Emisión en sefardí

Radio Exterior
  • 0.0 (0)
  • Society & Culture
  • Updated Daily

La "Emisión Sefarad" es un programa kultural de radio, en lingua sefardí o djudeo-espanyol. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Matilda i Rajel Barnatán, madre i ija, aparejan i prezentan las emisiones i sus kontenido por entero:entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí "Emisión Sefarad" guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes. Viviana Barnatan (colaborador externo)

  1. 7h ago

    Emisión en sefardí- Kuzina de Emisión Sefarad. Tradisión: Revanadas de parida - 04/10/2026

    Las rechetas tradisionales sefardim i sus savores, oy prezentamos las "Revanadas de parida" Vos azemos musafires en la "Kuzina de Emisión Sefarad" para aparejar muevas rechetas de la kuzina tradisional. La kuzina i platikos sefardim fueron viashando injunto a la lingua traverso los distintos paízes onde moraron los sefardim dempués de la ekspulsión de España en 1492, adjustando muevos savores i yevando los propios tradisionales a distintos kantones de las sivdades. Las rechetas se mijoraron kon distintos ingredientes, ma siempre konservan la tradisión ke fue pasando de famyia en famyia, es la tradisión ke engalana "muestra mesa". Entre eyias prezentamos rikas rechetas onde los kalavasines se trokan en savuridos platikos komo "Dukadikos de kalavasines", i unotra tradisional recheta sefardí "Medias de kalavasines", las medias se yaman ansí por la forma en ke se trokan los kalavasines, se pueden reyenar de diversitá de vedruras. En las dulsurias kontamos oy kon la recheta tradisional de las afamadas "Revanadas de parida" ke son a base de leche i pan, para ke las mujeres paridas puedan tener fuerza i enerjía, rikas en kualker momento. Patrimonio muzikal: "Te tomí" en la versión de Janet & Jak Esim i el kante gastronómiko "Los guisados de las berendjenas" en la versión de Mónica Monasterio. Kurunamos el programa kon el kante "La kumida de la manyana" en la interpretasión de Marlène Samoun. "Para kompartir rechetas sefardim la Kuzina de Emisión Sefarad" Escuchar audio

  2. Sep 27

    Emisión en sefardí - Sukot: Fiesta de las Kavanyas. Nuves de Gloria - 27/09/2026

    Selevramos Sukot, la Fiesta de las Kavanyas ke rekodran las Nuves de Gloria Divinas. Kompartimos i selevramos kon los oyentes Sukot, Fiesta de las Kavanyas en el Kalendario Evreo, ke rekodran las Nuves de Gloria de la proteksión del Dió. Vos azemos musafires en muestra "Kavanya de Emisión Sefarad" ¿Saves ke signifika Sukot? Selevramos kon la fragua de una ermoza Suká o Kavanya, es una fiesta alegre de la Torá onde devemos kumer i morar en la kavanya. Te eksplikamos komo deve fraguarse la Kavanya. Esta es una Fiesta Agríkola de la Torá onde pedimos al Dió por las luvias para toda la anyada, pujando las koseschas. ¿Konoses kualas son las kuatro espesies de Sukot? Tambyén te kontamos kada una de las kuatro espesies de Sukot yamadas "Arbaa Minim" ke son Lulav, Etrog, Hadás, i Aravá, kuatro espesies vejetales kon las kualas azemos las orasiones espesiales, nomvres, signifikado i leyes. Kostumvres i komo adornar muestra Suká. Aondamos en el signifikado más profondo i espiritual de Sukot. Múzika festiva i alegre, un kante espesial para Sukot: "Entre las huertas" interpretado por Kohava Levy, i el kante litúrjiko "Muestro Senyor Elo-henu" en la interpretasión de la kantadera sefardí Yasmín Levy. Kurunamos el programa festivo de Sukot kon la Nana "Si este niño se durmiera" en la interpretasión de Ángel Carril. "Los oyentes son musafires en la Suká de Emisión Sefarad ¡Sukot alegre!" Escuchar audio

  3. Sep 20

    Emisión en sefardí - Yom Kipur: Día del Perdón, el más sagrado de la anyada - 20/09/26

    El día más sagrado del Kalendario Evreo: ayuno, análiza i limpiesa de la alma. Kompartimos un programa dedikado a Yom Kipur, Día del Perdón ke prinsipia la nochada del Domingo 20, kon la análiza injunto al ayuno total. Es un día de enerjía espesial para arepentirmos i ser predonados por el Dió. Eksplikasiones i signifikado:¿Ké es Yom Kipur? Te kontamos sovre Yom Kipur, ke kaye el día numeró 10 del mes de Tishry del kalendario evreo i sus leyes. Este día sagrado kompleta la análiza i bilonio de la alma, ansí el Dió Promete predonar las transgresiones de toda la anyada. Orasiones i empesijo de Yom Kipur: Komo siempre en el Kalendario Evreo el día prinsipia en la nochada anterior, el Domingo 20 de Septiembre. La Neilá, orasión más importante ke marka el siere de las puertas del sielo, al dar fin la sagrada data. Indemás en este programa aondamos en el mesaje profundo del Dió en Yom Kipur, nunka pedrer la esperansa, el poder de alimpiar muestra vida i mijorar. Patrimonio muzikal: kompartimos un Salmo "Habú L'Ado-nay", (múzika i boz Mijael Hayom) este Salmo fue kompozado por el Rey David para la inugurasión del Sagrado Templo i una "Birajá para la mujer", indemás ofresemos un kante rekodrando en esta data a las Nonas de la autoría de Flory Jagoda "Rikordus di mi Nona". Kurunamos el programa kon una esmoviente orasión "Kedushá" kon múzika i boz de Mijael Hayom. "Yom Kipur, la orasión i el ayuno en la limpiesa de la alma" Escuchar audio

