(General News) ပီႈၼွင်ႉတႆးတီႈၽႃၵၢၼ်ႉ သုမ်းသုၼ်ႇၵူႈလွင်ႈ တႃႇလိပ်းၶီးမီးၸႂ်ၵူၺ်းၵေႃႈယၢပ်ႇ

ပီႈၼွင်ႉတႆးတီႈၽႃၵၢၼ်ႉ သုမ်းသုၼ်ႇၵူႈလွင်ႈ တႃႇလိပ်းၶီးမီးၸႂ်ၵူၺ်းၵေႃႈယၢပ်ႇ

ၽူႈတွႆႇႁွၵ်ႈ ၊ ၸၢႆးသႂ်ၸိုၼ်ႈမိူင်း

ထုင်းၵႂၢမ်းတႄႉမီးဝႃႈ ယၢႆႈၵၼ်ႁႅင်းယွမ်း ၽွမ်ႉၵၼ်ႁႅင်းယႂ်ႇ ၼႆလႄႈ ၸူဝ်ႈတႆးပႆႇၽွမ်ႉၵၼ်ၼႆႉတႄႉ ၶိူဝ်းတႆးတိုၼ်း တေ ယၢႆႈယူႇတိၵ်းတိၵ်း။ သဵၼ်ႈတၢင်းတႃႇတႆးတေၽွမ်ႉၵၼ်ၵေႃႈ ပႆႇႁၼ် ။ ယွၼ်ႉႁဝ်းတႅၵ်ႇၵၼ်လႄႈ ၵူၼ်းတႆးၼႂ်း မိူင်းတႆး ၵေႃႈ ထုၵ်ႇပိူၼ်ႈပေႉၵိၼ်လူလၢႆ ။

တႆးၸိူဝ်းပႃးၵႂႃႇၸွမ်း ၼႃႈလိၼ်ဢၼ်ထုၵ်ႇၸႅၵ်ႇပၼ် တၢင်ႇၸၢဝ်းၶိူဝ်း ၼၼ်ႉၵေႃႈ လႆႈၼႃႈလဵၵ်ႉတႃဢွၼ်ႇ ထုၵ်ႇပိူၼ်ႈတဵၵ်းတဵင်လူလၢႆ ဢမ်ႇလႆႈယူႇၵတ်းယဵၼ်မႃးသေပွၵ်ႈ။

မိူၼ်ၼင်ႇ ဝဵင်းၽႃၵၢၼ်ႉ ဢၼ်ယူႇပွတ်းတွၼ်ႈ ၼိူဝ်မိူင်းႁူမ်ႈတုမ်မၢၼ်ႈၼႆႉၵေႃႈ ယၢမ်ႈပဵၼ်တီႈပီႈၼွင်ႉတႆး ယူႇသဝ်း လႄႈ တေႃႇထိုင်ဝၼ်းမိူဝ်ႈၼႆႉၵေႃႈတိုၵ်ႉမီးပီႈၼွင်ႉတႆးယူႇသဝ်းၼမ် ။

ဝႃႈၼၼ်သေတႃႉ ၼင်ႇလၢတ်ႈမႃးၼၼ်ႉယဝ်ႉ ဢမ်ႇတွၼ်ႉမီးသုၼ်ႇၸတ်းပွင်ၵၢမ်ႇၵျမ်ႇမႃႇတူဝ်ၵဝ်ႇမႃးသေပွၵ်ႈ ။ ပၢၼ်ၸွမ်ၸိၵ်းသိုၵ်းမၢၼ်ႈမိၼ်းဢွၵ်ႇလၢႆႇ ယိုတ်းမိူင်းမႃးၼႆႉ သမ်ႉၶႅၼ်းၼႃႇ ။ သိုၵ်းၸုမ်းလႂ်မႃးၵေႃႈ လႆႈၵူဝ်လႆႈၵူမ်ႈႁူဝ်ယူႇတႃႇသေႇ ။

ယွၼ်ႉၽေးသိုၵ်း ၸိူဝ်းၼႆႉသေ ပီႈၼွင်ႉတႆး ပႃးၸဵမ်ၵူႈၸၢဝ်းၶိူဝ်းဢၼ်ယူႇ ၼႂ်းၽႃၵၢၼ်ႉ ယၢပ်ႇၵိၼ်းလွင်ႈယူႇ လွင်ႈၵိၼ် ၵူႈဝၼ်းဝၼ်း ။ လွင်ႈၼႆႉ ၸၢႆးသႂ်ၸိုၼ်ႈမိူင်း တေႁၢႆးငၢၼ်းၼႄပၼ်ၵႂႃႇၶႃႈဢေႃႈ ။

#podcast

#shannews