臺灣夜市Taiwan Yes

曾偉旻, 央廣工作群,Rti
  • 0.0 (0)
  • Society & Culture
  • Updated Weekly

上蓋媠氣咱寶島，鮮沢時行Let’s Go。 臺灣夜市人呵咾，Taiwan Yes more and more! 《臺灣夜市》希冀透過Yes話題與Yes人物訪談，串接一個饒富趣味，且有層次的生活風格類廣播節目。將臺灣最美、最樸實的傳統新舊、各式文化，重新發掘與包裝。節目也希冀帶領聽眾走進最時尚、最流行、最發燒的議題外，也介紹臺灣各產業發光發熱的人物，或是默默深耕已久的在地專業人士，唯有深入臺灣地方，才能有蓄積的能量，再創國際聲量。 前往＞＞央廣台語粉絲團聽友來函： 17rti@rti.org.tw

  1. 5d ago

    台語巢少年班做伙講 予母語行入網路新世代

    專訪：台語巢成員 王詩涵/余宥潔/阿Ｑ 台語現代化，這陣嘛是少年家創作、研究佮實現夢想的工具。《臺灣夜市Taiwan Yes!》主持人阿旻繼續邀請「台語巢」三位少年成員詩涵、宥潔佮阿Q，分享𪜶對台語比賽行入台文創作、Podcast、文史研究佮語言復振的故事。 三位受訪者對台語的熱情有夠強，宥潔透過特殊選才考牢成功大學台灣文學系，對高中階段就定好目標、準備三年的資料，總算完成家己的心願。 阿Q是予阿公、阿媽𤆬大的囡仔，對細漢就慣勢講台語。一直到國小讀本土語言課，伊才發現，原來毋是逐个囡仔攏會曉講台語。經過老師鼓勵，伊開始參加台語演講比賽，嘛對遮發現台語，毋但會當佇厝內開講，閣會當正式徛起去舞台。這馬伊參與Podcast製作，希望用聲音佮網路，予閣較濟人聽著台語。 詩涵是對大學開始接觸台文，伊嘛想欲繼續讀台文研究所，研究台語語法，嘛用台文書寫家己佮阿媽的生命記持。伊以「鹽水泡飯」做題目，寫出破病時阿媽照顧伊的情景。簡單的鹽佮飯，毋但有祖孫之間的疼痛，嘛表現台灣人佇艱苦生活內底，猶原無放棄的性格。 「台語巢」予成員按照興趣參與主持、文字、錄音佮影像製作。三位少年家用行動證明，台語毋是干焦為著比賽，嘛毋是留佇過去的語言。當當少年家願意講、願意寫、願意創作，逐个人攏是火種，會當共台語的火繼續傳落去。

  2. Aug 9

    對語言到網路世代　黃啟軒用台語思考台灣社會

    專訪：台語創作者黃啟軒、肉圓仔 《臺灣夜市Taiwan Yes!》主持人阿旻繼續專訪少年台語創作者黃啟軒，佮伊的Podcast搭檔「肉圓仔」，對台語學習、網路世代、地方文化，一路講著台灣社會的未來。兩位少年囡仔面對歷史、語言佮文化議題，已經有非常深入的觀察。 講著網路世代，黃啟軒坦白講，演算法予仝款意見的人愈來愈集中，社會頂懸欠缺理性討論的空間。伊家己嘛捌予手機佮網路縛牢咧，逐工接收大量資訊，煞愈來愈少深度思考。考著大學了後，伊開始練習離開手機仔、加讀一寡冊，重新思考生活的能力。肉圓仔嘛分享，家己捌因為網路頂懸的美貌佮精彩生活感覺自卑過，後來透過佮媽媽開講，才漸漸了解社群媒體所呈現的，毋是一个人生活的全部。

