【原始富裕，定原始殘忍？】採集時代係「伊甸園」定係「修羅場」？人類社會係進步定退步緊？丨生活雜談EP46丨《人類大歷史》（6）丨哈拉瑞史觀5.2

歷史書通常由農業革命講起，好似喺起金字塔之前，人類就只係渾渾噩噩咁過日子。我哋對嗰六萬年嘅採集時代，除咗「石器」同「骨頭」之外，幾乎一無所知。 但如果話，其實呢班農業革命前嘅祖先生活得比你好，你又會唔會相信？ 哈拉瑞認為狩獵採集嘅生活方式會因應地區同季節有所不同，但整體嚟講，比起後來嘅農夫、牧羊人、工人或者上班族，佢哋嘅生活好似更加舒適，仲更有意義。 因為喺現代嘅富裕社會，平均每週工時係40到45小時，發展中國家就60個鐘以上，甚至去到80個鐘；但如果係狩獵採集者，就算住喺最貧瘠嘅地區（例如喀拉哈里沙漠），平均每星期都只係需要工作35到45小時。佢哋大概每三日打一次獵、每日採集3到6小時。一般時期，咁就足以養活整個部落。而好可能大多數遠古採集者住嘅地方，比起喀拉哈里沙漠更加肥沃，所以搵食物同原材料所需嘅時間會仲少。 呢種採集經濟，可以令大多數人擁有比農業社會或者工業社會更加有趣嘅生活。佢哋每日只需要做幾個鐘頭嘢，食嘅嘢比你有營養，無車貸樓貸，無老闆捽數，甚至被人類學家稱為「最初的富裕社會」。 聽落好似天堂咁？但係咪真係咁完美？ 另外，咁代唔代表古人有住一個更加「善良」嘅生活樣態呢？我哋就要從考古證據嚟睇睇。內容包括： 原始富裕：我哋會一齊以忙碌、營養、災難、傳染病方面，對比一下採集社會同農業／工業社會 原始殘酷（原始bully）：巴拉圭叢林入面，曾經有一個狩獵採集部落「亞契人」（Aché）生存到1960年代，佢哋可能可以畀我哋一窺採集生活嘅黑暗面…… 泛靈信仰：我哋會睇下泛靈信仰嘅特點，以及理解古代泛靈信仰點解咁困難 採集者之社會政治規範：我哋會睇睇喺1955年搵到嘅一處三萬年前嘅索米爾墓地遺址——索米爾係屬於一種狩獵長毛象嘅文化。從墓地，我哋可以睇到咩社會政治規範？ 和平天堂、定係戰爭煉獄：曾經有三項研究，同樣研究咗喺農業革命前夕喪命嘅遺骨，佢哋可唔可以幫我哋理解遠古人類到底有無出現戰爭呢？ 結語 依家，我哋嘗試拼湊碎片，還原呢班「四處遊蕩、講著故事的智人」嘅真實面貌，睇吓佢哋係點樣喺沉默中，塑造咗今日嘅世界。並且思考：佢哋係活喺伊甸園嘅逍遙隱士，定係喺血腥煉獄中掙扎嘅求生者？