台文用喙讀

楊振陽

0.0 (0)
Language Learning

練習寫台文了，有會曉講台語的朋友無慣勢看，我就共我寫的台文用喙讀出來，予朋友會使一面聽一面看。

Sep 9

食頭路

有一個好朋友，大學讀的是外國文學，畢業了就隨予一間誠大誠有名的公司錄取。上班到今，雖然伊才四十偌歲爾，但佇同一間公司上班的時間嘛超過二十冬矣。為著欲共工課做予較好些，伊佇上班的這二十偌冬裡，家己有閣利用時間，轉去學校，學習跟工課有關係的專業知識。雖然個性無稍愛跟人交際應酬，但工作上一定是百分之一百達成任務的。這一兩冬有聽到伊咧講，怹的部門調來一個跟伊無稍對盤的主管，定定會揣伊麻煩。為著無欲予主管貓毛到，伊佇公司就愛定定加班到三更半暝！壓力大，身體嘛袂堪得。聽伊講前一陣子，伊共怹頭家辭頭路矣，財務上無煩惱，股市閣紅絳絳，伊就先予家己休一陣子，欲換啥物工課以後再講。佇離職進前，公司的教育訓練，攏咧講AI已經發展到啥物程度，伊聽了嘛誠為今馬猶佇公司上班的同事煩惱，可能閣過無偌久，有誠濟人的頭路，會去予AI取代。所以，伊共家己講，未來欲作的穡頭，一定愛有予AI無法度代替人完成的技術。前一陣子跟伊食飯，看到伊有兩三隻手指頭仔糊ok繃，問伊是毋是休睏佇厝裡，傷捷煮食，切傷濟菜，才無注意去傷到？伊無隨共我應。後來才講伊是去學一個手藝，貼一張相片予我看，一個假人頭的頭毛，剪到誠幼路閣舒適，好看閣有型。伊講伊對共一個人妝予媠媠，一直攏足有興趣的，普通時伊就會注意家己跟別人的穿插、打扮。家己若有欲出門，一定愛セット畫妝過，對伊來講，這是一種做人的基本禮數。一個坐二十偌冬辦公室的OL，佇人生下半場的工作生涯，準備欲家己開業，做一個髮藝師，抑是個人的造型設計師，換頭路來面對AI時代的挑戰，做家己有興趣的代誌，無欲閣做別人的薪勞替人趁錢。咱這做好朋友的，就先佇這祝福伊開業成功，生理愈做愈媠。台灣這陣子大起的股市，除了予一寡人較敢換頭路以外，嘛有予一寡少年人，佇遮揣到伊的興趣。有一個少年囡仔，明年就18歲矣，因為壓力大的時陣，本身會出現妥瑞的症頭，爸母就盡量予伊佇較無壓力的環境中成長。彼工跟怹爸食飯，怹爸講伊誠歡喜，怹囝有踹到興趣的代誌矣，然後就講一個誠心適的過程予阮聽。這個囡仔自細漢對食就誠敏感，物件好食歹食綴伊食就無毋對。除了食，怹爸母就看袂出伊閣對啥有興趣？前一陣子怹規家伙𤆬出去𨑨迌，旅遊的時陣行程那行，股市開盤嘛會加減看，加減買賣。有一工，怹囝就問怹爸咧歡喜啥？我這個朋友就用怹後生上敏感的食，來解釋予伊聽。咱等咧毋是欲去食你上愛食的這間好料的？你看這支股票，我買的成本是偌濟錢，今馬這個價數我共賣出去，按呢是毋是有夠付咱的中晝頓矣？講煞，阮朋友看怹後生兩粒目珠紲光起來，直直問伊投資股票的代誌，𨑨迌轉來嘛家己佇網路頂學投資的工夫，阮朋友翁某就紲手撥一寡資金予伊去試。後來伊閣問怹囝以後想欲做啥物工課？怹囝直接共講證券營業員，伊就隨去買冊，予怹囝讀讀，會使準備以後的考試。無論是換頭路的好朋友，抑是猶未開始揣頭路的少年人，會使對家已未來想欲做的工課，有誠清楚的想法，抑是知影家己對啥物較有興趣，有投入熱情的所在，對咱來講，就是一件誠幸福的代誌。
Jun 21

