西哲幼稚園EP15丨尼采哲學簡介1丨叔本華：世界只有盲目嘅意志，以及虛假嘅表象。尼采：你係唔係講緊阿波羅同戴歐尼索士？——從叔本華思想，到比叔本華更悲觀嘅希臘神話丨Peter Kail, ”Si

試想像一個世界，佢充斥住無盡嘅慾望同痛苦，好似一個巨大嘅舞台，而人就係台上嘅木偶，被一股神秘嘅力量操控住，但係我哋竟然懵然不知—— 叔本華就係咁樣睇世界，佢認為世界被「意志」操控，注定走向悲觀。 喺佢嘅代表作《意志和觀念的世界》入面，叔本華將世界分為「意志」同「表象」兩個層次。 佢認為，我哋用感官所認識嘅世界，只不過係「意志」嘅客觀化，好似鏡花水月，虛幻不實。 人不斷追求慾望嘅滿足，種種滿足只係暫時，最終都係徒勞無功。 尼采本來被呢種悲觀所深深打動，其後，佢喺叔本華嘅悲觀哲學，以及希臘悲劇當中穿梭，結果，佢喺希臘悲劇搵到希望嘅曙光，寫出《悲劇的誕生》。 我哋可以從尼采嘅再版當中，見到尼采對自己嘅睇法充滿住唔自信同搖擺。即使尼采唔太滿意自己嘅作品，但《悲劇的誕生》依然改寫咗西方哲學界對於古希臘思想嘅睇法，譚家哲喺講到尼采嘅時候提到：「《悲劇之誕生》其重要性不僅為尼采自身思想之源頭 ，更是在西方思想中，唯一對西方文明源起嘗試作解釋之反省。」（譚，頁782） 所以，尼采喺回應叔本華嘅同時，就對西方文明作出起源式嘅反思。佢借用希臘神話入面嘅太陽神阿波羅同酒神戴歐尼索斯，重新演繹叔本華嘅「表象」同「意志」。 尼采相信，人類可以透過藝術嘅力量，喺悲劇之中領悟生命嘅意義，最終戰勝叔本華式嘅悲觀主義。 我哋會用兩集嘅時間，嘗試回答： 1. 究竟叔本華點解會形成咁悲觀嘅世界觀？ 2. 尼采又係點樣喺悲觀之中搵到希望？ 今集會作為背景。 喺第一部分〈意志哲學(續）：悲觀叔本華〉，我哋會詳細少少講下叔本華點理解意志同表象。講下叔本華點繼承康德，成為一個觀念論者，同時嘗試超出康德。然後，我哋會睇下叔本華哲學同印度哲學嘅關係。從生物（包括人類）嘅生理結構，了解咩係「求生的意志」（Will to Live）。 喺第二部分〈阿波羅與戴歐尼索士之精神〉，我哋會睇最悲觀嘅希臘故事，以及用阿波羅、戴歐尼索士對應叔本華嘅意志同表象。 等我哋一齊踏上呢趟哲學探索之旅，解開叔本華同尼采思想交織嘅秘密！ 建議聽咗康德集數再聽呢集 音樂來源： P C III- Snow Ticket (creative commons instrumental) https://soundcloud.com/pipe-choir-2/p-c-iii-snow-ticket-creative-commons-instrumental P C III - The Family Breaks (Creative Commons Instrumental) https://soundcloud.com/pipe-choir-2/p-c-iii-the-family-breaks-creative-commons-instrumental