Nabzology

Nabeel Hafez

5.0 (1)
NATURE

احلى مسا عليكم

2 HR AGO

الحياة من وجهة نظر الحمامة

تعرف إن "حمامة" اللي واقفة تبربشلك في البلكونة دي.. ممكن تكون أنقذت جيش كامل من الهلاك المحقق؟ آه والله يا صاحبي. الكائن اللي إحنا واخدين عنه فكرة إنه "عبيط" وبيمشي يهز دماغه.. ده كان حرفياً "واتساب" الملوك والفراعنة زمان. يعني قبل ما يبقى في موبايلات وأقمار صناعية وتلغراف.. كانت "الحمامة" هي "الواي فاي" بتاع العالم القديم. وهي اللي شايلة رسايل الغرام والحرب والأسرار على جناحاتها. المصريين القدماء قدسوها.. واعتبروها رمز للروح الطاهرة اللي بتطلع للسماء. والإغريق والرومان اعتمدوا عليها عشان يعرفوا مين فاز في الأوليمبياد. ده غير إن في الحروب العالمية الأولى والثانية.. الحمام خد نياشين ورتب عسكرية زي الجنرالات بالظبط. لما اللاسلكي كان بيقطع والشبكة تقع.. كانت هي الوحيدة اللي بتخترق الرصاص والنار عشان توصل "الإحداثيات". يعني إحنا قدام كائن محارب برتبة "طيار مقاتل".. متنكر في ريش رمادي وشوية هديل. دة غير إن عندها "جي بي إس" رباني في دماغها.. لحد النهاردة العلماء هيتجننوا ويعرفوا بيشتغل إزاي. ممكن ترميها في بلد تانية.. على بعد آلاف الكيلومترات.. وترجع لبيتها وعشها بالمللي.. بتستخدم مجال الأرض المغناطيسي كأن عندها بوصلة في منقارها. ولا كأنها حافظة خريطة جوجل إيرث صم. ده غير السرعة يا معلم.. أنت بتتكلم في كائن بيوصل سرعته لـ 140 كيلومتر في الساعة! يعني أسرع من الميكروباص اللي بيجري على الدائري دلوقتي. بس طبعاً الزمن جار عليها.. وتحولت من "رسول الملوك" و "بطل الحرب".. لـ "ضيف تقيل" بنعمله خيال مآتة عشان ميبوظش التكييفات.

22 min
3 DAYS AGO

الحياة من وجهة نظر الحمار الوحشي

تعرف إن الحمار الوحشي العسل ده ، هو في الحقيقة واحد من أشرس وأجدع المقاتلين في قلب السافانا الأفريقية؟ آه والله يا صاحبي، ده احد الغشما في الغابة ٬ واللي عامل "بار كود" على جسمه عشان يحير الأعداء ويشفر تحركاته. رفصة واحدة من الحمار الوحشي يا تشكيس ، قادرة تكسر فك أسد جعان وتخليه يعتزل مهنة الصيد للأبد؟ يعني هو مش "كيوت" ولا غلبان خالص زي ما بنشوفه في أفلام الكرتون. وتاريخه مع البشر حكاية قديمة ومليانة هيبة وغموض. الرومان القدماء أول ما شافوه في الملاعب الرومانية سموه (Hippotigris). يعني "الحصان النمر"، ودا من كتر الهيبة والشراسة والسرعة اللي شافوها فيه ومقدروش يروضوه. وفي الأساطير الأفريقية القديمة، بيقولوا إن الزيبرا كان أبيض سادة ٫ لكنه دخل في خناقة مع "بابون" شرير ٫ ووقع في نار هي اللي رسمت الخطوط دي على جسمه للأبد. الكائن ده بيشوف الدنيا "أبيض وإسود" فعلياً، والخطوط بتاعته دي مش مجرد "ستايل" يا أبو الشكايس. دي تكنولوجيا تمويه ربانية بتعمل "زغللة" لعين النمر والأسد ٫ فلما بيتحركوا في قطيع يا معلم ، المفترس ساعتها مبيعرفش أول الحمار من آخره. تخيل إن مفيش حمار وحشي في الدنيا خطوطه شبه التاني، كأنها بصمة صباع خاصة بكل واحد فيهم. وبيقدر يجري بسرعة توصل لـ 65 كيلومتر في الساعة، يعني يقدر يسابق "تومناية" على طريق اللبينى عادي جدا.

