Letra ‘to

Lee Feng Nuñez

0.0 (0)
IMPROVISACIÓN

Podcast de Letra ‘to

Ang podcast na walang arte at walang kwenta. It is just an open letter for everyone.

19/06/2021

EPISODE 18: Happy Tatay's Day

Sa bawat araw na dumarating Ginagampanan mo ang dalawang tungkulin Ang pagiging ama At pagiging ina sa amin Hindi madaling gawin Pero nakakaya mo pa rin Ramdam ko ang bigat na nararamdaman mo pagkatapos ng maligalig na maghapon Pinapagod ka ng araw Nilamon ka ng mga papel na palagi mong kaharap Niliguan ka ng pawis sa palagi mong pagtahak sa masusukal na daan Para lamang ang trabaho mo ay magampanan Minsan mo nang pinatunayan ang hirap Pero hindi ka sumusuko para sa pangarap Dahil patuloy kang lumaban at lumalaban Nanganganib man ang buhay Patuloy ka pa rin sa pagsugal sa mas maayos na pamumuhay Hindi madali Hindi naging madali ang lahat Mula sa mga naghilom mong sugat Mga iniindang sakit Mga lihim mong pilit mo mang itago ay sumisiwalat pa rin Napapagod ka Nahihirapan Nasasaktan Nanghihina Para lang hindi namin madama ang nawawala Pero hindi sinungaling ang mga mata mo Nangungusap ito Nagsasabing “Anak payakap ako kasi pagod na ako.” Kayat handa akong salubungin ka ng halik Ng yakap na may galak Mapait ang inihanda ng buhay Ngunit tumatamis sa mga ngiti mong taglay Sa lakas na walang kapantay At pagmamahal mong ibinibigay Kayat hayaan mo akong ibahagi ang mga itinuro mo sa aking paglalakbay Simula sa paghampas ng alon at agos ng buhay Hayaan mong bigkasin ko ang pangalan mo Sa ngalan mo Nakasalalay ang lahat Dahil kung wala ka ay wala din ako Kami Walang magpaparamdam sayo ng lakas kapg mahina ka Wala kang magiging pahinga Oo kailangan mo kami Ngunit mas kailangan kita Kayat sayong kaarawan hayaan mong mas iparamdam sayo na mahalaga At TATAY, mahal na mahal kita. Sana masaya ka. ❣️🎈

5 min
15/06/2021

EPISODE 17: Turon!!!

TURON nasilayan mo na ba ang bukas? marahil hindi pa pero handa ka bang harapin? o baka naman nandiyan ka pa din sa kahapong paulit-ulit kang inaalipin pinaghandaan mo ba? o baka naman tinatangay ka pa ng agos ng sarili mong mga luha magdabog man ang langit kumulog at kumidlat hanggang sa maramdaman ang galit hayaan mo na kasama sa paglago ang paglagas ng mga dahon magiging marupok ang mga sanga pero mas patitibayin ka ng panahon magiging magulo ang lahat pero mamumunga lahat ng pagod konting tiis lang makikita mo din kung bakit ka nasa baba malalaman mo din na hindi porket nasa taas ka na malaya ka na na kaya mo ng gawin ang lahat pwede mong matanaw ang kalayuan pero hindi mo mararating pwede mong titigan lahat ng nasa baba pero hindi mo rin sila maaabot para saan ang posisyon kung ikaw lang din ang magiging talo ng sarili mong misyon pwede kang gumamit ng lakas pero wag mo sanang daanin sa dahas hayaan mong maging patas ang batas maging matatas ang mananalastas buhayin mo ang poso padaluyin ang tubig sa bukal palalimin ang berso hayaan ang titik na bumungkal ng mga salitang ugat na itinagot inilihim huwag mo na tabunan huwag mo na pagtakpan tama na ang pagpapaikot tama na ang pagpapainit nasusunog na ang labas nadadamay ang kalooban walang sustansiya ang sangkap kung hindi mo babantayang mabuti iligtas mo ang lahat kasama ang iyong sarili sa kagaguhan ay huwag na manatili dahil hindi lalago ang puno kung mga sanga ay pilit binabali damdamin mo ang sakit kalimutan mo na ang nakaraan huwag mo lang basta subukan dapat piliin mong makasanayan na wala na ang dati sayong nagpapasaya wala na ang dating init ng pinagsamahan niyong dalawa wala na ang lahat kaya pakiusap kalimutan mo na siya *turrrroooon* ayaw ko na

