Entreliñas

Xunta de Galicia

0,0 (0)
Arte

A Xunta de Galicia pon en marcha o proxecto Entreliñas, un podcast literario destinado a dar a coñecer a actualidade literaria galega a través das bibliotecas públicas. Trátase dun programa en formato magazine radiofónico presentado por Teresa Cuiñas e Eva Mejuto no que tratan diferentes aspectos sobre o mundo da literatura, a edición, a lectura, etc.

11/09/2025

Cousas de Castelao

No capítulo deste mes poñemos o foco no Ano Castelao, arredor da poliédrica e inmensa figura do autor, artista e político galego. Falamos con Manuel Rei sobre a obra "Castelao, desta terra e deste tempo” e con Montse Fajardo sobre “A vida incerta”, a biografía de Virxinia Pereira Renda. Achegámonos ao Museo de Pontevedra, onde están conservados os fondos e a obra do autor, para escoitar a súa directora Ángeles Tilve. Quixemos saber máis sobre a exposición “Castelao. Mirar por Galicia”, unha experiencia de arte dixital que está na Cidade da Cultura e preguntámoslle aos comisarios Miguel Anxo Seixas e Carlos Seijo. E no apartado de clubs de lectura, Nee Barros achéganos a actividade lectora de Avante LGBT Pontevedra. Escoitamos o único rexistro da voz de Castelao, grazas ao Arquivo sonoro de Galicia, do Concello da Cultura Galega e enfiamos os contidos coas músicas “Irmao Daniel” da Quenlla, “Lela” de Carlos Núñez na voz de Dulce Pontes e a versión orixinal da Rianxeira. Fixemos este podcast Luz Pérez Costas e Eva Mejuto nos micros, Denis Losada na técnica e Belén Freijeiro na produción.

54 min
16/05/2025

Axudádeme a cantar

Esta capítulo do mes de maio está dedicado integramente á música tradicional, ás nosas cantareiras, homenaxeadas no Día das Letras Galegas. Recollemos recomendacións lectoras arredor do patrimonio oral musical e entrevistamos a Montse Rivera, fundadora do senlleiro grupo Leilía que, con Felisa Segade, están a desenvolver o espectáculo “Axudádeme a cantar” para público mozo, vinculado á obra de Marcos Calveiro “Agora que vén a noite”, editado por Galaxia. Falamos tamén coa cantareira Maite Casás, que botou para nós dúas pezas ao ar. No apartado de bibliotecas, falamos coa responsable da Biblioteca de Rianxo, Sofía Carou e con Xosé Luis Dopico, da biblioteca do CEIP Brea Segade de Rianxo. Enfía o capítulo a música de Leilía e fondo musical da Biblioteca de Rianxo e do cancioneiro tradicional elaborado pola comunidade educativo do CEIP Brea Segade. Entre coplas e libros fixemos este podcast Luz Pérez e Eva Mejuto nos micros, Denis Losada na técnica e Belén Freijeiro na produción. O podcast Entreliñas é unha iniciativa da Consellería de Cultura, Lingua e Xuventude da Xunta de Galicia.

58 min
24/04/2025

Libros para quererse ben

Nesta terceira xeira do podcast incorporamos a voz de Luz Pérez Costas ao equipo de Entreliñas. Entrevistamos a Fina Casalderrey e falamos sobre o conxunto da súa obra e das súas recentes candidaturas aos premios Hans Christian Andersen e Astrid Lindgren. Asistimos ao renacer da revista Criaturas de Literatura Infantil e Xuvenil, da man de Daniel Landesa, Miguel Vázquez Freire e Tensi Gesteira. Ledicia Costas falounos de “Feriópolis”, a obra coa que vén de ganar o Premio Barco de Vapor. E acompañamos a Remedios Cid na nova ruta por Ourense Occidental da biblioteca móbil da Xunta de Galicia, a Furgoteca. Todos estes contidos enfiados coa voz e a música de faia, co seu último traballo: “Alvela”; os temas que nos acompañan son “Toutón”, “Dona Alvela” e “E se queres”. E unha lembranza moi especial para o noso querido Marcos López, impulsor deste podcast, coa súa canción preferida de Mondra: “Quererse ben”. E queréndonos ben, entre libros, fixemos este podcast Eva Mejuto e Luz Pérez Costas aos micros, Denís Losada na técnica e Belén G Freijeiro na producción.

