តើជម្លោះព្រំដែនកម្ពុជា និងថៃកាន់តែក្តៅ ផ្តើមចេញមកពីមូលហេតុអ្វីខ្លះ?

ជម្លោះ​ព្រំដែន​កម្ពុជា និង​ថៃ ​ចាប់​ផ្តើម​កើន​កម្តៅ​ខ្លាំង​ឡើង​ នៅ​ក្រោយ​ថ្ងៃទី​២៨ ខែ​ឧសភា​ឆ្នាំ​២០២៥ ​បន្ទាប់ពី​ទាហាន​ថៃ​បាន​ចូល​មក​បាញ់​សម្លាប់​ទាហាន​កម្ពុជា​ម្នាក់​នៅ​តំបន់​មុំបី​ក្នុង​ខេត្ត​ព្រះ​វិហារ​។​ ក្រោយហេតុ​ការណ៍​នេះ​ ភាគី​ជាគូ​ជម្លោះ​ទាំង​សង​ខាង​បាន​បង្កើន​កម្លាំង​ទ័ព​រៀងៗ​ខ្លួន​ទៅ​កាន់​ព្រំដែន​ជួរ​មុខ​។​ ជាបន្ត​បន្ទាប់​មក ​ភាគី​ថៃ​បាន​បិទ​ព្រំដែន​ជា​ឯក​តោភាគី​។​ ជា​ការ​ឆ្លើយ​តប​វិញ​ កម្ពុជា​ក៏បាន​បិទ​ការ​នាំ​ចូល​បន្លែ ផ្លែឈើ ​ប្រេង ​និង​ឧស្ម័ន​ពី​ប្រទេស​ថៃ​។ ​អ្នក​តាម​ដាន​ស្ថាន​ការណ៍​នយោបាយ ​កត់​សំគាល់ថា ​ការ​កើន​កម្តៅ​ជម្លោះ​ព្រំដែន​នៃ​ប្រទេស​ទាំង​ពីរ​នេះ ​ជា​ផ្នែក​មួយ ​កើត​ចេញ​ពី​ជម្លោះ​គ្រួសារ​របស់​មេ​ដឹក​នាំ​ និង​ដោយសារ​តែ​យោធាថៃ​មិន​ព្រម​ទទួល​ស្គាល់​ផែន​ទី​អន្តរ​ជាតិ​។