【A郎台語小詞典】EP. 21-上/chiūⁿ Tâi-gí Sió Sû-tián

簡單紹介A郎故事內底有講--tio̍h ê語詞，ǹg望各位聽眾朋友聽了ē kah意，nā感覺bē-bái，mā真歡迎kā goán tàu紹介hō͘親chiâⁿ朋友ō͘。

[網站 Bāng-chām]
https://cho-kang-a-lang.github.io/

[Podcast]

SoundOn
https://bit.ly/ChKaL_SO

Spotify
https://spoti.fi/48jD2tI

KKBOX Podcast
https://bit.ly/ChKaL_KK

Apple Podcast
https://apple.co/3HZyfD3

Google Podcasts
https://ppt.cc/fpPKUx

YouTube Podcast
https://bit.ly/ChKaL_YT


[社交平台 Siā-kau Pêⁿ-tâi]

YouTube
https://bit.ly/ChKaL_YT

Facebook
https://bit.ly/ChKaL_FB

Instagram
https://www.instagram.com/chokangalang/

X (Twitter)
https://twitter.com/chokangalang

方格子
https://vocus.cc/salon/cho-kang-a-lang

以下內容是漢羅kah白話字原稿，有需要歡迎ta̍k-ke來參考。

【漢羅版】

今á日咱來beh紹介chiūⁿ chit ê動詞，chit字chiūⁿ，咱tiāⁿ-tio̍h真四常teh用，意思mā真chē，chit遍咱專門ka整理--出-來，分享hō͘ ta̍k-ê做參考。

頭起seng，tī咱故事內底講ê chiūⁿ船，to̍h是peh khí-lih船頂ê意思。Chiūⁿ車、chiūⁿ kiā、chiūⁿ樓、chiūⁿ眠床、chiūⁿ台演講，lóng是kāng款ê用法。

Chiūⁿ，mā有去1 ê所在ê意思，像講chiūⁿ街、chiūⁿ工、chiūⁿ官府等等lóng是，chiūⁿ路to̍h是講beh出發，beh起行--ah，chiūⁿ山頭一般m̄是去peh山ŏ͘，是beh kā亡者kng去山頂tâi，tùi台語iáu-bē hiah熟手ê朋友ài細jī，nā無ē去hông笑。

Koh 1種是登記、記錄ê意思，chiūⁿ賬，to̍h是ài kā siàu記入去siàu簿á--ni̍h，the̍h 1 ê例來講，「Chăng A明the̍h肥料錢來，你kám有寫--起-來？」「無neh，chăng to̍h無閒kah霧sà-sà，iáu koh好你有kā我問！」「無要緊，ē記chit ài chiūⁿ簿ŏ͘！」 Kāng款ê用法koh有chiūⁿ紙、chiūⁿ冊。

Chiūⁿ千，to̍h是超過1000，「我食chit ê頭路已經chiūⁿ 2 tang--a，m̄-koh lóng無kă調薪水，想--tio̍h to̍h怨chheh。」Án-ne，凡勢tio̍h ài去chhōe看有待遇khah好ê公司--無。Koh有1句俗語：「Chiūⁿ siap to̍h bē liap！」Mā kāng款是超過ê意思。

Chiūⁿ身是講神明、邪靈來óa tī seng-khu頂，nā是chiūⁿ童，一般是leh講神明來óa，m̄是邪靈，mā有人是講chiūⁿ乩、起童。

Chiūⁿ目是看tio̍h ē kah意，chiūⁿ手是leh講khang-khòe a̍h是技術已經ē-tàng出師，學kah真gâu--ā，掌握kah真好án-ne，chiūⁿ-kioh kah chiūⁿ手，差不多是kāng意思。M̄-koh chiūⁿ手koh有另外1種意思，to̍h是the̍h tī手--ni̍h，像講，「Mi̍h-kiāⁿ chiūⁿ手，咱beh出發--ah。」「你che尾款，to̍h等kah伊khang-khòe lóng收soah，chiah thang hō͘--伊，nā無伊錢nā chiūⁿ手，凡勢ē hō͘你jiok無人。」

【Pe̍h-ōe-jī pán】
Kin-á-ji̍t lán beh lâi siāu-kài chiūⁿ chit ê tōng-sû, chit jī chiūⁿ, lán tiāⁿ-tio̍h chin sù-siông teh ēng, ì-sù mā chin chē, chit piàn lán choan-bûn ka chéng-lí--chhut-lâi, hun-hióng hō͘ ta̍k-ê chò chham-khó.