4 min
11/06/2021

EPISODE 16: Huño a Dose

Huño a Doze ni Lee Feng Nuñez Matagal na. Matagal na matagal na. Ilang taon na ang nakalipas Ilang dekada na ang lumagpas Matagal na. Matagal na matagal na. Tatlong banyaga ang nagsamantala Sa isang babaeng walang palag na Pumayag at pumayag sa paghubad sa kanya Pero ang mga anak nito Sila at ako Kami at tayo Kaming mga anak niyang Pilipino Kahit na sakit ang dinaranas ay lumaban kami sa mga ito Sa mga banyagang mapagsamantala Mga banyagang bandido At ngayon nakamit ko na, nila, naming mga Pilipino Ang tagumpay at tropeyo Ang magsalita, makinig, tumawa, umimik, maglakad, tumakbo, mag-aral, matuto, magdasal, magpuri, magbahagi, magpunyagi, magdiwang, mag-alay, magmahal at mabuhay Libre na lahat Malayo na sa sakit sa balat Sa mahigpit na sakal Sa nakamamatay na kagat Sa mga pasan pasang parusang mabigat Sa lason sa puso at utak Nakamit na namin Kundi dahil sa mga bayaning nagtanggol Mga taong lumaban at sumugal Para sa lupang pinangako na hinabol Upang mabawi at matanggal Ang bakas ng sama sakit at pagdurusa sa kamay ng mga mapang-aping sagabal Sa pag-ahon at pagkawala Pero ngayon ay wala na Tapos na pero di ibig sabihin limot na Ang ginawang panggagahasa sa ating ina Sa nagluwal sa atin sa sarili nating lugar Sa kung nasaan man tayo ngayon Ang Pilipinas na ating pinakamamahal Siya ang ating ina. Ang babaeng ginahasa ng iba. At tayong mga anak ang dapat magtanggol sa kanya. Heto na. Nakamit na. Matagal na. At matagal na matagal na. Nakipaglaban si Kuya Andres nakipagtunggali si Kuya Pepe Namuno sina Pilar, Luna, at Aguinaldo Nakipagtalastasan si Mabini Ginapi ni Lapu-Lapu si Magellan Para protektahan ang Maktan Ang mga ginawa nilang kabayanihan Ay hinding hindi matutumbasan Ang pagprotekta sa inang bayan At pagpatol sa kalaban Mga bagay na di dapat kalimutan Mga bagay na sa atin nila nilaan Upang ang nakamit natin nang matagal na Ang pinaghirapan ng ating mga Ate at Kuya Mga ninuno kumbaga Ang tropeyo na hindi nila pinagdamot ibigay Ang tropeyo na kapalit ng kanilang buhay Ito ay matagal na. Matagal na nating nagagamit. Matagal na nating nakuha. Ika-labindalawa ng Hunyo Isang libo't walongdaan siyamnapu't walo Ang petsa kung saan nakamit natin ang tropeyo. Mula sa pakikipaglaban. Pakikipagdigmaan. Kapalit ng pawis dugo at laman. Nakamit na natin ang Araw! Ang tropeyong hindi matatawaran. Nakamit na natin ang ating KALAYAAN.

