Jokoan Bizkaia Irratia

Goi mailako zestaz gotzatzeko aukerea egongo da Bilboko Deportivo pelotalekuan maiatzaren 3tik ekainaren 7ra. Gizonezkoetan sei bikotek hartuko dabe parte Bilbo Jai Alai Iron Cup txapelketan, multzo bitan banatuta. Erkiaga-Ibarluzea (aurtengo winter series torneoko irabazleak) Barandika-Lekerika eta Laduche-Manci lehiatuko dira A multzoan eta Goitia-Basque, Johan-Gorka eta Pro Am torneoko irabazleak, B multzoan. Pro Am torneoko finalaurrekoak eta finala astegoien honetan jokatuko dira. Zapatuan, Arbek eta Atainek Bixente eta Zabalaren aurka jokatuko dabe, eta Urreistik eta Urangak, Urrutia eta Del Rioren aurka. Jaialdia arratsaldeko bostetan hasiko da. Finalaurrekoetako irabazleak aurrez aurre izango dira finalean, domeka arratsaldean eta torneo honetako garaileak Iron Cup txapelketan parte hartzeko aukerea eukiko dabe.

Bilbokoa, Jai Alai ligako zortzigarren txapelketea izango da. Orain arteko emaitzen arabera, Aritz Erkiaga d**o sailkapenaren lehen postuan. Guztira, sei jaialdi izango dira ikusgai Bilboko Deportivo frontoian maiatzaren 3tik ekainaren 7ra, sei barikutan jarraian. Moltzo bakotxeko lehen sailkatu biek finalaurrekoak jokatuko ditue ekainaren 7rako iragarrita dagoan finalerako lehiakideak erabakitzeko. Datorren asteko barikuan jokatuko dira lehen partidua. Erkiagak eta Ibarluzeak Barandika eta Lekerikaren aurka jokatuko dabe eta Alex Goitiak eta Basquek Pro Am torneoko irabazleen aurka.

Emakumezkoen txapelketeari jagokonez, lau bikote izango dira aurrez aurre: Erika Mugartegi eta Frida Watkins, Elaia Gogenola eta Ihart Arakistain, Helena Barrenetxea eta Maialen Aldazabal eta Maite Ortiz de Mendibil eta Arai Lejardi. Emakumezkoen txapelketea maiatzaren 24an hasiko da, Elaia Gogenola eta Ihart Ariskistainek, Helena Barrenetxea eta Maialen Aldazabalen aurka jokatuko daben finalaurrekoagaz. Bigarrena, maiatzaren 31an jokatuko dabe Erika Mugartegik eta Frida Watkinsek Maite Ortiz de Mendibil eta Arai Lejardiren aurka.

Txapelketako sarrerak eta bonoak eskuragai dagoz www.eramanjaialai.com web orrian. Partidu guztiak ikusteko bonoak 60 euro balio dauz eta modu seguruena da Iron Cup-eko jardunaldi guztietan jesarlekua bermatzeko.

Berrogei urteren ostean Athleticek bere 25. Kopea irabazi dau. Ilusino itzela egon da urte guzti honeetan eta itxaropen handia egon da aurtengo finalean ipinita. Horren erakusle Sevillara joandako zale guztiak, ia 100.000. Sevillako kaleak, Athletic Hiria eta Cartuja futbol zelaia kolorez zurgorriz jantzita eta ekipoak ez dau hutsik egin. Lan, ahalegin eta grinaz 25. kopea Bizkaira ekartea eta 40 urteren ostean gabarrea ataratea lortu dabe.

Penaltietara arte ez zan izan posible garaipena eta ganera partidua lehenengo zatian trabestu zan, Mallorkaren golagaz. Bigarren zatian etorri zan Sancet-en gola zurigorrientzat, finala irabazteko aukerea egoala barriro sinestaraziz. Cartujako zale zurigorriak ixilik une askotan, ametsa zapuztuko ete zan bildurretan, taldea animatuz beste une batzuetan...Partidua banako emaitzagaz amaitu zan, baita orduerdiko luzapena be. Emozinoa topera zurigorriak nagusi ziran partiduan, nahiz eta emaitzak lagundu ez.

Penaltien txandan, partiduan legez, Julen Agirrezabalaren eskuak urrezkoak izan ziran. Mallorkaren penalti bat geratu eban, beste bat kanpora bota eben eta zurigorriek guztiak barriro. Azkanean garaipena Athleticentzat eta 25. kopea Bizkaira.

Eguenean urtengo dau gabarreak eta ospakizun giroa izango da Bilbon eta Bizkaian.

Bizkaia Irratiko lantaldeak emozinoz beteta bizi izan eban partidu amaierea eta podkast honetan entzun zeinkie eurak atzo bizi izandakoa.

Aupa Athletic!

Ondo eta gogo askogaz dagoela esan deusku jokolari zurigorriak. Taldea be ondo ikusten dau, bere bidea jarraitzen eta lan handia egiten. Orain garrantzisuan dagozala dino.

Inguruan kopa eta kopa eta kopa baino ez dabela autortu deusku Ruiz de Galarretak. Familian kopa, lagunartean be bai, herrian zehar ibilita gauza bera... Eurok be, inguruan legez, finala irabazteko ilusino handia dabela autortu deusku. Dana daala, ahalegintzen dirala eguneroko lanean zentratzen eta ondo entrenetan. Ilusinotik alde eta futbolean pentsetan ahaleginten ei dira. Javier  Agirreren aginduetara jokatukoa da Ruiz de  Galarreta. Bere esanetan oso talde on eta lehiakorra da, beraz ez da partidu erreza izango.

Jokalari zarauztarra itxaropentsu d**o finala irabazteko. Momentu errezak ez dirala dino, pentsamendu asko pasetan dirala burutik, galdutako finalak eta abar. Baina aurtengoa ezbardina izango ei da, zaleak be hantxe egongo diralako laguntzeko. Taldea be une eta egoera ezbardinean dagoela dino Yuri Berchichek, oso momentu ona dala eurentzat baina partidu batera edozer gertau leitekela. Oso ondo jokatu behar dala kopea etxera ekarteko. Berrogei urte kopea irabazi barik egotea jokolarientzako kargea dala autortu deusku Berchichek. Mallorka aurkari gogorra dala adierazi deusku. Berchichek argi dauka zelan jokatu behar daben, etxean legez, goian presinoa eginda eta erasora.

Julen Agirrezabala ateizainak Ahtletic maila onean ikusten dau aurton, eta maila horri eutsi ezkero finala irabazi eta kopea Bilbora ekarri leikiela uste dau. Baina ez lanik egin barik, Mallorka arerio latza dala dino, Reala eta Girona kanporatuta. Talde on eta fisikoa eta gauzak ondo landutakoa da Mallorka, Agirrezabalaren eritxian. Berak nahiago izango leuke partidua lehenengo 90 minutuetan erabagitea, penaltietan barik.