牛哥解經（29）：細讀心經（3）——心經之泯相證性觀，解「舍利子！是諸法空相：不生不滅，不垢不淨，不增不減。是故空中無色，無受想行識。」句丨印順法師，《般若波羅蜜多心經講記

按照慣例，我哋先將「舍利子！是諸法空相：不生不滅，不垢不淨，不增不減。是故空中無色，無受想行識。」稱之為「空無諸法」句，以方便討論。 上次，我哋見到印順法師指出「舍利子。色不異空。空不異色。色即是空。空即是色。受、想、行、識，亦復如是。」（「不異即是」句）係一句加行——不過，由於呢種講法只係加行觀，終究未到終極。所以印順話：「但如滯留於此，不能親證空性，戲論於 『有即是空，空即是有』，即偏於內在的，即每每會落入泛神、理神的窠臼， 甚至圓融成執，弄到善惡不分，是非不辨。」 呢點佢喺《佛法是救世之光》當中有更詳細講述。佢表示「不異即是句」當中嘅「色即是空」、「空即是色」「是被精簡了的，被公式化了的成語。」而佢點出咗一個特別嘅讀法——將「不異即是」句嘅前後句抽出，並列嚟睇。 一標：「照見五蘊皆空，度一切苦厄」 二釋：「舍利子！色不異空，空不異色；色即是空，空即是色。受、想、行、識，亦復如是」（「不異即是」句） 三結：「舍利子！是諸法空相，不生不滅，不垢不淨，不增不減。是故空中無色，無受、想、行、識」。」（「空無諸法」句） 呢種講法幾有趣。我哋有機會嘅話，之後再出一集講講將三段句子並列可以得出一個點樣嘅觀法。但我哋今次會完成咗「空無諸法」句先，印順指呢句係「泯相證性觀──正證」，到底佢比「不異即是」句進深咗幾多呢？