Habari za UN - Mtazamo wa Kimataifa Habari za kiutu

Mtazamo wa Kimataifa Habari za kiutu

  1. 2d ago

    20 NOVEMBA 2026

    Hii leo jaridani tunakuletea mada kwa kina. Nchini Kenya, shirika la Umoja wa Mataifa la Maendeleo ya Viwanda UNIDO limechukua hatua kuendeleza viwanda hadi kusaidia wakulima wa migomba kutotupa mashina ya zao hilo badala yake kutengeneza hata taulo za kike. Kwa hayo na mengine mengi, Assumpta Massoi wa Idhaa akiwa Nairobi, Kenya amezungumza na Naibu Mwakilishi wa UNIDO nchini humo Linet Luvai anayeanza kwa kuelezea umuhimu wa maendeleo ya viwanda.Karibu Linet. Pia tunakuletea muhtasari wa habari. • Leo ni siku ya siku ya Maendeleo ya Viwanda barani Afrika na Katibu Mkuu wa Umoja wa Mataifa, António Guterres, katika ujumbe wake wa siku hii ametoa wito wa kuimarishwa kwa uwekezaji na ushirikiano kati ya sekta za umma na binafsi ili kuharakisha maendeleo ya viwanda barani Afrika.Guterres amehimiza kuongezwa nguvu kwenye sekta zinazokuwa kwa kasi kama vile magari yanayotumia umeme, utengenezaji wa betri, vipuri vya kompyuta na nishati jadidifu, na kueleza hizi zinafungua fursa mpya za kiuchumi kwa mataifa ya Afrika na kusaidia bara hilo kubadilisha uchumi wake, kuongeza ajira zenye tija, kuhamia kwenye matumizi ya nishati safi na kujenga mustakabali wenye ustawi na uendelevu • Leo pia ni Siku ya Kimataifa ya Watoto na shirika la Elimu Haiwezi Kusubiri, (ECW) limetangaza uwekezaji wa dola milioni 52 kusaidia zaidi ya watoto 300,000 kuendelea kupata elimu katika nchi za Lebanon, Myanmar na Sudan Kusini, ambazo zimeathiriwa na migogoro na majanga ya kibinadamu. Akizungumza na waandishi wa habari mjini Geneva, Uswisi, Mkurugenzi wa ECW, Maysa Jalbout, amesema “Katika nchi zote tatu, angalau nusu ya watoto wanaofikiwa ni wasichana, na takriban mtoto mmoja kati ya kumi ana ulemavu. Hata hivyo, kufungua mlango wa darasa pekee hakutoshi kuwarejesha wasichana shuleni.” • Na shirika la Umoja wa Mataifa la Mpango wa Chakula Duniani, WFP, limetangaza mpango wa kusaidia watu milioni 91 wanaokabiliwa na uhaba mkubwa wa chakula mwaka 2027, na kwamba linahitaji zaidi ya dola bilioni 12 ili kutekeleza mpango huo. Mwenyeji wako ni Anold Kayanda, karibu!

  2. 3d ago

    19 NOVEMBA 2026

    Hii leo jaridani tunaangazia simulizi ya manusura ya Usugu dhidi ya viuavijasumu (AMR) nchini Kenya, mauaji ya kimbari ya waRohingya nchini Myanmar, na kilim ona ufugaji endelevu inayohimili mabadiliko ya tabianchi nchini Zimbabwe. • Mahakama ya Umoja wa Mataifa kuhusu Haki, (ICJ) imesema kuwa Myanmar ilifanya mauaji ya kimbari dhidi ya jamii ya wachache ya Warohingya jimboni Rakhine. Uamuzi huo, umetolewa leo huko The Hague na jopo la majaji 15 kutoka mataifa mbalimbali duniani, ikiwa ni kesi ya kwanza katika historia ambapo taifa linapatikana na hatia na Mahakama ya Kimataifa ya kutekeleza mauaji ya kimbari • Usugu dhidi ya viuavijasumu (AMR) au antibiotiki ni tishio lisiloonekana kwa macho, lakini madhara yake yanaweza kugharimu maisha. Shirika la Afya la Umoja wa Mataifa Duniani (WHO) linaonya kuhusu hatari hii inayofanya maambukizi kuwa magumu, na wakati mwingine kushindikana kabisa kutibika. Kwa John Kariuki, kutoka Kenya manusura wa AMR, hatari hii si hadithi tu ni hali halisi kwani maambukizi aliyopata baada ya kufanyiwa upasuaji yalimweka kwenye hatari ya kupoteza maisha, baada ya dawa 17 kati ya 18 za viuavijasumu zilizojaribiwa kushindwa kukabiliana na maambukizi hayo. Ni nini hasa kilimtokea, na ana ujumbe gani kwa dunia katika wiki hii ya kuamasisha kuhusu usugu wa viuavijasumu?. • Na nchini Zimbabwe, ufugaji wa samaki aina ya tilapia na matumizi ya teknolojia ya kidijitali vinawasaidia wakulima kuongeza uzalishaji na kupata masoko mapya. Shirika la Umoja wa Mataifa la Chakula na Kilimo, FAO, linasaidia uzalishaji wa vifaranga vya samaki, matumizi ya chakula mbadala chenye gharama nafuu na uuzaji wa bidhaa kupitia mitandao ya kijamii. Mwenyeji wako ni Assumpta Massoi, karibu!