阿母講笑詼

頂一篇台文，閬縫閬傷久，寫了錄一集新的「台文用喙讀」，傳去podcast 平台，spotify 跟 Apple podcast攏會使聽到，但YouTube Podcast 紲無同齊放送，閣寄一封email予我，講怹的系統暫時無法度處理新錄的podcast，叫我愛家己想辦法！我只是較貧惰，無遐捷寫台文、錄台語podcast爾，阿無去改過YT的啥物設定，那會雄雄就未使用？查網路頂敢有人拄過這個問題？Google 的AI講，叫我去檢查我的YT podcast內底的 RSS 設定有走去無？一開始共設定設好，我就毋捌去共振動過，今馬閣叫我去檢查RSS有走去無，我紲揣無伊的設定藏咧佗位，武歸晡才揣到，檢查了抑無重耽矣，我就仝款共重設一遍，無偌久，上新的彼集就有出現佇YT podcast 的清單內底矣。本來叫是已經無問題矣，但YouTube紲家己無代無誌共我以早錄的台文用喙讀，全部改做私人的影片，干焦我家己看會到，別人看無！佳哉一個誠捧場的朋友隨留話共我講，那會干焦䞐上新的彼集，以早的攏無去矣，我才趕緊去共其它集數的影片改轉去公開，予人閣會使看到聽到。按呢YouTube的設定到底有正常無？我嘛無把握，只好閣寫這篇台文，錄一集新的podcast試看覓。頂篇講到阿母會記持的過去代，這篇來寫阿母講過的笑詼。有一工，逐家攏轉去東湖食暗，大兄的細漢囝佇食飯桌開槓的時陣就問逐家：「阿媽有講過一個笑話，內底有中語跟台語，中語有講到『你會，我會，他也會』，恁敢有人會記持？」有人搖頭有人頕頭，我問阿母會記持無？阿母講伊未記持矣。大嫂敢若有印象，就提醒阿母「妳講過咱的厝邊，有一個外省仔太太，以早捌跟妳鬥陣去行蓮社，妳敢未記持？」大嫂的提醒，有開到阿母的記持開關。阿母只要講到這個外省仔太太，就一定會閣講一遍這個笑詼。「喔！有啦！有一遍伊就共我問講『容乃，那個人在說我會你會他也會，是在賣什麼？』我就看邊仔，彼是有人捙粿出來賣，佇彼咧喝賣芋粿、甜粿、菜頭粿啦」雖然聽過幾偌遍，我嘛是共當做第一改聽仝款，大聲笑予阿母聽。「我叫是阿媽說的是網路頂的笑話，我真正有去揣過，但攏揣無，原來是阿媽生活中，真正發生的代誌。」這個出世佇網路世代的姪子嘛誠心適，阿媽歸工的工課就是唸佛跟修行爾，會那有閒工跟咱仝款，歸工掛佇網路頂看彼些有的無的啦。
Jun 19

