Kila ifikapo Oktoba 31, watu katika maeneo mbalimbali duniani, hususan Marekani huonekana wakiwa katika mavazi na vipodozi vya kutisha wakiadhimisha sherehe maarufu zinazojulikana kama Halloween. Lakini ushawahi kujiuliza, sherehe hii ilianzia wapi, maana yake nini na kwa nini mavazi ya kutisha yamekuwa sehemu muhimu ya maadhimisho yake? Kwa mujibu wa Maktaba ya Congress ya Marekani, historia ya Sherehe za Halloween ilianzia katika karne ya pili kabla ya Kristu, katika sherehe za kale za watu wa zamani waliokuwa wanajulikana kama Waselti. Katika kipindi hiko ambacho ni zaidi ya miaka 2000 iliyopita sherehe hizo zilikuwa zikijulikana kama (Sow-in) na zilikuwa zikihusishwa na mwisho wa msimu wa mavuno. Waselti ni makabila na jamii za kale za Ulaya zilizokuwa na lugha, mila na tamaduni zinazofanana, zilizoishi katika maeneo mbalimbali ya Ulaya, yakiwemo Ireland, Scotland, Wales, Uingereza na Ufaransa ya sasa. Katika sherehe za Sow In Waselti waliamini kuwa mpaka kati ya ulimwengu wa walio hai na waliokufa ulikuwa mwembamba sana hivyo waliamini kwamba roho za marehemu zingeweza kurejea kuwatembelea walio hai. Waselti waliweka utamaduni wa kusheherekea sherehe hizo kwa kuvalia ngozi za wanyama,na vinyago vya kutisha ili wafanane na wafu wakiamini kwamba kwa kufanya hivyo wangeweza kujikinga dhidi ya roho zilizodhaniwa kuzunguka duniani usiku huo. Na hii ndio sababu mavazi ya kutisha yameendelea kuwa sehemu maarufu ya maadhimisho ya Halloween. Hata hivyo, historia ya Halloween iliendelea kubadilika baada ya kuenea kwa Ukristo. Katika karne ya nane, Kanisa Katoliki liliweka Novemba 1 kuwa Siku ya Watakatifu Wote, na Novemba 2 kuwakumbuka waumini waliokufa. Mabadiliko hayo yaliifanya sherehe ya Sow in kuingiliana na kalenda ya maadhimisho ya Kikristo. Na usiku wa kuamkia Novemba 1, yaani Oktoba 31 ulianza kujulikana kama All Hallows’ Eve, maana yake ‘Usiku wa Kuamkia Siku ya Watakatifu Wote’ jina ambalo baadaye lilifupishwa na kuwa Halloween. Baadaye, wahamiaji kutoka Ulaya, hasa Ireland, walichangia kueneza Halloween nchini Marekani katika karne ya 19. Kadiri muda ulivyopita, sherehe hiyo ilibadilika na kuwa sehemu ya burudani na utamaduni maarufu, ikihusisha mavazi ya wahusika wa kutisha, mapambo ya maboga yaliyochongwa, sherehe na watoto kuomba pipi. Ingawa Halloween ya sasa inaonekana zaidi kama burudani, historia yake inahusishwa na mila za kale na mabadiliko ya kidini na kitamaduni yaliyotokea kwa karne nyingi. Mavazi ya kutisha ni sehemu ya urithi huo wa kihistoria, ingawa maana yake kwa washiriki wa leo inaweza kuwa burudani tu, bila kuhusisha imani za kale kuhusu roho za wafu.