4 min
09/05/2021

EPISODE 15: Iniibig na Alaala

I.N.A (Iniibig Na Alaala) Ni Lee Feng T. Nunez Kapag nakakita ng masayang ina Aking naaalala mahal kong ina Ang ngiti sa mukha at pag-aalaga Ay walang katumbas anumang halaga Pumanaw man siya ay nandito pa rin Nasa aking puso at pati damdamin 'Di man makita kanyang katauhan Ay palagi naman nandiyan sa tabihan Kanyang alaala ang saki'y naiwan Palaging masaya walang kalungkutan Palaging kasama sa 'king kadramahan Sa 'king kasiyahan at sa kalokohan Habang sinusulat itong aking tula Ay nararamdaman ko ang pangungulila Ngunit sa kabila ako'y natutuwa Habang tumutulo aking mga luha Aking naalala aking pagkabata Palaging may handang tinapik sa mesa At kung kaarawan, may balut na isa At kung Pasko nama'y damit na maganda 'Pag may sugat naman agad lalapitan Ito'y gagamutin at pag-iingatan 'Di paglalaruin, 'di palalabasin Bibigyan ng payo at mga pagkain Dahil mahal niya 'di pababayaan Ayaw matatalo, ayaw palalamang Makikipagtalo, makikipaglaban Upang mahal niya'y mapabuti lamang Ang lahat ng saya kapag siya'y kasama Ay hinahanap ko sa tuwi-tuwina Ang pag-aaruga ay walang kapantay Ganyan kahalaga ang gawa ni Nanay Ang bahay ay kulang kung wala ang ilaw Parang buhay lamang 'pag walang liwanag Palaging madilim parang walang araw Madaling gibain, madaling matibag Kaya ating oras ay 'wag aksayahin Ang ating magulang ay ating mahalin Dahil 'pag nawala sila sa 'ting piling Baka ating hangarin ay 'di na marating Ang punto ko lamang ay iyong malaman Ang bawat halaga ng ating magulang Lalo na sa ating nag-iisang ina Na kapag nawala ay parang sakuna Mangungulila ka araw man o gabi Laging hahanapin ang kanyang pagtabi Tuwing lumuluha, tuwing may problema Hindi mo na siya muling makikita Lagi kang iiyak ng walang kasama Lagi kang malungkot, laging nag-iisa Sapagkat wala na ang mahal mong ina Na iyong kakampi sa tuwi-tuwina Kaya ang tulad ko lumaking masaya At naging matatag kahit walang ina Ang naging pundasyon ay ang alaala Na laging sariwa sa aking memorya Ngayon aking ina salamat sa iyo Ikaw ang nagturo sa buhay kong ito Kung pa'no lagpasan ang mga pagsubok Kung pa'no mabuhay ng hindi marupok Kung nasaan ka man sana'y nakikinig Sa aking pagtawag, sa 'king mga himig Nais kong sabihing ika'y iniibig At handang higpitan ang kapit sa bisig Oh mahal kong ina salamat sa lahat Salamat sa gabay at mga pangarap Aking ginagawa ay iyong imulat Kung saan ang tama hahit na mahirap Ako'y patawadin kung nagkakasala Sa mga kapatid at ating pamilya 'Di man magampanan ang pagiging kuya At pagiging isang mabuting kasama Kaya sana ina masaya ka diyan 'Wag ka mag-alala sa ating pamilya Ako ang tutulong sa ating pagyaman Ako ang bubuo sa tamang istorya Masaya ang wakas, masaya ang lahat Kasama sa taas, kalaro sa ulap Pagmamasdan natin ang ganda ng dagat At kokompletuhin ang mga hinahanap Sa tula na ito ay isisigaw ko Kung gaano kapalad ang mga tulad ko Kahit walang ina ay nararamdaman Ang init ng yakap na walang hangganan Ang huling bahagi sa'yo iaalay Mahal kita Nanay, mahal kita Mama Mahal kita Mommy, mahal kita Ina Mahal kita kahit alaala ka na.