阿母會記持的代誌

出家的小弟寫line來問講，阿母敲電話予伊，講厝裡有收到通知單，生活費已經入伊的郵局口座矣，所以敲電話來共師父說多謝一下。小弟煩惱阿母的記持是毋是有淡薄仔錯亂？抑是拄著詐騙？「詐騙攏是叫人提錢出去，阿母是收到錢，應該毋是啦！」「敢會是阿爸留落來的保險金？」「我問恁三嫂，伊講阿爸的保險金是徛年中跟年尾，我有去查公司的電腦，若這個時間收到保險金，應該是阿爸用你做被保人規劃的保單。阿母的記持猶閣誠好咧，伊無記毋錯啦！你會使放心。」人若食老，記持難免攏會退化，就算講猶未食老，嘛一定有未記持啥物代誌的時陣，但現代人毋知是毋是去予失智症的新聞嚇驚過頭，定定攏會對記持開始變䆀老大人過頭煩惱，驚伊是毋是開始老人痴呆矣？我一貫的原則就是「關心免擔心」。雖然阿母今馬上捷講的話母是「我未記持矣」，但嘛有一寡代誌是伊「見講講過去」仙講就講未善的過去代。雖然阮已經聽到攏會曉背矣，我嘛知影阿母會繼續講落去，但對我來講，這就是序大人康健勇健的一種存在。阿母上捷講的一件代誌，是佇伊細漢時陣，可能才讀國小爾，伊就會曉幫開中藥店的外公拆藥仔。因為囡仔人傷細漢，逐遍幫人客拆藥仔的時陣，攏愛閣搬一張細隻椅仔來墊跤，才開會到較頂懸格的藥屜仔。佇邊仔等的人客，看伊才無幾歲爾，就看有藥方，閣佇彼爬懸爬落咧敆藥仔，就會共外公講「仙仔，恁大查某囝遮細漢就遮勥，按呢以後你毋著愛加攢一寡嫁妝予人？」「會喔！等伊欲嫁的時陣喔，我才夾五百箍仔予伊。」聽阿母講的口氣，外公一定是足重男輕女的。阿母是大姐，毋若會曉拆藥仔爾，厝裡大細項代誌伊攏愛做。阿母的國小比人較晚讀，讀無幾冬就閣予人叫轉來厝裡帶小弟小妹。今馬仝款蹛佇東湖附近的兩個阿姨，攏差阿母十外歲，會使講自小漢就是阿母帶怹大漢的。阿母逐遍講到外公這件代誌，攏是叫阮遮做序細的「話毋通跟恁阿公仔仝款，撒咧烏白亂講」。「恁阿公伊後來身體真正愈來愈䆀，佇我欲出嫁的時陣，已經無法度做穡賺錢矣，真正干焦提會出來五百箍，後來有閣加一百箍，予我的嫁妝。」阿母講外公外媽的性地無好，冤家時陣兩個人就無愛講話，攏叫伊去傳話。看外公外媽按呢，伊本來是無想欲嫁人的，後來閣發生一件代誌，予伊感覺這個家無法度閣蹛矣，拄好有親情來替阿爸來講親，兩個無熟識的少年男女，就因為阿母決定欲離開這個家，就答應嫁入去另外一個家。阿母講過伊細漢的代誌，有一件是牽伊目珠無好的阿媽去看戲的記持，可能是阿母閣卡細漢的時陣。阿母講彼時陣的歌仔戲院，上尾十分鐘就無人顧門，想欲看的人免買票就會始入去看。怹阿媽雖然目珠無好，但就是愛看這十分鐘免錢的戲。阿母講彼時陣伊可能猶未去讀國小，怹阿媽攏叫伊共牽去看戲。「阮阿媽的性地跟阮爸阮母仔攏不仝，伊足好喙的，逐遍我牽伊去看戲了，伊就會講好聽話共我祝福，我彼當陣毋才無幾歲爾，伊就會祝福我大漢會嫁好翁，囝孫仔序細攏誠友孝，呵呵，阿毋才有今馬的恁。」看起來，阿母對語言的力量應該誠有體會，才會對佇伊遐細漢所聽到的話，到今馬猶閣記持深刻來講予阮知，一遍閣一遍來共講落去。
Feb 11