47 min
04/07/2024

O oficio de editar

Romanticismo, compromiso e profesionalización son vectores que atravesan a historia da edición en galego ata os nosos días, en que a carón das empresas xeralistas que logran manterse xorden pequenos selos especializados. Neste capítulo de Entreliñas, falamos do oficio de editar con Fran Alonso, director de Xerais, e con Vanesa Rodríguez, responsable de Néspera Editora. Tamén festexamos o centenario do Seminario de Estudos Galegos cunha exposición sobre o papel das mulleres nesta institución, cunha conversa coa súa comisaria Carina Fernández Faya. E pasamos as páxinas destas conversas entreliñadas coas pezas musicais: “Aire”, “Maneo de Cambre” e “Buchimitsa”, de Caamaño e Ameixeiras. Este capítulo fixémolo Belén García Freijeiro na produción, Marcos López, Teresa Cuíñas e Eva Mejuto na redación e Denís Losada na técnica.

47 min
04/07/2024

Negra e criminal

Neste capítulo facemos un percorrido pola historia da novela negra e policíaca galega Falamos cos escritores Pedro Feijoo e Sara Vila e axexamos nas lecturas do Club de Lectura de Novela Negra da Biblioteca de Ourense, interrogando a Rosa Díaz Naya e a Julia Amalia Rodríguez. As pezas musicais que nos acompañan son “Ruando”, “Saco de pulgas” e “Aghrúuu” do artista, cantareiro e bailador Mondra. E os culpables desta negra e criminal achega somos Belén García Freijeiro na produción, Marcos López, Teresa Cuíñas e Eva Mejuto na redacción e Denís Losada na técnica.

45 min
04/07/2024

Ninguén morreu de ler poesía

Para este novo episodio de Entreliñas pedímoslles prestado o título deste programa ao primeiro libro conxunto de Lucía Aldao e María Lado (Edicións Xerais de Galicia), e algunhas das cancións do dúo. Nel coñeceremos o proxecto “12 meses, 12 libros” do grupo de Bibliotecas Municipais José Saramago de Santiago de Compostela da man de Cecilia Valiño Cid, o poeta e editor Antón Lopo fálanos da editora Chan da Pólvora, especializada en versos, e conversamos coa escritora Yolanda Castaño, Premio Nacional de Poesía en 2023 por Materia. Tamén contamos co acompañamento poético musical de Lontreira. Entreliñas somos Belén García Freijeiro na produción, Marcos López, Teresa Cuíñas e Eva Mejuto na redacción e Denís Losada na técnica e queremos demostrar que, efectivamente, ninguén morreu de ler poesía. É máis, mesmo cumpriría inxerila por prescrición médica.

53 min
04/07/2024

Máis música, por favor!

Percorremos, neste capítulo de Entreliñas, os sucos da literatura e da música da man dun bo coñecedor deste mundo compartido, o escritor Lois Pérez; falamos coa acordeonista Sonsoles Penadique sobre Os camiños de Dorothé, un libro disco para público familiar inspirado no cancioneiro recompilado pola musicóloga suíza Dorothé Shubart e visitamos a mostra sobre A historia das orquestras de Galicia na Cidade da Cultura, da man dos seus comisarios Zósimo López e Henrique Neira. E todos estes contidos, enfiados coa música de Grande Amore, Ortiga e Pili Pampín, Guadi Galego e os proxectos literario-musicais: “Os camiños de Dorothe” de Sonsoles Penadique, e “Ultraluz”, de Ledicia Costas e Amaro Ferreiro. Entreliñas somos Belén García Freijeiro na produción, Marcos López, Teresa Cuíñas e Eva Mejuto na redacción e Denís Losada na técnica. Máis música, por favor!

51 min
04/07/2024

Viñetas na biblioteca

Dedicamos este décimo primeiro capítulo de Entreliñas á banda deseñada e para afondar no mundo do cómic galego convidamos a Miguelanxo Prado, Paula Cheshire e Kiko Dasilva. Tamén falamos de bibliotecas itinerantes con Paula Buján, bibliotecaria de montaña da Furgoteca, o servizo de bibliotecas móbiles da Xunta de Galicia. A música que fía este percorrido polo mundo das viñetas é de Baiuca. Entreliñas somos Belén García Freijeiro na produción, Marcos López e Eva Mejuto na redacción e Denís Losada na técnica.

1 h

A Xunta de Galicia pon en marcha o proxecto Entreliñas, un podcast literario destinado a dar a coñecer a actualidade literaria galega a través das bibliotecas públicas. Trátase dun programa en formato magazine radiofónico presentado por Teresa Cuiñas e Eva Mejuto no que tratan diferentes aspectos sobre o mundo da literatura, a edición, a lectura, etc.

Creado por

Xunta de Galicia
Episodios

18
Clasificación

Apto
Derechos de autor

© 2026 Xunta de Galicia
Sitio web del podcast

Entreliñas
Proveedor