(General News) တၢႆယဝ်ႉႁႂ်ႈၵိုၵ်းပိုၼ်း ၵမ်းလိုၼ်းယႃႇႁႂ်ႈၵိုတ်းၸိုဝ်ႈၼဝ်ႈမိူၼ်ၼႆ

တၢႆယဝ်ႉႁႂ်ႈၵိုၵ်းပိုၼ်း ၵမ်းလိုၼ်းယႃႇႁႂ်ႈၵိုတ်းၸိုဝ်ႈၼဝ်ႈမိူၼ်ၼႆ

ၽူႈတွႆႇႁွၵ်ႈ ၊ ၸၢႆးသႂ်ၸိုၼ်ႈမိူင်း

ၵူၼ်းၵိုၵ်းပိုၼ်း တူဝ်တၢႆၵေႃႈ ၸိုဝ်ႈဢမ်ႇႁၢႆဝႃႈၼႆသေတႃႉ ၵိုတ်းၸိုဝ်ႈၼဝ်ႈၵိုၵ်းပိုၼ်းဝႆႉၼႆႉတႄႉ ၽႂ်ၵေႃႈဢမ်ႇၶႂ်ႈပဵၼ်။

ၵူၺ်းၵႃႈ သင်ဝႃႈ မိုတ်ႈမၵ်ႉမဝ်းမိင်း ဢႃႇၼႃႇ ငိုၼ်းတွင်း တီႈယူႇလီ ဢမ်ႇၼၼ်ဢၼ်တၢင်းၶေႃႈၵႂၢမ်းဢိင်းၵလဵတ်ႈဝႃႈ Comfort Zone ၼၼ်ႉသေ ဢမ်ႇႁူႉ ဢမ်ႇပွင်ႇၸႂ် လူၺ်ႈလွင်ႈလူၺ်ႈတၢင်းတႄႉ ပွင်ႇဝႃႈ ၵူၼ်းၵေႃႉ ၼၼ်ႉ ပႃးၼႂ်း သႅၼ်းဢၼ်မီးၸႂ်လမ်ႇမၢၵ်ႇလေႃးၽယႂ်ႇ။ ပဵၼ်ၵူၼ်းဢမ်ႇမေႃသွၼ်ႇပႃႈၼႃႈပႃႈလင် ဝူၼ်ႉၵႂင် တႅပ်းတတ်းဢမ်ႇၽဵၼ်ႈ၊ ဢမ်ႇမီးလွင်ႈတၢင်းႁတ်းႁၢၼ်။ ၵမ်းလိုၼ်းတၢႆၵေႃႈ ၵိုတ်းၸိုဝ်ႈၼဝ်ႈၵူၺ်း ။

မိူၼ်ၼင်ႇ ဢူးမျိၼ်ႉသူၺ်ႇ ၸွမ်ၸိုင်ႈၸူဝ်ႈၶၢဝ်း(ၵဝ်ႇ) ၵေႃႉဢၼ် ပၼ်ႁႅင်းၸဝ်ႈဢႃႇၼႃႇမႃး လၢႆသိုပ်ႇလၢႆပၢၼ် ဢၼ်လူႉသဵင်ႈၵႂႃႇမိူဝ်ႈဝၼ်းတီႈ 7 လိူၼ်ဢေႃႊၵတ်ႉသ်ၼႆႉ ဢိင်ၼိူဝ်မိူဝ်ႈတိုၵ်ႉမီးသၢႆၸႂ်လႄႈ မီးႁႅင်းပွင်ဢႃႇၼႃႇၼၼ်ႉ မၼ်းၸၢႆးၵုမ်ႇထွမ်ႇၵႂၢမ်း သိုၵ်းမၢၼ်ႈ ၸဝ်ႈဢႃႇၼႃႇ ၾၢႆႇလဵဝ်သေ ဢမ်ႇထွမ်ႇသဵင်ၵၢင်ၸႂ်ၵူၼ်းမိူင်း ။ မၼ်းၸၢႆးပွင်ၵၢၼ်ဝၢၼ်ႈမိူင်းမႃးႁိုင်ၼၢၼ်းသေတႃႉ ထိုင်တီႈလူႉသဵင်ႈသၢႆၸႂ်မႃးၵေႃႈ ဢမ်ႇမီးပိုၼ်းလီၼႂ်းသၢႆတႃၵူၼ်းမိူင်း - မီးပိုၼ်းဢၼ်ႁုၵ်ႉႁၢႆႉပေႉၵိၼ်ၵူၼ်းမိူင်းၼၼ်ႉၵူၺ်း ။ လွင်ႈမၼ်းၸၢႆးလူႉသဵင်ႈၼႆႉ ၵူၼ်းမိူင်းၸိူဝ်းသၢၼ်ၶတ်းၸဝ်ႈဢႃႇၼႃႇသိုၵ်း ဢမ်ႇမီးလွင်ႈမွင်ၸႂ်ၸွမ်းသေ ပဵၼ်ဢၼ်တီႈလီၶႆႈၶူဝ်- ၵိူဝ်ႉလဵၼ်ႈၵူၺ်း ။ လွင်ႈၼႆႉ ၸၢႆးသႂ်ၸိုၼ်ႈမိူင်း တေႁၢႆးငၢၼ်းၼႄပၼ်ၵႂႃႇၶႃႈဢေႃႈ။

#podcast #shannews