5 min
03/05/2021

EPISODE 14: Tanghali at ang Hari

minamahal niyo lang ako sa simula at sa wakas... hindi naman ako palaging kasing ganda ng buwan hindi rin ako palaging kasing rikit ng mga bituin hindi rin ako kaakit-akit gaya ng ulap at lalong hindi ako kasing lawak ng kalawakan at dagat isa pa, hindi lang ako maganda sa umpisa, hindi ko hangad na pahalagahan lang sa simula, sa pasasalamat kasi dumating, sa pagmulat pagkatapos ng gabing madilim, hindi ko hanggad na mahalin mo ako sa tuwing makikita mo akong umaakyat sa mga pagitan ng bundok, hindi ko rin hinangad na ngitian mo lang ako sandali bago magsimula ang maghapon mong nakakapagod, hindi ko hangad ang ganito, hindi ko hanggad ang paghanga, hindi ko hanggad ang titig, hindi ko hangad ang mga larawang kuha mo sa akin habang dahan-dahan akong lumulubog sa kanluran, nalulunod sa ilalim ng karagatan, inaagos ang alaala ng maghapong dumaan, tinitiis ko ang paninisi mo sa hatid kong init, nalulungkot habang tinataboy ng mga taong pilit hinahanap ang ihip ng hanging kaibigan mong matalik, subalit, nasasaktan ako, dahil hindi man lang ako pinansin, hindi man lang tinatanggap, hindi man lang pinahahalagahan, hindi man lang naisip na sa buong maghapo’t magdamag ako lamang ang nananatiling tapat tapos babalewalain lang, dahil ang halaga ko ay nakikita lang sa umpisa at sa pagwawakas saka niyo lang ako minamahal kapag nasisilayan niyo na ang liwanag, ang kulay pulang sinag ang bahaghari, ang kulay na mapanlinlang pero nakalimutan niyong ako ang hari ang palaging tapat ang may koronang tinatakpan ng ulap ang palagi mong kaharap at palagi kang pinagbibigyan pagkatapos ay lilimutin mo lang pagdating ng isang buwan —TANGHALI AT ANG HARI (2021) Letra 'to Mga Tula Ni Pedro Gwapo / Juan Tanga

3 min
08/04/2021

EPISODE 13: Ang Pangarap Kong Love Story

“ANG PANGARAP KONG LOVE STORY” Namulat ako sa KathNiel, sa mga teleseryeng tinangkilik ng kilig, mga pelikula sa pinilakang tabing ng tili, mga eksenang sa puso’t isip namumutawi at ng mga kuhang larawan na itinago’t ikinubli Kinalakhan ko ang LizQuen, mga pagsasamang binuo ng tampuhan, mga sandaling binalot ng tawanan, mga panaghoy na naging katotohanan, dramang pinalawig ng masalimuot na karanasan at mga komedyang niyakap ng karangalan Napukaw ako ng Jadine, sa kanilang mga titig at yakap, sa mainit na halik at hawak, sinundan ko ang riles ng relasyon hangang sa huling istasyon, na nagbigay sa akin ng inspirasyon, motibasyon at leksyon sa mga taong gusto ng panibagong bersyon at ng simpleng atensyon—mga taong susubok na maging tunay ang tibok at tatanggap sa aking pagbangon at pagkakalugmok pero nabuhay ako sa pag-ibig at nagpapatuloy ako sa pag ibig para maibahagi ko ang sarili kong kwento ——— “Gusto ko ng katuwang na magpaparamdam sa akin ng pahinga. Payapang paligid na magbibigay sa akin ng ginhawa. Gusto ko rin ng tahanan, na magpapatahan sa akin sa mga gabing wala na akong maiyakan. Gusto ko rin ng alagang hayop, na maglalambing sa’kin kung sakaling nakakaramdam ako ng takot. Pangarap ko ang katahimikan. Malayo sa magulong lansangan at maiingay na maalinsangang sasakyan. Pangarap ko ang buhangin, ang dapithapon sa dalampasigan, ang simoy ng hangin at hampas ng alon, ang himig ng nagliliparang mga ibon, Pangarap kong humiga at huminga sa nakakapagod na mundo habang humihigop ng mainit na kape, habang pinapanood ang kumakaway na mga pananim—mais, palay, tubo o gulay. Pangarap ko ang yakapin mo ako sa gabing malamig na hindi mawari kung ulan ba o bagyo At ika'y hahagkan, pipisilin ang pisngi, at ilong habang nakangiti, hahagkan kita sa noo, bilang paalala kung gaano ito katotoo—ang pag-ibig, ang relasyong sabay nating pinangarap hindi na ito panaginip, isa na itong kaganapan, ikaw ang sapat at ako ang tiyak, dito sa payak na kwento ng malawak na mundo ng pangarap." Hindi na ako humihiling pa, wala ng sana, dahil nandito ka na. Ang pangarap kong love story ay hindi lang basta kwento ng pag-ibig. Ang gusto ko ay totoo. Walang pagtatago. Walang pagpapanggap. Walang kasinungalingan kundi pagtanggap. Pagpapatawad. Pag-unawa. Pag-intindi. Pagpapasaya. Pananatili. Pagpili. At Pananalangin. Dahil sa mahirap at komplikadong tanong na "Ano ang pangarap mong love story?" ang palaging kong sagot, simple lang, "SIMPLE LANG" Walang arte, Walang sakit, walang inggit, walang galit kundi puro lang pagmamahal at higit sa lahat gusto ko, yung gusto ni Kristo. —simple lang (2021)