  3. Aug 2

    廖元甫教授打造台語科技生態系：AI毋是工程師家己的代誌

    受訪者：國立陽明交通大學 廖元甫教授 AI會曉聽台語、講台語，敢代表台語科技，就已經成功？《臺灣夜市 Taiwan Yes!》繼續訪問國立陽明交通大學廖元甫教授，對語言學習、智慧通譯、低資源語言佮AI主權，探討台語科技的後一步，欲行去佗位。 廖教授指出，科技團隊會當開發語音辨識、翻譯、語音合成佮大型語言模型，毋過，真正知影學生按怎學、老師需要啥物教材的人，猶原是第一線教育工作者。 若欲發展AI輔助台語學習，工程師、台語老師、學生佮家庭愛做伙投入。科技團隊提供親像樂高積木仝款的基礎模組，使用者閣依照教學現場的需求，設計真正實用的工具，按呢才有法度建立通久久長長發展的生態系。 未來，學生下課了後，可能會當佮台語AI練習對話，請伊修正講法；民眾去辦代誌，嘛可能透過智慧通譯機器人，用台語得著服務。 廖教授閣提出一个更大的想像：親像《星際大戰》會曉六千萬種語言的C-3PO，敢有可能打造一个智慧通譯機器人，予人用台語學習全世界的知識，嘛予國際社會認捌臺灣？ 台語屬於低資源語言，佮其他親像加拿大原住民族語、威爾斯語佮世界真濟弱勢語言，攏有資料不足、使用人口減少的危機。若準臺灣會當建立成功的技術佮合作模式，台語經驗就有機會成為國際案例，協助其他語言行入AI時代。 廖教授強調，國際化的基礎其實是本土化。若準臺灣干焦提供英語佮華語，佮其他所在無啥物差別；台語佮多元語言，才是臺灣上特殊的文化資產。加上AI猶咧起步，語言嘛猶未失去希望。重點是老師、學生、社群、政府佮產業敢會當做伙，予科技毋但保存台語，閣會當予人佮人之間的台語對話繼續流傳，敬請收聽《臺灣夜市 Taiwan Yes!》。

  4. Jul 26

    AI敢會曉聽台語？廖元甫教授破解台語科技的未來

    專訪：國立陽明交通大學教授 廖元甫 《臺灣夜市 Taiwan Yes!》這集邀請廖元甫教授，對電腦、語料庫佮大型語言模型出發，開破科技按怎成為台語復振的新工具。 台語教育面對兩項大困難，一个是老師無夠，一个是學生離開教室了後，欠缺會當練習的語境。廖教授的團隊希望開發會曉聽台語、講台語的大型語言模型，予電腦成為老師的助教，協助準備教材；嘛會當成為學生的練習伴，予in轉去厝裡，猶會當繼續用台語問問題、學智識。 欲予AI學會台語，資料就是上重要的基礎。團隊透過教育部計畫，整理公共媒體、網路影音佮會議錄音，建立語音佮文字會當對應的語料。對人工校正的高品質資料，到電腦自動掠的大量素材，攏是訓練模型袂當欠缺的養分。未來，台語聽寫、會議紀錄、字幕、摘要佮關鍵字整理，攏會使透過AI完成。 廖教授嘛提醒，AI時代真正重要的，毋是人會曉寫偌濟程式，顛倒是敢會曉清楚表達問題、組織想法佮提出判斷。台語、客語、原住民族語，攏面對資料無夠的挑戰。語言科技的發展毋是相搶資源，是愛共享經驗、做伙建立臺灣家己的AI能力。敬請收聽《臺灣夜市 Taiwan Yes!》。