阿母的皮包仔

早起接到一通電話，愛去台北一逝。既然愛駛車出去，無就順紲載阿母出來食素好了。彼工牽仔揣著一間「執行長素食水餃」招我跟查某囝鬥陣去食看覓，食了感覺袂䆀，食飯的氣氛誠好，頭家足愛跟人客講怹兜食素的故事跟食好油好食材的觀念。這幾冬來，離徛家較近的素食餐廳關了了，若有食素的朋友來相揣，想欲請人食一下飯攏感覺誠無方便。這間素食餐廳開佇人的住宅大樓三樓，誠特別，按呢生理閣做會起來，應該有伊會使共人客留落來的功夫跟手路才對。餐廳就是去食一頓飯爾，毋是這遍我欲講的重點。阿母大部分攏是佇禮拜歇睏日去唸佛，若拄到愛連續唸幾偌工的法會時陣，二兄出門上班就會順紲載伊出去。毋知過年前有法會無？先敲一下電話共講一下，中晝𤆬伊出來食飯。敲電話共阿母講了，我就駛車出門，先去辦代誌，辦了才轉去東湖載阿母。轉去到厝，門拍開爾，就聽到阿母跟二兄講電話「你敢有看到我的皮包仔？我已經揣一早起矣，攏揣無！........阿陽到位矣......講欲載我去食飯哩.....喔好啦，我再閣揣看覓。」因為有先跟人訂位，我看時間淡薄仔趕，就先請阿母莫煩惱，出去食飯袂用到伊的皮包「咱先來食飯，轉來我再幫妳逗陣揣。皮包無跤，一定是佇厝內底，伊袂家己走無去啦！」「我就驚是毋是落佇外口？因為證件、印章、鎖匙攏囥佇內底，拍無去會足麻煩矣。齁，我哪會記持遐䆀，有夠低路！」「母喔，這我誠有經驗，咱物件若揣無，妳愈想欲共揣出來，伊就愈無愛予妳揣到；咱就先共囥咧，莫睬伊，過一陣子，伊就家己走出來予咱看矣。」「敢有可能？」「阿爸猶佇的時陣，有一遍，伊共講伊囥證件的一個批橐仔，攏囥佇彼的屜仔內底，伊反幾偌遍攏揣無。我就叫伊先莫揣。過幾工了，伊就講伊揣到矣。我的樂譜嘛仝款，頂一季的公演結束，我就共唱過的樂譜，用大支夾子夾做伙，紲手囥去冊櫃內底。因為是無意識的動作，做了就袂記持。後來想欲揣出來看，干焦會記持有收佇冊房爾，囥佇佗位完全無印象，冊櫃逐格攏斟酌看過幾偌遍，就是揣無夾做伙的樂譜。樂譜無咧急用，我嘛是仝款共囥咧先莫揣。有一工，我咧揣別本冊的時陣，就影到冊櫃上頂懸格，有一疊紙夾佇兩本冊中間。咦？進前我明明看過幾偌遍，就是攏無看到，今馬伊就家己走出來予我看矣。」「敢有遐神奇？昨昏阿鴻載我出去買菜，我看伊捾遐重，就叫伊行頭前，門是伊開予我入來。但尾暗仔我有出去菜街仔買卵，敢會落佇菜街仔？」「菜街仔轉來毋是妳家己開門入來！鎖匙就囥佇皮包內底，妳人就佇厝裡，皮包一定有攜轉來。妳可能毋知急欲創啥？就無先共皮包囥去固定囥的所在，紲手凊彩囥，跟我收樂譜仝款，因為是無意識的動作，妳就未記持矣。我若無敲電話講欲招妳食飯，妳無出門就未想欲去提皮包，無定著佇厝內加行幾逝，妳就雄雄會看到皮包，赫！那囥佇遮！就趕緊共皮包收去囥予好。結果，我無張持先敲電話轉來，紲害妳揣規早起的皮包揣無。未要緊，咱先來食飯，食飽轉來，皮包伊就家己會走出來矣。」食飽轉來，我就共阿母會行的路線，慢慢斟酌共行一遍，就看到紅紺色的皮包囥佇阿爸房間門口前的桌子頂，桌子嘛是紅紺色的，敢若蟲匿佇草埔仔內底有保護色仝款，莫怪阿母揣無。我臆這條路線，應該是阿母ui菜街仔轉來，趕緊欲去便所，無先共皮包收予好，行過阿爸房間門口的桌子，就紲手共皮包囥咧，方便了就未記持矣。老歲仔人目珠濛霧，皮包佇桌子頂閣有保護色，嘛毋是阿母會囥皮包的所在。阿母講，阿爸的房間伊嘛有揣幾偌逝，我共講，皮包跟桌子仝色，就算咱行閣卡濟逝，我若無掛目鏡嘛看無揣無啦！毋是妳記持䆀，這款無意識的動作，少年人嘛仝款會未記持。
09/16/2025