4 min
29/03/2021

EPISODE 12: Ang Kasinungalingan ay Mabagsik na Kalaban

Ang Kasinungalingan Ay Isang Mabagsik Na Kalaban Ni Pedro Ang kasinungalingan ay isang mabagsik na kalaban Pilit itong makikipagsiksikan sa ating kapaligiran Tinatakpan nito ang ating tenga upang hindi natin marinig ang katotohanan Hihilahin ka nito mula sa iyong pagbangon upang muling mahimbing sa kasalanan Unan niya ang takot Sarili nating pagpili sa mali ang nagsisilbi niyang kumot Patuloy tayo nitong binabalot Kasama niya ang mga kuliglig sa iyong dibdib Patuloy siyang manliligalig Wala kang ibang maririnig kundi ang kataksilan nito at himig Ang kasinungalingan ay isang mabagsik na kalaban Alam niya ang mga araw na mahina ka Mga panahong isang ihip lang ng hangin ay tutulo na ang mga luha sa mata Matutulala ka Kaya bigla bigla siyang kakatok sa pintuan ng iyong konsensya At wala kang magagawa kundi piliin siya Alam niya ang iyong mga lihim na itinago si gilid ng dingding Letra ng pangungusap ang gamit niyang patalim At hindi lang basta natatapos sa tuldok Dahil kabisado niya ang pagmulat ng iyong mga mata Ang kamay mong parehong napapasma At puso mong nangangamba Alam niya na mahal mo siya At handa kang muling piliin siya Kaharap mo man ang hari at reyna Ipagmamalaki mo pa siya Bibihisan mo ng makulay na damit At bubuuin ang gamit ang mga pariralang punit punit Mabagsik ang kalaban Kailangan mo ng kalasag at sandigan Putulin mo ang ugat ng kasamaan Mula sa maling desisyon at pagtahak sa maling daan Kapitan mo ang tatag Ang grasya Ang awa at Ang pagmamahal Dadalhin ka nito sa kalinisan Pero sa oras na malinis ka na Handa ka muli niyang putikan Madumi makipaglaro ang tadhana Kakampi niya sa plano ang mga masasama Aakayin kang magkamaling muli Upang mas mahirapan kang patawarin Mas lumalim ang balon ng kasalanan mo sa mga naniniwala sayong mga tingin Patuloy kang masisira At bubuuin ka ng buo mong kasinungalingan Dito ka na mabubuhay Dito ka na dedepende Magmimistulan siyang jeepney Paulit ulit kang ililibre ng pamasahe Dadalhin ka sa sarili niyang balwarte Aalipinin kang maigi Di ka dapat mag inarte Dahil guyam ka lang sa katulad niyang kapre Kakabahan ka kahit di ka humigop ng mainit na kape Pagkatapos ay aakbayan ka niya At kakapitan ka sa kaliwa at kanang pisngi Sabay aamin ng pasimple “Pasensya na, nahulog ka sa patibong at isa ka na ngayon sa mga madumi.” Tapos biglang liliwanag ang langit Ngingiting muli at sisilip Mga tinig ng pag-asa ay nagsisiawit At sa panahong duguan ka na Liliwanag ang paligid At lalabas ang iyong kakampi Magsasabi “Handa akong linisin ka sa kung gaano ka man kadumi. Handa akong iligtas ka, dahil alam kong hindi pa huli. Kumapit ka lang ng mabuti, kumapit ka sa mabuti. Ililigtas kita. Nandito na kami.” At bumaba sa langit ang mga anghel Ipinaglaban ka Kasama ng Diyos Ang mabuting kakampi Nagapi ang mabagsik na kalaban Umahon ka Bumangon pa At nagpatuloy Wag kang babalik sa lugar ng kasinungalingan Muli ka ditong makukulong Dadayain Ngunit wag ka na muling magpatalo at magpaalipin sa mundo Kasama mo ang Diyos At matatalo mong lahat ng mabagsik na kalaban mo Maniwala ka lang Manalig At mabuhay sa katotohanan. 🖤

