(General News) တိတ်းယိၼ်ႉၵဵမ်းဢွၼ်ႊလၢႆႊ ႁဵတ်းႁႂ်ႈ ၾိင်ႈယၢမ်ႈလူႉ သုမ်းငိုၼ်း ၵွတ်းၽၢၼ်

တိတ်းယိၼ်ႉၵဵမ်းဢွၼ်ႊလၢႆႊ ႁဵတ်းႁႂ်ႈ ၾိင်ႈယၢမ်ႈလူႉ သုမ်းငိုၼ်း ၵွတ်းၽၢၼ်

ၽူႈတွႆႇႁွၵ်ႈ ၊ ၸၢႆးသႂ်ၸိုၼ်ႈမိူင်း

ၵဵမ်းတေႃႇလွင်းၸိူဝ်းၼႆႉ လူတ်ႇဢဝ်ၼႂ်း Application မိုဝ်းထိုဝ်လႆႈငၢႆႈငၢႆႈ။ ပၢင်တေႃႇလွင်းၵဵမ်းၸိူင်ႉႁိုဝ်ၵေႃႈမီး။ မိူၼ်ၼင်ႇ ပႃးၸဵမ် ၵဵမ်းတေႃႇၽၢႆႉ၊ ၵဵမ်းၸူၵ်းၶႅပ်းၸၢမ်းၵၢမ်ႇ ၊ ၵဵမ်းယိုဝ်းပႃ တႄႇၵႂႃႇၸိူဝ်းၼႆႉ မီးထႅင်ႈလၢႆလၢႆသႅၼ်း ။ ဢၼ်တေႃႇလွင်းလႆႈၼႂ်းဢွၼ်ႊလၢႆႊၼႆႉ ႁွင်ႉၵၼ်ဝႃႈ Casino Slots ႁိုဝ်ဢမ်ႇၼၼ် Slots game ။

ၵဵမ်းၸိူဝ်းၼႆႉ မီးလၢႆသႅၼ်းၵေႃႈယႃႇ ငဝ်ႈငႃႇမၼ်း တၢင်းယိူင်းဢၢၼ်းမၼ်းတႄႉ တႃႇပဵၼ်ၵၢၼ်တေႃႇလွင်းၵၼ်ၵူၺ်း ။ ယွၼ်ႉဝႃႈ မၼ်းမီးတႃႇသုမ်းလႄႈ တႃႇလႆႈ ။

ၵၢၼ်လဵၼ်ႈသလွတ်ႉၵဵမ်းၸိူဝ်းၼႆႉ ၸိုင်ႈမိူင်းၸိူဝ်းမီးပၵ်းမီးပိူင်ႁူမ်ႈငမ်းလႆႈတဵမ်တီႈတႄႉ တမ်းဝၢင်းဝႆႉ ပိူင်မၼ်းၼႂ်းၵႄႈၵူၼ်းသိုဝ်ႉလဵၼ်ႈမၼ်းလႄႈ ၸဝ်ႈတႅင်ႇမၼ်း ။ ၶဝ်တိုၼ်းထတ်းတူၺ်း ငိုၼ်းၶဝ်ႈငိုၼ်း ဢွၵ်ႇၼႂ်းၵၢၼ်လဵၼ်ႈၵဵမ်းၸိူဝ်းၼႆႉတႃႇသေႇ။

ၵၢၼ်တေႃႇလွင်းဢွၼ်ႊလၢႆႊၸိူဝ်းၼၼ်ႉ ၵမ်ႈၼမ် တေပိုၼ်ၽၢဝ်ႇပႃး RTP Return To Player (ငိုၼ်းဢၼ်ၵူၼ်းလဵၼ်ႈတေႃႇလွင်းတေလႆႈၼမ်သုတ်း) မၼ်းမီးၵႃႈႁိုဝ် ၼႆပႃးဝႆႉ ။

ပိုၼ်ၽၢဝ်ႇ RTP မၼ်းဝႆႉၼမ်ၵႃႈႁိုဝ်ၵေႃႈ ၵူၼ်းလဵၼ်ႈမၼ်းတေသူၼ်ၸႂ်ၼမ်လိူဝ်။ ပဵၼ်ၵၢၼ်လွၵ်ႇႁႂ်ႈၵူၼ်းၸိူဝ်းသူင်လဵၼ်ႈပဵၼ်တူဝ်ယိူဝ်ႇၼၼ်ႉယဝ်ႉ ၼႆ ၽူႈမီးတူဝ်ထူပ်းၼႂ်းၵၢၼ်တေႃႇလွင်းၼၼ်ႉၵေႃႉၼိုင်ႈလၢတ်ႈ။

ၵူၺ်းၵႃႈ ၵဵမ်းဢွၼ်ႊလၢႆး ဢၼ်ၽႄႈယူႇၼႂ်းမိူင်းႁူမ်ႈတုမ်ၼႆႉသမ်ႉ ဢမ်ႇသူႈပိုၼ်ၽၢဝ်ႇပႃးဝႃႈ RTP မၼ်းလႆႈၵႃႈႁိုဝ်ၼႆလႄႈ ၶဝ်ၶႂ်ႈဢဝ်ငိုၼ်းၵူၼ်းလဵၼ်ႈမၼ်းၸိူင်ႉႁိုဝ်ၵေႃႈလႆႈ ။ ၸင်ႇၼၼ်လႄႈ ၵူၼ်းသုမ်းၼပ်ႉႁူဝ်ႁဵင်ႁူဝ်ပၢၵ်ႇသႅၼ်မၼ်းၵေႃႈမီး။

#Shannews #radio #podcast