23 min
16 FEB

الحياة من وجهة نظر الثعلب

تعرف إن التعلب بيقدر يسمع صوت دقة الساعة من على بُعد 40 متر، ويسمع خرفشة فار مستخبي تحت نص متر تَلج؟ آه والله يا صاحبي، يعني ودان التعلب دي مش مجرد "إكسسوار" يا أبو الشكايس، دي رادارات عسكرية متطورة بتشتغل بنظام الأقمار الصناعية. التعلب ده هو "النينجا" الحقيقي بتاع الطبيعة، خِفّة ومناورة وذكاء يخلي أجدع نصاب يلم تلامذته ويمشي. تاريخه مع البشر حكاية كبيرة، والناس دايماً كانت شايفة فيه "السر" والغموض. في اليابان القديمة، كانوا بيعتقدوا إن التعلب أو "الكيتسوني" ده كائن أسطوري ، عنده قوى خارقة وممكن يتحول لبني آدم عشان يضحك عليهم. وفي بلاد الرافدين، التعلب كان هو رسول الآلهة، والكائن اللي بيعرف "الزتونة" ويوصل الأخبار من غير ما حد يحس بيه. التعلب ده "مهندس" تمويه عبقري، عينه فيها حدقة عمودية زي القطة بالظبط، وده بيخليه يشوف في الضلمة كأنه لابس نظارة رؤية ليلية. وبيقدر يجري بسرعة توصل لـ 50 كيلومتر في الساعة.

19 min
12 FEB

الحياة من وجهة نظر الأرنب

تعرف إن الارنب بيقدر يلف ودانه 270 درجة ، عشان يلقط ذبذبة جناحات دبور معدي من على بعد كيلو؟ آه والله يا صاحبي، يعني ودان الأرنب دي مش مجرد زينة يا أبو الشكايس، دي "رادارات" عسكرية شغالة ستالايت 24 ساعة. الأرنب يا شكس بيقدر يجري بسرعة توصل لـ 50 و70 كيلومتر في الساعة. يعني يقدر يسبق ال ٢٧ بتاعتك على الدائري ، ويطلع منها غرزة بالحب كدا. الكائن اللي إحنا بنشوفه بياكل جزر في أفلام "لوني تونز"، تاريخه مع البشر حكاية كبيرة وعميقة. في مصر القديمة الأرنب كان رمز للذكاء والسرعة الفطرية، وكانوا بيمثلوه بالإلهة "أونيت" اللي كانت بتحمي الأرض بقوة الحذر. وفي أساطير شعوب الأزتيك، كانوا بيشوفوا صورة أرنب على وش القمر وهو بيطحن الأعشاب، كأنه فيلسوف الفضاء الأول. الأرنب ده مهندس حفر عبقري، بيبني مدن كاملة تحت الأرض اسمها "وارينز" (Warrens). فيها ممرات، وغرف نوم، وحضانة، ومخارج طوارئ تخلي أجدع مهندس معماري يهرش في راسه من الانبهار. وعينه دي حكاية تانية خالص، بيقدر يشوف 360 درجة حوالين نفسه وهو واقف مكانه من غير ما يلف راسه. يعني مفيش غدر ممكن يجيله من ورا ضهره ، من غير ما "السيستم" يلقطه ويقوله "اخلع يا برنس".

