【簡述智人稱霸之路】智人老表去晒邊？——「很有可能，當智人碰上尼安德塔人的時候，就發生了史上第一次、也是最嚴重的一次種族淨化運動。」丨生活雜談EP36丨《人類大歷史》（2）丨

過去幾百萬年，人類都會獵食小動物，採集啲搵到嘅食物，但同時又會被大型食肉動物獵殺，穩坐喺食物鏈中間嘅位置，直到大約四十萬年前先有所變化，某啲人種先有實力固定獵殺大型獵物；到十萬年前智人崛起，人類先一躍成為食物鏈頂端。 呢場由中段到頂端嘅大躍進，影響之大，可謂翻天覆地。其他食物鏈頂端嘅動物，例如獅子同鯊魚，要用幾百萬年嘅演化，先可以爬到頂峰。於是生態系統有足夠時間發展出制衡機制，避免獅子同鯊魚搞亂晒個場：獅子越強——瞪羚跑得越快，鬣狗更識合作，犀牛脾氣越臭。 但人類呢？從演化嘅時間觀睇嚟，佢轉眼間就登咗頂，唔單止生態系措手不及，連人類自己都唔知點算。過去食物鏈頂端嘅食肉動物，總係威風凜凜，幾百萬年嘅統治令佢哋充滿自信。但智人就好似香蕉共和國嘅獨裁者，喺無耐之前，仲係大草原上嘅兜踎存在，成日充滿恐懼同焦慮。正所謂，一朝得志，就語無倫次，人類登上霸主之位，亦都有類似情況。 「一朝躍居上位，不免倍加殘酷和危險。人類歷史上眾多的災難，不論是生靈塗炭的戰亂、或是生態遭逢的浩劫，其實都是源自於這場過於倉促的地位躍遷。」 今集內容包括： 石器之用：「遠古人類」並唔係用石頭嚟獵殺動物，而係用嚟「執人口水尾」…… 廚師人種：火除咗可以保護人類、喺黑夜中給予光明，仲改變咗人類嘅身體結構 兩種理論：尼安德塔人嘅消失，有兩套主流理論，一套係「混種繁衍理論」（interbreeding theory），另一套係「替代理論」（replacement theory），到底係咩意思？ 理論後果：透過2010年底發表嘅尼安德塔人基因組定序嘅研究結果，引起學界嘅大地震，我哋會以此檢視兩種理論正確與否 孤獨反思：依家，智人係地球上唯一仲生存緊嘅人種，我哋可以從中思考啲咩呢？ 依家，我哋就慢慢睇下呢個登位之旅係點樣發生。