  4. Sep 13

    Emisión en sefardí - Selevrasión de Rosh Ha Shaná: Anyo Muevo Evreo 5787 - 13/09/26

    La anyada Mueva 5787 en el Kalendario Evreo: istoria, signifikado, el shofar i el Seder Selevramos kon los oyentes Rosh Ha Shaná, el anyo muevo 5787 ke prinsipió el Viernes 11, mos topamos en la selevrasión del empesijo de la mueva Anyada, el Domingo 13 en siendo el sigundo día festivo. En la Torá, Bemidbar, Números, el Dió dize ansí " Y en el Séptimo mes, en el primero del mes...un día de toque de Shofar será para vosotros"... Kompartimos kon los oyentes el orijin de Rosh Ha Shaná, una festividad sagrada ke konmemora la kreasión del ombre por parte del Dió. Nomvres de la festividad: Rosh Ha Shaná kere dizir empesijo de la anyada, se selevra kon un Seder familiar espesial, ma tambyén aresive unotros nombres, entre eyios Yom Teruá, Día del Toke del Shofar, Yom Ha Din, Día del Djuisio i Yom Hazikaron, Día del Rekodro, te kontamos sus signifikados. La mesa, la fiesta i el Seder: el Seder es el sentro de la festividad ke inisia una mueva Anyada, kumemos alimentos-simbol kon orasiones i binsisiones kada uno. El Seder: la kumida festiva se selevra las dos nochadas de Rosh Ha Shaná, en famyia, es un momento espesial para dezear todo lo mijor a la famyia i amigos, onde prinsipiamos kon la mansana kon miel, para tener una anyada buena i dulse, entre los alimentos kumemos silká (en ivrit) aselgas ke es vinien del verbo evreo "Salek" ke kere dizir kitar, injunto a la bindisión pedimos ke se kiten muestros enemigos, te kontamos ke unotros alimentos tomamos i ke signifikado kontan, todo en este programa. Konosemos kual fue el primer Rosh Ha Shaná i los manaderos istórikos i biblikos onde aparese esta Festividad, ke es una de las más importantes de el Kalendario Evreo. El Djuisio Divino para kada presona: djuisio i análiza interior. El sono del Shofar (kuerno de karnero). El Dió disho en su mesaje" Esta es una signal para tus ijos, deshendientes, ansí komo estuvites delantre de Mí en el djuisio en este día i me apiadé de tí ansí tambyén tus ijos se toparán delantre Mío en el djuisio i me Apiadaré de eyios"...Sentimos melodías festivas i tradisionales, entre eyias "Bendigamos" kante litúrjiko i el kante tradisional "La Rosa enflorece", en la versión de A Ballare. Kurunamos el programa kon múzika Sinagogal Baroka "Kol Ha Neshamá" Toda alma agradese al Dió, (Cristiano Lidarti) ke interpreta The Cameran Singers, Direksión Avnei Itai. "Emisión Sefarad: Anyada buena i dulse kon bindisiones para 5787" Escuchar audio

  5. Sep 7

    Emisión en sefardí - Jornada Europea de la Kultura Djudía 2026 - 06/09/26

    Selevrasión de la Jornada Europea de la Kultura Djudía: literatura, istoria, múzika i el presonaje sefardí José Papo. Ofresemos a los oyentes un programa selevrando la kultura djudía i sefardí. En primero vos kontamos sovre los Shindler espanyoles, los Diplomátikos salvadores de djudiós en tiempos del Holocausto, i komo pusieron en riesgo sus lavoros por salvar el mayor karar de djudiós. Fueron rekonosidos por el "Yad Vashem", Museo del Holocausto de Israel (Yerushalayim) komo "Justos entre las Naciones" komo simbol de onor i dignidad, en su apoyo a salvar las vidas de sienes de djudiós en tiempos de persekusión nazi. Kontinuamos selevrando kon múzika "Consejos a un muchacho" es un romanse ke mos interpreta Mónica Monasterio, i el kante tradisional "Con muncha licencia" ke interpreta Ángel Carril, kantante i investigador del patrimonio muzikal sefardí. En istoria i presonajes prezentamos la interesante Krónika de José Papo, kantor sefardí de una Sinagoga djudeo-espanyola de París, en palavras de Jacobo Israel Garzón, eskritor i investigador sefardí. Kurunamos el programa kon el kante tradisional sefardí "Abraham Abinu" en la versión de Soledad Bentolila. "En Emisión Sefarad la kultura se ambeza traverso la Radio, selevrando la Jornada Europea de la Kultura Djudía" Escuchar audio