說走就走的好運

牽仔招大姨仔去高雄揣怹表小妹耍三工，看到外口天氣遐爾好，我跟查某囝嘛佇厝裡坐未牢，想欲出去撈撈矣。共牽仔載去桃園高鐵坐車了後，我就開始看日不如喝行就行，手仔機提起來四界反看覓，有啥物活動、展覽抑是表演會使去看無？活動猶未揣到，line的兄弟群組就看到二兄交代大兄大嫂，阿母的喙齒無好，轉來陪阿母食中晝頓愛攢較爛的，出家的小弟隨應講，伊嘛拄好欲轉去。按呢我嘛會使招查某囝先轉去跟阿媽食中晝，食了才看欲斡去佗位。進前佇七月揣展覽看的時陣，敢若有看到台北流行音樂中心的展覽，後來去無成。北流離東湖近近的，會使食飯飽才順紲斡過去。拄好北流這個展覽是長期的，頂遍看無成，換這遍來看。雖然是臨時決定，但運氣袂䆀，買票的時陣，服務員講，九月份是怹四週年的生日，身分證號碼若有01289這五的數字內底，對到四字，就會使免買票，展覽予你看免錢的。查某囝誠幸運，伊對到4個號碼，會使看免錢的，但無攜身分證，用伊手機內底的身分證相片嘛袂使。只好乖乖的買票，好運聽候下遍才用。這個展覽是介紹台灣流行音樂的發展歷史，除了會使看到足濟今馬已經誠罕咧看到的音樂產品，譬如講錄音帶、曲盤、古早的電視機...等等，嘛會使聽到誠濟我少年時陣聽過的音樂、歌星、專輯、作詞作曲的創作者...猶閣有歸個流行音樂產業的生產製造過程。入去每一個主題空間，導覽的耳機就會自動放送這個主題所欲介紹的內容跟音樂，誠好聽嘛誠好看。莫怪查某囝看了隨佇伊的IG貼講，歡迎親戚五十，佇九月二八進前，揣伊閣來看幾遍攏袂要緊，橫豎伊是會使看免錢的。牽仔出去三工，第三工是拜四，查某囝愛去桃園神社上班。展覽看了，換查某囝招我隔工上山去明池國家遊樂園。我查google map，愛駛二點半鐘的山路，若欲閃塞車的上班時間，上好是六點半進前出門，查某囝講無問題。隔工透早，阮先行高速去大溪，ui大溪駛北橫上山。昨昏佇北流拄到的好運，這工嘛有綴阮出門來行北橫，因為欲到明池進前，有一段山崩過的路，才修好開通無幾工爾，阮是駛到位才知影，北橫佇遮的這段路，前一陣子猶閣封牢的，駛袂過去宜蘭。我問查某囝哪會想欲來明池，伊講佇YouTube頂懸有看到人介紹足媠的神木區，伊毋才想欲招我來看覓。買票的時陣，阮就順紲問神木區欲按怎去？結果，袂使家己去，愛佇二三工前，就先跟明池山莊登記，予怹專車接送，像阮這款臨時想欲去的，就無車通坐。明池的環湖公園踅了，時間猶早早咧，雖然講遮是桃園市跟宜蘭縣交接的所在，但伊是較接近宜蘭，落山的時間較短。因為長時間駛山路誠忝，我就跟查某囝參詳，落山駛對宜蘭過來，先食中晝頓，食飽來去冬山河親水公園，揣三十年前我跟牽仔翕相的所在，閣翕一張三十年後的相片。就按呢，牽仔去𨑨迌三工，我嘛跟查某囝出來𨑨迌二工。
07/12/2025

