Summarmorgun

Kringvarp Føroya
  • 0.0 (0)
  • News

Summarmorgun bjóðar samrøður og frásagnir við aktuellar gestir kring landið. Summarmorgun kann hoyrast gerandismorgnar frá 7:35 til 9:00.

  1. 6 hr ago

    Bilurin endaði inni í salongini

    Hárfríðkanaryrkið er nógv broytt farnu 40 árini, hóast talan framvegis er um eitt kroppsligt arbeiði, har ið saksur og kambur eru mest brúktu amboðini. Samstundis eru nógv tól komin afturat, eins og kemisku evnini eru munandi færri í dag enn fyri 40 árum síðani. Hársniðini broytast eisini. Tá Karin og Vera fóru í læru vóru tað nógvar tilkomnar kvinnur, ið fingu permanent. Og so vóru tað lambakrúllurnar, sum bæði kvinnur og menn høvdu í 1980-árunum, meðan tað í dag serliga eru dreingir, sum eru um 14 ára aldur, ið permanenta sær. Hetta 40 ára skeiðið telur eisini nógvar stuttligar og áhugaverdar søgur, og eitt nú minnist Vera, tá ein bilurin endaði inni á salongini, sum var full av fólki. Eisini hugleiða Karin og Vera um hvussu tað var at gera hárið til einu Eurovisionfinaluna. Tú kanst hoyra alla samrøðuna við Karin Sólsker, ið rekur Karin'sa, og Veru Larsen, ið rekur Vera Klipt, her!

  2. 7 hr ago

    Fleiri túsund hugdu eftir kokkakapping

    Eitt av teimum spennandi tiltøkunum á Sjómannadegnum í Klaksvík leygardagin var, tá sjey ungir kokkar undir 24 ár kappaðust móti hvørjum øðrum. Tað var í kokkakappingini Arctic Young Chef, sum NORA upprunaliga tók stig til,  men sum matvøruútbúgvingin á Tekniska Skúla í Klaksvík nú skipar fyri.   Eitt av spennandi tiltøkunum á Sjómannadegnum í Klaksvík leygardagin var, tá sjey ungir kokkar undir 24 ár kappaðust móti hvørjum øðrum. Tað var í kokkakappingini Arctic Young Chef, sum NORA upprunaliga tók stig til, men sum matvøruútbúgvingin á Tekniska Skúla í Klaksvík nú skipar fyri. Tey skuldu brúka havtasku til forrættin og blálongu til høvuðsrættin og so brúka nakrar ávísar kryddurtir. Ungu kokkarnir høvdu sjálvir evnað rættin til og skuldu lata eitt yvirlit við øllum inn áðrenn kappingina. So skuldu dómararnir hyggja, um úrslitið samsvaraði við uppskrivtina. Tá avtornaði vann Lassi Havsteinsson kappingina. Mogens Højsted var nummar tvey og Krista Kjærbo nummar trý. - Eg eri vísur í, at ein slík kapping stimbrar undir áhugan fyri kokkayrkinum, sigur Lassi Havsteinsson Klein, vinnari. Tað væntar Rannvá Beder, dómarakokkur í kappingini, eisini og tað hava vit brúk fyri, tí vit hava ov fáar kokkar, sigur hon. Henda kappingin er undankapping til eina finalu í Íslandi millum vinnararnar úr Føroyum, Grønlandi, Norra og Íslandi. Andras Sigmarsson Jacobsen, leiðari fyri kokkaútbúgvingini á Tekniska Skúla í Klaksvík, sum hevði ábyrgdina av hesari kappingini, ivast ikki í, at kappingin verður aftur.