  5. Jul 19

    台語朗讀三冠王 理科腦+語言專長 AI復振新希望

    專訪：基隆二信高中學生 張語宸 《臺灣夜市 Taiwan Yes!》節目邀請基隆二信高中學生張語宸，分享伊自國小開始就投入台語朗讀比賽，已經提著國小、國中kah高中三座全國冠軍。除了語言專長，張語宸目前讀藍碳實驗班，關心環境kah能源等等的公共議題。 少年世代展現新的台語使用者面貌，張語宸講：未來會koh參加社會組的台語朗讀比賽，阿旻鼓勵愛共語言，「行入社會的應用」，不只是停留佇「社會組的語言競賽」。 雖然無一定愛成為語言工作者，毋過透過日常生活繼續講台語，本身就是語言復振上重要的力量。張語宸16歲少女的故事，嘛予咱看著台語傳承的新希望。 張語宸相信，「台語一定愛靠阮這代繼續講落去，若無，講的人會愈來愈少。」主持人阿旻也建議語宸，佇AI時代，會當發揮語言專長kah理科的頭殼，幫助台語建立新的AI語言模型kah AI主權。

  6. Jul 12

    語言生態破病矣 台語復振愛共規片樹林顧予好勢

    專訪：新竹市本土語推廣協會 前理事 游沛綺 《臺灣夜市 Taiwan Yes!》節目邀請新竹市本土語推廣協會前理事游沛綺Nóo-lah，分享伊行入校園推動台語教育的第一線經驗。Nóo-lah自2010年代開始投入台語復振，後來進入新竹科學園區邊仔的學校教台語，才發現真濟孩子連「菜頭粿」都聽無。 Nóo-lah指出，台語教育的問題毋是單一孩子袂曉講，是規个語言環境出問題。學校一禮拜一節課，下課踏出教室，生活內底就無台語。家長重視英文kah升學，台語四常被看做無路用的科目，這是語言復振上大的結構挑戰。 面對這款現場，Nóo-lah用民主、人本的方式設計課程。低年級用故事、配音、遊戲kah合作任務，引導孩子開喙講台語。伊強調，語言愛先予孩子感覺有趣，才有機會變成生活的一部分。 中高年級的課程，Nóo-lah改用《小王子》台文版、媽祖出巡等等的主題，予學生用台語熟似世界、理解在地文化。伊相信，台語不只是數念過去，mā會當講科技kah公共議題。 主持人阿旻指出，台語教育若欲成功，除了老師愛有熱情，koh需要制度支持。Nóo-lah也主張，台灣需要建立官方語言制度，予本土語進入政府、學校、公共空間kah就業條件，形成真正沉浸式的語言環境。 自遊戲到制度，Nóo-lah的故事提醒咱：台語復振愛有人佇教室內陪孩子開喙，更加愛國家社會共規片語言樹林顧予好勢。

  7. Jul 5

    共家己的角色發揮好勢 每一个台灣人攏是黃欣

    專訪：作家 吳品瑜 《臺灣夜市 Taiwan Yes!》節目邀請作家吳品瑜分享新作品《誰是黃欣？》。作品以日本時代台南仕紳黃欣做主角，透過小說重新共台灣人對本土歷史人物的記持叫精神。 吳品瑜指出，黃欣除了是企業家、政治人物，mā是慈善家kah文化推手。伊的一生有五十外个職務，不而過無予身份限制，面對台灣議會請願運動等等，猶原願意出面請律師、救人，展現台灣人佇殖民時代的勇氣kah智慧。 節目中，吳品瑜特別講著台南大舞台的故事。1924年上海劇團來台南演出，因為中人走路，五十外人無錢轉去上海，黃欣kah府城人士共同包票支持，最後協助劇團平安轉去中國。吳品瑜形容這段歷史，予人看著百冬前，就實現「Taiwan can help」的精神。 主持人阿旻指出，黃欣的故事除了是挖歷史，koh是台灣人重新共認同揣轉來的過程。吳品瑜開七冬寫作、三冬揣資料，自黃欣6百外條漢詩內底，看見台灣人用漢文、台語保存思想kah情感的力量。 作品也延伸到校園舞台。台南家齊女中學生共《誰是黃欣？》改編做台語讀劇，用母語講台灣人的故事。吳品瑜感動表示，少年人透過台語演出，會當重新發現母語，會當表達koh較深層的感情。

