【十分鐘《道德經》入門】美國大學生哲學入門課（3）：道同德有咩分別？點解要理解「道德」？丨哲學即食麵（17）丨《中國思想之淵源》

如果有一個排行榜係排緊世界上被翻譯得最多嘅著作，咁《道德經》照道理係一定上榜——淨係英文譯本就已經係琳瑯滿目，令人眼花撩亂。不過，講起嚟都幾奇怪，明明只係五千幾字，點解會搞出咁多花臣呢？

最簡單嘅答案就係，因為《道德經》呢本書仔好麻煩。我哋先唔講《道德經》現實上有好多版本（例如上集所提到嘅馬王堆帛書版），撇除林林總總嘅版本，只係關注喺依家通用嘅《道德經》版本，又稱今本《道德經》。

大約喺公元3世紀，今本《道德經》就已經定好，共有八十一章，流傳至今，已經超過一千五百年。每章從幾十字到百幾字不等，上集講到，牟復禮話《道德經》嘅行文類似於詩歌。既然係類似於詩歌，箇中嘅意涵就可以有千變萬化嘅詮釋，就好似《一人之境》、《K歌之王》係講緊一個點樣嘅故事，已經係人言人殊。廣東歌百幾二百個字都有咁多詮釋，更何況係有五千言嘅文言詩歌呢？

其實，《道德經》仲可以分成兩個部分，呢兩個部分就以書名嚟命名，於是就叫《道篇》同《德篇》（亦可以叫做《道經》同《德經》，下文就沿用牟復禮嘅用法）。《道篇》同《德篇》點樣分，有好多講法。問題關鍵在於，道同德到底係咩意思呢？之前所提到嘅「道」好難講明，而「德」亦同樣難搞。

我哋會用兩集嘅時間，睇睇牟復禮點樣幫我哋入門《道德經》。今集就睇睇道同德大概係咩意思。

建議配合集數：

• 牛哥解經（16）：牟宗三易經思想1丨玄思高於邏輯；道嘅雙重性係道家嘅玄思，而非儒家嘅玄思丨《周易哲學演講錄》第一講，〈易傳──儒家的玄思〉

• 牟宗三嘅易經哲學，其實埋藏咗佢對道家哲學嘅理解；牟宗三為道家哲學所分出嘅兩層，相當有趣。有機會你可以睇睇《才性與玄理》，無機會嘅，就睇睇佢講周易。而事實上，若然我哋將《易經》同《道德經》一齊睇，會更有趣味。

🐮 Follow IG：https://www.instagram.com/cowgortalk🐂 加入讀物農莊，一齊閱讀，一齊討論！https://www.patreon.com/cowgortalk【文稿可於Patreon免費閱讀】成為頻道會員並獲得福利：https://www.youtube.com/channel/UC6i3xQE-WhlKsu9l1cqzEQw/join【聽Podcast】🎧 Apple Podcast：https://podcasts.apple.com/podcast/id...🎧 Spotify：https://open.spotify.com/show/0yFR7YK...🎧 Google Podcast：https://bit.ly/3Cknf1m🎧 KKBOX：https://bit.ly/3RneS9t