22 min
24 JAN

الحياة من وجهة نظر الشمبانزي

تعرف إن الشمبانزي بيشاركك في حوالي 99% من حمضك النووي (DNA)؟ اه والله يا صاحبي يعني الفرق بينك وبينه يا أبو الشكايس، هو واحد في المية "تحابيش" وبهارات بس. يعني هو تقريباً ابن عمك اللزم، بس قرر يكمل حياته في الغابة من غير ديون ولا أقساط. الشيمبانزي ده مش مجرد قرد بيقشر موز يا بابا. ده دبابة عضلات متنقلة، وعنده قوة عضلية تفرتك جون سينا في ثانية. وتاريخه مع البشر حكاية يطول شرحها ومترسخة في أساطير العالم. في غرب أفريقيا، كانت القبائل بتشوف الشيمبانزي كأنه "إنسان" بطل يتكلم بمزاجه. عشان ميتسخرش في الشغل والعبودية، فقرر يعيش بحريته في قلب "الغابة. الكائن الخارق ده بيشوف الدنيا بتفاصيل إحنا مش بنلاحظها. عقله شغال زي الكمبيوتر في ال save mode، بيحسب كل خطوة وكل "نطحة" غصن.

26 min
23 JAN

الحياة من وجهة نظر خنفساء هيركوليس

تعرف إن خنفساء هيركوليس هي أقوى كائن حي على وجه الأرض بالنسبة لحجمه؟ آه والله يا صاحبي، دي مش مجرد حشرة معدية في حالها. ده بطل كمال أجسام بالفطرة، وشايل "تَقْل" يهد جبال. تخيل إن الباشا ده يقدر يشيل 850 ضعف وزن جسمه! يعني لو هيركوليس ده كان في حجمك يا أبو الصحاب، كان زمانه بيشيل 10 عربيات نقل "تريلا" فوق ضهره وبيمشي بيهم "تاتا تاتا" ولا كأنه شايل حاجة. الكائن المدرع اللي شكله طالع من معمل تجارب سرية، طوله ممكن يوصل لـ 17 سنتيمتر، يعني قد الموبايل اللي في إيدك دلوقتي. وعنده قرون طالعة من راسه وضهره كأنها "كماشة" فولاذية جاهزة تطحن أي حد يفكّر يرازيه. بس قبل ما نخش في تفاصيل "العضلات" ونشوف القوة الغاشمة، تعالوا نرجع بالزمن لورا شوية ونشوف الدبابة دي ايه قصتها في "التاريخ والثقافات القديمة" . الخنفساء دي مخدتش اسم "هيركوليس" من فراغ يا شكس. في الأساطير اليونانية القديمة هيركوليس كان البطل الخارق ابن الآلهة، وصاحب القوة اللي مفيش زيها. القدماء لما شافوا الخنفساء دي في غابات أمريكا الوسطى والجنوبية، اتصدموا من قدرتها على رفع أوزان خرافية مقارنةً بحجمها الصغير. فسموها على اسم البطل الأسطوري "هيركوليس" عشان تكون هي "هرقل" عالم الحشرات. وفي ثقافات الشعوب الأصلية في غابات الأمازون، كانوا بيبصوا للخنفساء دي كرمز للقوة الجسدية والتحمل والمثابرة. كانوا بيعتبروها "محارب غابة" لابس درع واقي مبيتكسرش، وقرونها دي كانت بتُلهمهم في صنع أسلحتهم وتصميماتهم القتالية. حتى في العصور الحديثة، لسه هيركوليس هي "التريند" في عالم الحشرات، والناس بتسافر آلاف الكيلومترات بس عشان تلمح "العملاق" ده وهو طاير في الغابة.