  6. Aug 30

    Emisión en sefardí - Komedia muzikal i umor sefardí: Matilda Koen Sarano - 30/08/26

    Ofresemos a los oyentes un programa dedikado a la komedia muzikal sefardí umorístika, kon la profesora i eskritora sefardí Matilda Koen Sarano. La komedia umorísitka sefardí konta kon autores de gran nomvre komo Matilda Koen Sarano, ke mos deshó relatos i munchas lisiones en sus livros i ovras de teatro ke kompozó traverso su vida dedikada a la lingua sefardí. Kompartimos kon los oyentes aktos de la Komedia Muzikal "Maridos i Mujeres", onde akontesen distintas shenas de la vida entre los esposos, kon un toke de umor. El umor se topa muy prezente en tekstos, relatos i kuentesikos, ansí komo en el ancho refranero de tradisión oral. Tambyén kon kantes ke akompanyan los distintos aktos, para ambezar la lingua i los modos de pronunsiasión del sefardí. Patrimonio muzikal: "Más vale trokar" en la interpretasión de la kantadera Fortuna i más múzika sefardí. Kurunamos el programa kon el kante tradisional sefardí "Morenika" ke konta kon diferentes versiones, sentimos la de Fortuna. "En Emisión Sefarad las lisiones se kontan kon umor sefardí, entre kantes i kantaderas" Escuchar audio

  7. Aug 23

    Emisión en sefardí - Leonor de Carvajal, kriptodjudía kemada en la oguera - 23/08/26

    Ofresemos a los oyentes un kompleto programa sovre el prozeso de Inkizisión de la kriptodjudía Leonor de Carvajal, ke fue kemada en la oguera (manaderos i investigasiones: Matilde Gini Barnatán. Moshé Shaúl. Michelle Hamilton). Vos ofresemos investigasiones sovre la preta istoria de Leonor de Carvajal, ke fue djuzgada i kondenada por la Inkizisión, toda su istoria injunto a la de su ermano Luis de Carvajal, los dos fueron malorozamente kemados en la oguera. Leonor fue una mujer valiente ke leshos de demandar piedad a los inkisidores siempre disho ser djudía durante los lungos anyos de su djuzgo, Toda la informasión de este kavso ke es análiza de estudiosos i akadémikos. Su famyia yegó a Nueva Espanya (Méjico) en el siglo XVI. La mayoría de su famyia fue kondenada komo "Djudaizante" entre los anyos 1589 i 1590. Patrimonio muzikal sefardí en el programa: kante de boda "Con muncha licencia" interpretado por Ángel Carril, kontinuamos kon el kante tradisional sefardí d'amor "Una tarde de enverano". Kurunamos el programa de investigasión istórika kon el kante "Esta montaña d'enfrente" en la versión de la kantadera Esther Ackermann. Foto: Biblioteca Bancroft de la Universidad de California (Berkeley).  En Emisión Sefarad los kavsos de kriptodjudiós más afamados i sus prozesos". Escuchar audio

  8. Aug 13

    Emisión en sefardí - Presonajes Sefardim: Moshé de León, kavalista - 16/08/26

    Ofresemos a los oyentes un kapitoló sovre Filatelia de presonajes Sefardim: Moshé de León. En este programa konosemos la istoria de un seyo dedikado a Moshé de León, gran kavalista de Sefarad, destakando en la istoria de los djudiós espanyoles. Asigún investigasiones nasido en Guadalajara, konosido komo Shem Tob de León, gran filósofo ke desde manseviko se interesó por la fe i relijión. Por su saviduría es rekodrado en la istoria del djudaísmo de Sefarad komo uno de sus más importantes presonajes. Indemás Moshé Ben Shem Tob dedikó gran parte de su vida a anchear el konosimiento i formó parte de la diskusión en verso la fe i relijión propias de los intelektuales del siglo xiii en la Corona de Castilla. (manaderos sovre la filatelia: Moshé Shaúl). Kontinuamos kon múzika sefardí i mos akompanyan kantes kontemporáneos i tradisionales, entre eyios "Arvoliko" de la autoría de Flory Jagoda, "Mira" ke interpretan Janet & Jak Esim i kurunamos el programa istóriko kon el kante tradisional sefardí "Por la tu puerta" en la versión de Fortuna. "En Emisión Sefarad los presonajes más destakados en istoria, sensias, i literaturas" Escuchar audio

See All (20)

About

La "Emisión Sefarad" es un programa kultural de radio, en lingua sefardí o djudeo-espanyol. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Matilda i Rajel Barnatán, madre i ija, aparejan i prezentan las emisiones i sus kontenido por entero:entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí "Emisión Sefarad" guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes. Viviana Barnatan (colaborador externo)

Information