太陽能光電板

台灣若像有幾偌冬無去予風颱扇到矣，毋是來進前就轉斡無入來，較濟攏走去日本，無就是有倚過來，但風雨無啥大，歇到風颱假的所在，紲予百貨公司、電影院、餐廳遮的店面，生理比普通時閣較好！這遍的風颱ui嘉義台南入來，無先予咱的護國神山中央山脈稍擋一下，就直接掃過來，造成咱南部縣市足大的災害損失。看新聞翕到受災嚴重的畫面，有一款是我以早毋捌看過的，就是去予風颱扇到東倒西歪的太陽能光電板。政府為著欲發展太陽能發電，佇下港足濟無啥好種的田園跟魚塭，鼓勵民眾稅予廠商裝太陽能光電板來發電，共往過愛勞動筋骨艱苦種田的穡頭省起來，農民免遐辛苦，會使佇厝裡曲跤撚喙鬚等收田租厝稅就好。聽講阮牽仔的叔伯小弟，伊佇嘉義過路仔咧飼蝦仔的魚塭，嘛已經簽約簽好，稅予廠商欲裝光電板矣。毋知遮遍予風颱掃了，會影響裝光電板的時間無？發電設施應該是咱國家誠重要的建設，一般來講一定有一寡耐操的標準愛做到夠才會使，譬如講咱台灣定定拄會到的地動風颱，地動幾級以上，陣風幾級以上攏袂使有重耽到。假使講遮濟裝好的太陽能光電板，對這遍的風颱，有表現出伊的擋頭，無啥損失到的話，絕對會予咱全國民眾呵咾甲會觸舌，但今馬看到的畫面紲毋是按呢！我會記持較早聽到風颱的新聞，若是較強的風颱，伊瞬間的陣風有十六級抑是十七級攏捌聽過。既然這是咱台灣捌發生過的記錄，是按怎這些光電板設施，伊會使承受的陣風才做到十三級爾？敢講是欲予這些太陽能發電廠商較省錢些？抑是講有啥物科學的理由根據，講做按呢就有夠用？這嘛是咱這個政府，因為能源政策所委託出去的廠商，予人袂放心的所在。
05/18/2025

AI幫我空耳注音

最近合唱團欲練唱義大利文的歌劇，合唱團有同學就跟逐家分享，伊是按怎叫AI共鬥相共的。伊共樂譜分段翕起來，貼予ChatGpt，請ChatGpt用中文，共這段歌詞注音，就是人講的空耳發音。今馬AI真正有厲害，伊先共圖內底的字辨認出來，然後就用接近義大利文發音的中文字注音出來。伊閣會順續檢查這段歌詞對抑毋對？若有毋對，伊會提醒妳，這歌詞敢若有毋對喔！用中文字注音了，伊會閣問妳，愛伊唸出來聽無？若愛，伊就建議妳會使用開錢的版本，因為免錢的版本有一寡限制，會予用的人感覺歹用。看同學用AI用到遮趣味，我嘛綴伊試看覓。佇電腦頂懸，我就用我近前已經註冊過免錢的ChatGpt。佇手機仔內底，我捌裝過Google的AI助理Gemini。我就無遐工夫閣翕樂譜予AI看，直截請怹提供「威爾第歌劇阿依達凱旋曲義大利文合唱歌詞」。這兩個AI怹攏會先介紹這齣歌劇，然後說明這段合唱的劇情，啥物角色咧唱，上尾才共歌詞貼出來。閣來我仝款叫怹用中文空耳注音，怹嘛攏有寫予我，但兩個寫的無啥仝，就敢若真人咧寫仝款，就算講是聽到仝一個音，無仝人嘛定定會想到無仝字。落尾我就叫怹唸予我聽，ChatGpt 伊是先產生一段音檔予我，然後問我欲繼續無，我共講欲，伊就講這免錢的版本有時間限制，伊愛分段做才袂超過時間。但是我干焦聽伊先予我的二三的音檔，結果聽起來攏仝款，根本就無照伊寫的唸。Gemini伊本來就是一個語音助理，所以我叫伊唸，伊就直接會使唸予我聽矣。
04/09/2025