28 min
16 JAN

الحياة من وجهة نظر قرش جرينلاند

تعرف إن قرش جرينلاند هو الكائن الفقاري الأطول عمراً على وجه الأرض؟آه والله يا صاحبي،ده مش مجرد سمكة،ده "تاريخ" ماشي على زعانف.تخيل كائن ممكن يعيش لـ 400 أو 500 سنة!يعني "قرش جرينلاند" اللي موجود دلوقتي في قاع المحيط،ممكن يكون حضر بناء تاج محل،وشاف الثورة الفرنسية،وعاصر الحرب العالمية الأولى والثانية،وهو لسه "شاب" في مقتبل العمر.الكائن العجيب ده يا شكس،دمه مليان بمواد بتمنع التجمد عشان يعيش في ميه تحت الصفر،وحركته بطيئة لدرجة تخلي "الكسلان" يبان جنبه "يوسين بولت".عايش في ضلمة وبرد ومكان مفيش فيه غير السكون،ومع ذلك هو "ملك" منطقته بلا منازع.بس قبل ما نغوص معاه في الأعماق،تعالى نشوف الشعوب القديمة كانت شايفة "قرش جرينلاند" ده إزاي.في أساطير "الإنويت" (سكان القطب الشمالي القدماء) يا أبو الصحاب،كان لقرش جرينلاند مكانة غريبة ومخيفة.كانوا بيسموه "Skalugsuak"،وبيقولوا إنه كائن أسطوري بيعيش للأبد عشان يحرس أسرار المحيط المتجمد.عند "الإنويت" في "جرينلاند"،طلعت أسطورة بتقول إن القرش ده اتخلق من "فوطة" ست عجوزة غسلت شعرها بميه البول،وعشان كده لحمه مليان ريحة "أمونيا" قوية جداً.أما في ثقافة "الفايكنج" في آيسلندا،فالموضوع دخل في "المعدة" وش،لانهم اخترعوا منه أكله اسمها "هاكارل" (Hákarl).لحم القرش ده في الطبيعي "سام" جداً يا معلم،لأنه مليان يوريا وأكسيد ترايميثيلامين،يعني لو أكلته طازه هتروح فيها فوراً.بس الفايكنج بدماغهم الناشفة قرروا ميسيبوش "قرش جرينلاند" في حاله،بقوا يدفنوا لحمه تحت الأرض لشهور عشان يتخمر،وبعدين ينشفوه في الهوا لحد ما السموم تروح،وبقت دي الأكلة القومية اللي بتمتحن شجاعة أي حد يقرب منها وريحتها بتجيب من آخر المحيط."قرش جرينلاند" بالنسبة ليهم كان رمز للصمود،كائن بيتحمل اللي مفيش مخلوق بشري يقدر يتحمله،وبيعيش في صمت تام لمئات السنين تحت طبقات التلج.

33 min
15 JAN

الحياة من وجهة نظر الحرباية

تعرف إن الحرباية دي مش مجرد سحلية ملونة بتتمشى في الشجر وخلاص؟لأ يا صاحبي، دي كائن كسر كل قوانين الفيزياء والبيولوجيا اللي إحنا نعرفها، وعمل لنفسه "كتالوج" خاص بيه لوحده.الناس فاكرة إن الحرباية بتغير لونها عشان "تستخبى" وبس،وده أكبر ظلم تاريخي اتعمل في حقها.الحقيقة العلمية يا شكس إن تغيير اللون ده هو "لغة" كاملة، هو "الفيسبوك" و"الواتساب" بتاع عالم الزواحف.الحرباية لما بتقلب لونها أحمر غامق أو أسود، هي مش بتستخبى في فحم، هي بتزعق وبتقولك "أنا عفاريت الدنيا بتنطط في وشي، ابعد عني الساعة دي عشان مروقكش".ولما بتقلب ألوان زاهية وفاتحة، ده معناه إن الهرمونات مظبوطة، والمزاج رايق، ومستعدة للحب أو للأكل.يعني هي "لمبة نيون" ماشية بمشاعرها، مش مجرد جاسوس بيلبس بدلة تخفي طول الوقت.

24 min

شغل عالي يا تشكيس ☝🏻

29/12/2025

Mvllic

استمر يا شكس 🫶🏻

احلى مسا عليكم

Creator

Nabeel Hafez
Years Active

2025 - 2026
Episodes

35
Rating

Clean
Copyright

© Nabeel Hafez
Show Website

Nabzology