(General News) မႃးႁူႉၸၵ်း Well - being ယႃႈယႃလီတႃႇၸၢတ်ႈပၢၼ်ၸဝ်ႈၵဝ်ႇ

မႃးႁူႉၸၵ်း Well - being ယႃႈယႃလီတႃႇၸၢတ်ႈပၢၼ်ၸဝ်ႈၵဝ်ႇ

Podcast by - ၸၢႆးသႂ်ၸိုၼ်ႈမိူင်း

ၵိူတ်ႇပဵၼ်ၵူၼ်းမႃး ၼိုင်ႈၵေႃႉ ၊ ပဵၼ်ၵူၼ်းမႃးၼိုင်ႈၸူဝ်ႈၼိုင်ႈၸၢတ်ႈၼႆႉ တူဝ်ၸဝ်ႈၵဝ်ႇ မီးၽွၼ်းလီ တႃႇတူဝ်ၵဝ်ႇၸိူင်ႉႁိုဝ်လႄႈ မီးၽွၼ်းလီတႃႇတူင်ႇၵူၼ်းၸိူင်ႉႁိုဝ်ၼႆ ၵမ်ႈၼမ် တေဢမ်ႇတၼ်းဝူၼ်ႉ သွၼ်ႇထတ်းတူၺ်း ။ ၵုမ်ႇမိုင်ႉၸိုၼ်ႇ ႁဵတ်းသၢင်ႈဢၼ်ၼႃႈၵၢၼ် ၸဝ်ႈၵဝ်ႇၵူႈဝၼ်းဝၼ်းၼၼ်ႉၵူၺ်း။ မၢင်ပွၵ်ႈဢမ်ႇၶႆႈဢမ်ႇၼၢဝ်ၵေႃႈ မိူၼ်ႁၢင်ႈဢမ်ႇမီးႁႅင်းၸႂ်တေႃႇသူႈၵႂႃႇမိူဝ်းၼႃႈၵေႃႈ ၵႆႉယၢမ်ႈမီး ၵၼ်ယူႇ။လွင်ႈၸိူဝ်းၼႆႉ မၼ်းပဵၼ်တၢင်းပဵၼ်ယူႇသႅၼ်းၼိုင်ႈလူၺ်ႈတူဝ်ၵဝ်ႇဢမ်ႇႁူႉတူဝ် တၵ်းလူဝ်ႇၸႂ်ႉလၢႆးတၢင်းယႃၸႂ် Well- being (ၸူဝ်ႈပၢၼ်လီ) သေထတ်းတူဝ်ထတ်းၸႂ်။

ၽွင်းႁဵတ်းၵၢၼ်တႃႇထႅမ်လွၵ်းပဝ်ႇတူဝ်ၵဝ်ႇယူႇလႄႈသင် ႁဵတ်းၵၢၼ်ၸွႆႈထႅမ်တူင်ႇဝူင်းၵူၼ်းယူႇလႄႈသင် ၸိူဝ်းၼၼ်ႉ ၸွင်ႇယၢမ်ႈထတ်းတူၺ်း တူဝ်တင်းၸႂ်ၸဝ်ႈၵဝ်ႇႁိုဝ်? လိူဝ်သေမေႃႁူႉဝႃႈ လူဝ်ႇႁိပ်ႈၼႅတ်ႈတႃႇဝူၼ်ႉ တႃႇသၢင်ႈ ၼႃႈၵၢၼ် ၸိူဝ်းၼၼ်ႉယဝ်ႉ ၸွင်ႇ ယၢမ်ႈထၢမ်တူၺ်းတူဝ်ၸႂ်ၸဝ်ႈၵဝ်ႇဝႃႈ သိူဝ်းႁႃႉတုၵ်ႉ ၊ မႆႈၸႂ် ၶီၸႂ် မွင်ၸႂ် မွၵ်ႈၵႃႈႁိုဝ်ၼႆၸိူဝ်းၼႆႉ ။

ၼႂ်းၸူဝ်ႈပၢၼ်ၵူၼ်းၼႆႉ လွင်ႈတုမ်ႉတိူဝ်ႉပၢႆးတူဝ် လႄႈ ပၢႆးၸႂ် ၼမ်လႄႈဢေႇတႄႉ တိုၼ်းမီးၵိုၵ်းပိုၼ်းၽႂ်မၼ်းမႃးယူႇ ။ မၢင်ၵေႃႉၵေႃႈ ၵုမ်ႇမိုင်ႉၸိုၼ်ႇ တႃႇၶိုၼ်ႈယႂ်ႇတူဝ်ၵဝ်ႇ တႃႇၸုမ်း တႃႇၸိူဝ်ႉၸၢတ်ႈဝၢၼ်ႈမိူင်းၵူၺ်း ဢမ်ႇတွၼ်ႉ ဝူၼ်ႉသွၼ်ႇတူၺ်း ၼႂ်းတူဝ်ၼႂ်းၸႂ်ၸဝ်ႈၵဝ်ႇလီလီ။

ယွၼ်ႉဢမ်ႇၾၢင်ႉမႅၼ်ႈပၢႆးတူဝ်ပၢႆးၸႂ်ၸဝ်ႈၵဝ်ႇလႄႈ ဢမ်ႇၵိုင်ႇလီႁိူဝ်ႉႁႅင်းၵေႃႈလႆႈႁိူဝ်ႉႁႅင်း ဢမ်ႇၵိုင်ႇလီဢွၵ်ႇ တေႃးသယႂ်ႇၵေႃႈ မီးတေႃးသယႂ်ႇမႃး ၊ ၵုမ်းၸႂ်ၸဝ်ႈၵဝ်ႇယၢပ်ႇမႃး ၊ ႁဵတ်းမႅၼ်ႈဢၼ်ဢမ်ႇမီး ၽွၼ်းလီ တႃႇတူဝ်ၵဝ်ႇလႄႈ တႃႇၵူၼ်းၼမ်မႃးၸွမ်း။

#Shannews #ၽူႈတွႆႇႁွၵ်ႈ