詐騙電話

大學同窗的面冊貼文，寫到伊接到一通詐騙電話，講有人提伊的委託書跟身分證去戶政事務所辦代誌。我會記持我捌接過跟伊仝款的電話，嘛有寫過面冊貼文。我就用「詐騙」兩字去揣我寫過的貼文，有揣到兩篇。我共跟大學同窗相仝的詐騙電話彼篇貼予看，伊講委託人仝款叫楊偉明，跟兩冬前我拄著的是用仝一個劇本。當初寫這兩篇貼文的時陣，是中文跟台文濫咧寫，因為敲電話揣我的人是講中語，雖然我共怹攏講台語，但聽有的彼通，伊繼續講中語騙我，聽無的彼通，講無幾句就共我掛電話矣。這兩篇貼文攏寫了無偌長，閣是中台文相濫，冊友應該攏看有，彼時陣就無想到愛錄音予線上的朋友用聽的。這遍共揣出來，就順續共改做台文，錄一集podcast好囉。第一通，板橋戶政事務所羅科長今仔日接到一通電話，掛斷了查網路才知，四五冬前新聞就播過這款詐騙的手段矣，我今馬才拄到！予人當作癮頭的感覺真正袂爽！厝內的電話咧霆，我行去共接起來。詐：「喂，請問楊振陽先生有佇無？」我：「我是，咱佗位欲揣？」詐：「遮是戶政事務所，我姓羅，是遮的科長。請問你是毋是有委託一位楊偉明先生來申請戶籍騰本？」我：「無矣」詐：「你無委託一位楊偉明先生來申請嗎？你等一下，我跟櫃台人員確認一下」電話彼片的聲音變較小聲，若像佮另外一隻電話的人咧講話，但是怹講啥我聽甲一清二楚。「楊振陽先生講無委託申請，你確認申請人有提委託書無？有....楊振陽的身份證呢？影本抑是正本？正本....你唸一下身份證資料給我，生日XXXXXX，身份證號XXXXXXXXXX」（我一面聽一面佇心內底譙：幹！我的資料閣予人漏出去矣！）詐：「楊生生，櫃台人員講有你的委託書跟身份證正本，你確定無委託？抑是你的身份證有借人無？身份證有佇你身驅邊嗎？」我：「我無叫人去辦騰本啦！身份證佇我的橐袋仔，我無提予別人！伊的證件一定是假的，恁緊報警察來共抓起來，你講你是蘆竹的戶政事務所嗎？你叫恁櫃檯莫予彼個人走，我隨敲予遮的警察局。」詐：「好，你等一下，我先跟櫃檯人員講，但阮是板橋的戶政事務所，不是蘆竹。」聲音閣變較小聲「你先莫予伊走，什麼？人走矣！文件嘛提走！」「楊生生，櫃檯講人走矣，嘛共你的證件提走，未要緊，我等一下調阮遮的監視錄影，但驚伊閣提你的證件去別間戶政，愛請你去警察局報案。」牽仔佇邊仔隨用手機仔幫我查板橋戶政事務所，查出來有幾偌位。我：「你講你是板橋佗位的戶政事務所？」詐：「阮佇中正路6號。」我：「你講你姓羅，四維羅嘛？是恁戶政事務所的科長？」詐：「對。」我：「好，按呢恁先幫我調錄影的資料，等咧會使提予警察。是恁欲報警抑是我愛報警？」詐：「因為是牽涉到你的資料，所以愛你去報警。」我：「好，我隨敲110報警。」掛完電話敲110，結果警察共我講是詐騙電話啦！你莫睬伊就好，戶政事務所無咧敲電話予民眾的。害我聽了有夠歹勢的，頭一擺敲110報案，竟然是因為這款詐騙電話，予人當作癮頭來創治。今馬室內電話干焦賰詐騙、市調、跟厝裡的老歲仔會敲來揣我爾。第二通，誠品線頂冊店手機仔有人敲電話入來，電話號碼是02開頭的室內電話，「請問你是楊振陽先生嗎？」「嘿啊！」「請問你是楊振陽先生本人嗎？」「嘿啊！」「阮是誠品線上冊店，你知影誠品線上冊店嗎？」「我知影啊，欲創啥？」然後伊就掛我電話矣....毋知是誠品冊店的服務人員愛閣加強訓練？抑是詐騙集團聽不懂台語？原來講母語猶閣有予詐騙集團袂敲電話來亂的好處！

練習寫台文了，有會曉講台語的朋友無慣勢看，我就共我寫的台文用喙讀出來，予朋友會使一面聽一面看。

Creator

楊振陽
Years Active

2023 - 2026
Episodes

82
Rating

Clean
Copyright

© 楊振陽
Show Website

台文用喙讀