  3. 7 hr ago

    Til Sjómannadag við 142 ára gomlum fari

    Fríggjakvøldið samlaðust gomlu træskipini í Leirvík, har siður er at skipa fyri felagssangi og øðrum undirhaldi fríggjakvøld. Leygarmorgunin kl. 8 varð kósin so sett móti Klaksvík. Skipari á Westward Ho henda túrin er Andras Vinther, og hann greiðir í Summarmorgni frá. Tosað verður eisini við Hanns David Hansen, sum hevur siglt fast við Westward Ho síðani 2006. Og Hanna Jensen, forkvinna í mentanarnevndini í Eysturkommunu, hevur ofta verið við henda túrin úr Leirvík norður á Sjómannadagin og tað var hon aftur leygarmorgunin. -Eg haldi at tað er nakað heilt serligt at koma siglandi inn á vánna í Klaksvík henda morgunin umborð á einum gomlum mentanararvi frá 1884, sigur Hanna Jensen.   13 ára gamli Benjamin og 12 ára gamli Jógvan, báðir úr Leirvík, sleppa at standa til róðurs umborð á Westward Ho og skiparin Andras Vinther leggur teimum lag á. Teir undrast at skipið kann vera 142 ára gamalt. -Tað er avbera stórur áhugi fyri sluppunum, og vit verða bidnir um at koma við til øll møgulig tiltøk um summarið.  Og vit eru so hepnir, at fólkagrundarlagið hjá Westward Ho er so stórt og tí mangla vit ongantíð manning at sigla skipið, sigur Andras Vinther. Hann sigur at teir verða altíð sera væl móttiknir á Sjómannadegnum. Veðrið á Sjómannadegnum í ár var framúr gott, so nógv fólk vitjaði umborð meðan sluppin lá við bryggju í Klaksvík. Hini gomlu førini, sum vóru við í fylginum til Sjómannadagin hesaferð, vóru Jóhanna, Thorshavn, Dragin, og so teir báðir gomlu útróðrarbátarnir Norðan og Grinkil.

  4. 11 hr ago

    Summarmorgun

    1. september eru 40 ár liðin síðani Karin Sólsker og Vera Larsen fóru í læru sum hárfríðkanarkvinnur. Hví valdu tær hesa útbúgvingina og í hvønn mun er hárfríðkanaryrkið broytt hesi árini er millum spurningarnar, vit spyrja tær. Eitt av teimum spennandi tiltøkunum á Sjómannadegnum í Klaksvík hesaferð var ein kokkakapping fyri ungar kokkar undir 24 ár. Hetta er ein norðurlendsk kapping, sum NORA upprunaliga tók stig til, men sum kokkaútbúgvingin á Tekniska Skúla í Klaksvík nú skipar fyri. Leygardagin vóru FLEIRI 1000 áskoðarar tá ungu kokkarnir arbeiddu, og tey sum skipa fyri ivast ikki í, at kappingin fer at økja um áhugan hjá ungum og børnum at gerast kokkur. Sjómannadagarnir vóru í farnu viku, og Tórður Mikkelsen mynstraði umborð á Westward Ho í Leirvík og var við til Klaksvíkar leygarmorgunin.

  5. 12 hr ago

    Summarmorgun

    Summarmorgun

  6. 3 days ago

    Ungir kokkar kappast á Sjómannadegnum

    Sjey ungir kokkar undir 24 ár fara at kappast í einum tjaldi á Sjómannadegnum í morgin. Hendan kappingin er liður í einari størri norðurlendskari kapping fyri ungar kokkar. Andras Sigmarsson Jacobsen, sum er leiðari fyri matvøruútbúgvingina á Tekniska skúla í Klaksvík og samskipar hesa kappingina, sigur, at talan er um eina norðurlendska kapping fyri ungar kokkar, ið NORA tók stig til fyri tveimum árum síðani, og nú er stafettin latin Tekniska skúla í Klaksvík. Sjey eru við i hesari kappingini, sum fer fram í stóra tjaldinum á Sjómannadegnum í morgin. Fólk hava høvi at fylgja við meðan teir arbeiða. -Meiningin við hesari kappingini er eisini at varpa ljós á rávøru, sum vit brúka ov lítið av í Føroyum. Og nú Sjómannadagur er, hava vit gjørt av at brúka fisk, og tað verður havtaska og blálonga. Tað eru tvey fiskasløg, sum ikki øll hava roynt. Áhugavert verður at síggja hvat ungu kokkarnir fara at finna uppá, sigur Andras -Eg eri eitt sindur nervøsur, men eg eri klárur til í morgin, sigur ungi kokkurin, Mogens Højsted úr Klaksvík, sum er ein av teimum sjey. Honum dámar væl at brúka fisk sum rávøru og grønmeti afturvið. Og tað sleppur hann til fulnar í morgin. Mogens sigur, at havtaska er eitt serstakt fiskaslag og líkist ongum øðrum. Og blálonga er ógviliga lítið brúkt, men er ein leskiligur fiskur, sum er bæði mildur og moyrur. Kappingin byrjar kl. 9.00 í morginári og tað verða 10 minuttir ímillum at kokkarnir fara í gongd. Tann seinasti verður eftir ætlanini liðugur kl. 15.20, og so verður kunngjørt á stóra palli hvør hevur vunnið. Vinnarin fer víðari til eina finalu í Íslandi tíðliga næsta ár.  Nógvir kokkar í Føroyum eru útlendingar og teir gera eitt gott arbeiði, men Andras Sigmarsson Jacobsen dylur ikki fyri, at eitt av endamálunum við kappingini er at fáa fleiri ungar føroyingar at blíva kokkar.

