彼此嘅知識。 呢段七萬年前到三萬年前嘅時間段，哈拉瑞稱之為「認知革命」。 今集內容包括以下部分： 第一部分，認知革命，我哋會睇下三個理論點樣講述人類語言嘅特點——我哋會睇下綠猴觀察、八卦同虛構故事。 第二部分，自然門檻：靈活黑猩猩，簡述黑猩猩嘅社會係點樣運作，以此對比出智人嘅合作係幾咁靈活。 第三部分，八卦門檻，第一個部分講到八卦幾有用，但係八卦都係佢嘅限制……