  8. Jun 28

    佇AI 袂記得進前：臺灣走揣語言的百年旅程

    綜合訪問：臺文作家洪明道、臺語文運動者陳豐惠、少年臺文創作者王詩涵＆孫翊倫、臺語Hip-hop音樂人黃啟軒、家庭語言實踐者四寶媽、德國語言學者君德、臺灣AI研究團隊廖元甫教授。 欲消滅一種語言，可能只要一个政策命令。不而過，欲共伊救轉來，煞可能需要一个世紀。 《臺灣夜市Taiwan Yes!》製作「佇AI 袂記得進前：臺灣走揣語言的百年旅程」，結合歷史聲音，人物訪談、文學創作、音樂、人工智慧佮聲音設計的創新廣播專題。 專題由兩改國語經驗開始講起，透過七十外冬的歷史錄音：蔣介石抗戰勝利講話，加上國語運動推動參與者何容等等的聲音檔案。並且訪問臺文作家洪明道、臺語文運動推行者陳豐惠、少年臺文創作者王詩涵佮孫翊倫，Hip-hop音樂人黃啟軒、家庭語言實踐者四寶媽、德國語言學者君德、臺灣AI研究團隊廖元甫教授等等十外位受訪者。 內容由家庭、教育、文學、音樂、科技等等的角度出發，呈現語言流失，毋是自然發生，顛倒是歷史政策、社會觀念佮世代創傷共同造成的結果。 節目當中，洪明道分享家己猶因為「台灣國語」，媽媽送伊去接受正音教育，甚至去手術「擢舌根」的經驗，證明國語政策的世代創傷。陳豐惠老師反省細漢的時，捌糾舉講台語的同學。不而過，投入台語文運動了後，也重新思考臺灣這段猶未完成的語言轉型正義。 少年世代成立語言巢，透過文學、音樂創作，台語家庭投入台語親子教育，用屬於in 的方式，重新共台語建立佇日常生活。 節目後半段共視角，延伸到人工智慧。當當大型語言模型成為未來人類主要的智識入口，若AI無台語語料，語言可能毋是消失佇公共空間，顛倒消失佇數位世界。透過國立陽明交通大學AI團隊，廖元甫教授分享按怎建立台語大語言模型、語音資料庫佮 AI語言主權，提出語言復振進入AI時代的新課題。 《佇AI 袂記得進前》不只是討論台語，嘛提出全球瀕危語言共同面對的問題。當當AI開始學習人類語言，人類欲留予AI啥物聲音？這毋是臺灣獨有的課題，嘛是全球語言文化共同的未來。 透過聲音穿過歷史、人物生命故事佮未來科技，將語言復振由文化保存延伸到AI治理，期待予世界聽見：真正需要記得語言的，毋是AI，是咱家己。

See All (90)

About

上蓋媠氣咱寶島，鮮沢時行Let’s Go。 臺灣夜市人呵咾，Taiwan Yes more and more! 《臺灣夜市》希冀透過Yes話題與Yes人物訪談，串接一個饒富趣味，且有層次的生活風格類廣播節目。將臺灣最美、最樸實的傳統新舊、各式文化，重新發掘與包裝。節目也希冀帶領聽眾走進最時尚、最流行、最發燒的議題外，也介紹臺灣各產業發光發熱的人物，或是默默深耕已久的在地專業人士，唯有深入臺灣地方，才能有蓄積的能量，再創國際聲量。 前往＞＞央廣台語粉絲團聽友來函： 17rti@rti.org.tw

Information

  • Creator
    曾偉旻, 央廣工作群,Rti
  • Years Active
    2025 - 2026
  • Episodes
    90
  • Rating
    Clean
  • Copyright
    © Copyright 2018-2026 Rti - For Personal Use Only
  • Show Website
    臺灣夜市Taiwan Yes

You Might Also Like