Thâu-khí-seng, tī lán kò͘-sū lāi-té kóng ê chiūⁿ chûn, to̍h sī peh khí-lih chûn-téng ê ì-sù. Chiūⁿ chhia, chiūⁿ kiā, chiūⁿ lâu, chiūⁿ bîn-chhn̂g, chiūⁿ tâi ián-káng, lóng sī kāng-khoán ê iōng hoat.

Chiūⁿ, mā ū khì 1 ê só͘-chāi ê ì-sù, chhiūⁿ kóng chiūⁿ ke, chiūⁿ kang, chiūⁿ koaⁿ-hú téng-téng lóng sī, chiūⁿ lō͘ to̍h sī kóng beh chhut-hoat, beh khí-kiâⁿ--ah, chiūⁿ soaⁿ-thâu it-poaⁿ m̄ sī khì peh soaⁿ ŏ͘, sī beh kā bông-chiá kng khì soaⁿ-téng tâi, tùi Tâi-gí iáu-bōe hiah se̍k-chhiú ê pêng-iú ài sè-jī, nā bô ē khì hông chhiò.

Koh 1 chióng sī teng-kì, kì-lo̍k ê ì-sù, chiūⁿ-siàu, to̍h sī ài kā siàu kì ji̍p-khì siàu-phō͘-á--ni̍h, the̍h 1 ê lē lâi kóng, “Chăng A-bêng the̍h pûi-liāu chîⁿ lâi, lí kám ū siá--khí-lâi?” “Bô neh, chăng to̍h bô-êng kah bū-sà-sà, iáu koh hó lí ū kā góa mn̄g!” “Bô-iàu-kín, ē kì chit ài chiūⁿ-phō͘ ŏ͘!” Kāng-khoán ê iōng-hoat koh ū chiūⁿ chóa, chiūⁿ chheh.

Chiūⁿ chheng, to̍h sī chhiau-kòe 1000, “Góa chia̍h chit ê thâu-lō͘ í-keng chiūⁿ 2 tang--a, m̄-koh lóng bô kă tiâu sin-súi, siūⁿ--tio̍h to̍h oàn-chheh.” Án-ne, hoān-sè tio̍h ài khì chhōe khòaⁿ ū thāi-gū khah hó ê kong-si--bô. Koh ū 1 kù sio̍k-gí: “Chiūⁿ siap to̍h bē liap!” Mā kāng-khoán sī chhiau-kòe ê ì-sù.

Chiūⁿ-sin sī kóng sîn-bêng, siâ-lêng lâi óa tī seng-khu téng, nā sī chiūⁿ-tâng, it-poaⁿ sī leh kóng sîn-bêng lâi óa, m̄ sī siâ-lêng, mā ū lâng sī kóng chiūⁿ-ki, khí-tâng.

Chiūⁿ-ba̍k sī khòaⁿ tio̍h ē kah-ì, chiūⁿ-chhiú sī leh kóng khang-khòe a̍h-sī ki-su̍t í-keng ē-tàng chhut-sai, o̍h kah chin gâu--ā, chiáng-ak kah chin hó án-ne, chiūⁿ-kioh kah chiūⁿ-chhiú, chha-put-to kāng ì-sù. M̄-koh chiūⁿ-chhiú koh ū lēng-gōa 1 chióng ì-sù, to̍h sī the̍h tī chhiú--ni̍h, chhiūⁿ kóng, “Mi̍h-kiāⁿ chiūⁿ-chhiú, lán beh chhut-hoat--ah.” “Lí che bóe-khoán, to̍h tán kah i khang-khòe lóng siu-soah, chiah thang hō͘--i, nā bô i chîⁿ nā chiūⁿ-chhiú, hoān-sè ē hō͘ lí jiok bô lâng.”

--
Hosting provided by SoundOn