  7. 3 days ago

    Fólk eru góð við Sjómannadagin

    Á hvørjum ári síðani 2005 hevur sjómannadagur verið hildin í Klaksvík. Tey fyrstu árini var tiltakið á Stongunum, men síðani 2014 hava øll felagstiltøkini verið á vestursíðuni. -Fólk eru góð við Sjómannadagin og vælvildin er stór . Nógv fólk brúka eitt ótal av tímum at hjálpa til. Hjá okkum í nevndini er tað mangan nóg mikið við einari telefonsamtalu, og so fara fólk og fyritøkur í gongd við síni tiltøk, sigur Eyðstein Poulsen, formaður í nevndini fyri Føroya Sjómannadag.  -Tað hugaliga er at alt er ókeypis og tað hevur frá fyrsta degi verið eitt mál. Eyðstein Poulsen heldur at Sjómannadagurin varpar ljós á fiskivinnuna og sjóvinnuna. -Nú eri eg sjálvur lærari og vit síggja, at miðnámsskúlar og stovnar koma inn í skúlan tá tað nærkast summarferiuni fyri at kunna um tað tað tey hava at bjóða. Vit síggja lítið til vinnuna, og tí kemur Sjómannadagurin væl við, sigur Eyðstein. Hann sigur, at Sjómannadagurin hevur roynt at vera traditionellur, men kortini eru altíð onkur nýggj ting á skránni. Og tað sær út til at tey hava rakt rætt, tí fleiri og fleiri fólk koma á hvørjum ári til Klaksvíkar úr øllum landinum. -Tað mest umráðandi fyri okkum er, at øll fáa ein góðan dag og fáa innlit í vinnuna, og eg føli at tað eydnast, sigur Eyðstein Poulsen. Hoyr her samrøðuna við Eyðstein Poulsen í Summarmorgni.

  8. 3 days ago

    Kvinnurnar sleppa at kappast fyri seg

    -Sjómannadagurin hevur týdning fyri Klaksvík og allar Føroyar, og tað er stuttligt at síggja at nógvir útlendingar, sum eru í landinum, eisini møta upp á sjómannadegnum og eisini njóta alt tað sum fæst at eta ókeypis, sigur Rannvá Isaksen, næstforkvinna í nevndini fyri Sjómannadagin í Klaksvík. Hesi seinastu árini hevur Sjómannadagurin gjørt meira burtur úr tiltøkum fyri børnunum. Rannvá sigur, at tað er umráðandi at børnini kunnu fáa sínar egnu upplivingar samstundis sum tey vaksnu uppliva sítt. -Í fjør var fyrsta árið at kapping var fyri kvinnur at halda dregg. Tað er ikki bara bara, tí tú skalt halda tað beint út frá tær. Tað verður spennandi at vita hvussu nógvar kvinnur møta upp til kappingina. Men eg veit at summar kvinnur hava vant hetta, sigur Rannvá. Hon ásannar, at tað hevur ikki verið líka lætt at fáa kvinnur at møta upp sum menn, men nú kapping eisini er fyri kvinnur burturav, sær tað út til at kvinnurnar hava betri hug at møta upp, sigur Rannvá Isaksen.   Lurta eftir samrøðuni Við Rannvu Isaksen her.

See All (50)

About

Summarmorgun bjóðar samrøður og frásagnir við aktuellar gestir kring landið. Summarmorgun kann hoyrast gerandismorgnar frá 7:35 til 9:00.

Information

  • Creator
    Kringvarp Føroya
  • Years Active
    2013 - 2026
  • Episodes
    50
  • Rating
    Clean
  • Copyright
    © All rights reserved.
  • Show Website
    Summarmorgun

More From Kringvarp Føroya

You Might Also Like