5 min
28/03/2021

EPISODE 11: Bago matulog

BAGO MAG GOOD NIGHT Pagkatapos ng magandang gabi At bago mo simulang sabihing naging mabuti ang gabi Bumalik ka sa kung ano ang mga nangyari Sa kani-kanina lang Sa kanina pa Sa bago pa sumapit ang umaga At ang haring araw ay magpakita Simula sa unang haplos ng init sayong mga balat Sinundan ng mga sinag ng liwanag na di mapaliwanag na naaaninag ng iyong mga matang nakamulat Sumulat ang pluma sa kwadernong matagal mo nang hindi binubuklat Sumiwalat ang mga itinuro at ginamit ang aklat Umalat ang pawis Tumagaktak hanggang sa pumatak Umalab ang singaw ng sumisigaw na tanghaling tapat Tagos sa lahat ng parte ng katawan Hinanap ang lambing ng lamig Mga nagyeyelo mong himig Ang palagi kong naririnig Dumating ang mga hapon Nalagas ang mga dahon Nagastos ang mga baon Naubos ang mga laman ng kahon Nanlambot ang mga sabon Nagsidapo sa alambre ng kuryente ang mga ibon Hudyat na darating na ang pagdaong ng araw sa kanluran ng nayon Nahahapo ang hapon Meryenda mo ang kutsintang walang sinta Putong walang punto At piyayang hindi biyaya Napagod ka sa maghapon Hinihila ka ng sarili mong pahinga sa lugar niya Habang nilulunod ka ng paghakbang na patungo pa sa kapaguran Lumalin ang sandali Naglalagablab ang gabi Wala ka ng maintindihan Iba na ang mga katabi Mga sulat ay isinantabi Walang pasubaling Nabali ang pagbaling sa baling lapis Tinasahan Sumulat ng tula Lumimbag ng isang obrang siya ang paksa Napatulala Inakay ka ng imahinasyon sa panaginip Nakalimutan mo na ang magdasal Sa simpleng idlip Nagising ng saglit Di matukoy kung babangon ba o babalik Sa masaya mong pagpikit Pero nanaig ang pag-ibig Nakalimutan mong may naghihintay pala sayo Na may kakausapin ka pa At bago mo ikwento ang lahat Masaya ka kasi sa huling pagkakataon sa araw na iyon Naramdaman mo Siya At saka ka nagpasalamat Nawala ang pagod at bigat na pasan mo sa iyong balikat Kasi bago ka mag good night nakausap mo Siya. At handa ka na Niyang bigyan ng pahinga at lakas para sa panibagong umaga. GOOD NIGHT 🌙 —bago matulog (2021)

3 min

Ang podcast na walang arte at walang kwenta. It is just an open letter for everyone.

Creador

Lee Feng Nuñez
Años de actividad

2 k
Episodios

18
Clasificación

Explícito
Copyright

© Lee Feng Nuñez
Mostrar sitio web

Letra ‘to