  3. 4d ago

    18 NOVEMBA 2026

    Hii leo jaridani tunakuletea mada kwa kina ambayo leo inakupeleka Moyale eneo lililoko Kaunti ya Masarbit, kaskazini mwa Kenya ambako Assumpta Massoi kupitia video ya Shirika la Umoja wa Mataifa la Mpango wa Chakula duniani, WFP anatuelezea harakati za Umoja wa Mataifa za kusaidia wakimbizi hao. Pia tunakuletea muhtasari wa habari. • Takriban watoto 64 wameuawa na wengine 64 wamejeruhiwa nchini Yemen tangu mapigano yalipozidi kushika kasi kuanzia mwezi Septemba mwaka huu, limesema Shirika la Umoja wa Mataifa la Kuhudumia Watoto (UNICEF). Mapigano hayo yanayoendelea katika maeneo yenye wakazi wengi, hususan Taiz na Lahj, yanahatarisha maisha ya watoto na kuwanyima huduma muhimu. Msemaji wa UNICEF, Ricardo Peres ametoa wito akisema, pande zote zinazohusika katika mgogoro zinapaswa kuwalinda watoto na pia mashirika ya Kimataifa yanapaswa kuruhusiwa kuwafikia walio katika uhitaji mkubwa hivi sasa. • Shirika la Umoja wa Mataifa la Afya Duniani (WHO) limewakutanisha huko Zanzibar, Tanzania, wataalamu wa afya na masuala ya fedha kutoka Afrika na washirika wa kimataifa. Mkutano huo wa siku tatu unalenga kuzisaidia nchi za Afrika kupata takwimu sahihi na za kina kuhusu kiasi cha fedha kinachowekezwa katika huduma hizo, jinsi fedha zinavyotumika na maeneo yanayohitaji uwekezaji zaidi. • Na leo imeanza Wiki ya Kimataifa ya kuelimisha umma kuhusu usugu dhidi ya Viua-Vijasumu au antibiotics. Tayari takwimu za WHO zinaonesha kuwa Usugu wa mathalani bakteria dhidi ya dawa unahusishwa na vifo vya zaidi ya watu milioni 4.7 kila mwaka, na unaweza kusababisha vifo vya hadi watu milioni 39 ifikapo mwaka 2050. Mwenyeji wako ni Cynthia Akhangwa, karibu!

  4. 5d ago

    17 NOVEMBA 2026

    Hii leo jaridani tunakuletea mada kwa kina ambayo leo inakupeleka Kigoma, kaskazini magharibi mwa Tanzania kumulika uchakataji wa samaki na dagaa bila kutumia kuni. Lengo ni kulinda mazingira kwa kuepusha ukataji wa miti halikadhalika afya za wachakataji. Shirika la Umoja wa Mataifa la Chakula na Kilimo, FAO, kupitia FISH4ACP ambao ni mpango wa Jumuiya ya Nchi za Afrika, Karibea na Pasifiki unaolenga kuboresha uzalishaji, ushindani na uendelevu wa minyororo ya thamani ya uvuvi na ufugaji wa viumbe vya majini kwenye maeneo hayo, limeendelea kulinda mazingira na kuinua vipato vya jamii Pia tunakuletea muhtasari wa habari. • Zaidi ya raia 1,630 wameuawa nchini Sudan kutokana na mashambulizi ya ndege zisizo na rubani, droni, huku hospitali, masoko na miundombinu muhimu vikiharibiwa. Ripoti mpya ya Ofisi ya Umoja wa Mataifa ya Haki za Binadamu, OHCHR, inasema matumizi ya droni yamebadili mwenendo wa vita nchini humo, huku raia wakiendelea kubeba mzigo mkubwa wa mashambulizi na kukosa huduma za msingi. • Kamishna Mkuu wa Umoja wa Mataifa wa Haki za Binadamu, Volker Türk, leo ameonya kuwa pendekezo la nchi tano za Muungano wa Ulaya la kuwahamishia baadhi ya wahamiaji Rwanda linaweza kuhatarisha haki zao za msingi. Kupitia msemaji wake, Marta Hurtado, mjini Geneva, Uswisi, Türk amesema mpango huo unazua wasiwasi mkubwa “Ingawa hatujapata fursa ya kuona maudhui ya pendekezo hilo, tuna wasiwasi kuhusu hatari za ukiukwaji wa haki za binadamu zinazoweza kujitokeza kutokana na mpango unaopendekezwa wa kuwahamisha watu kutoka nchi tano za Muungano wa Ulaya na kuwapeleka Rwanda, nchi ambayo hawana uhusiano wowote wa moja kwa moja nayo, na ambayo yenyewe inakabiliwa na changamoto mbalimbali katika masuala ya haki za binadamu.” • Na mvua kubwa na baridi vimegeuza makazi ya muda ya wakazi wa Gaza kuwa madimbwi ya maji na tope, mvua zikiharibu chakula na kuwaacha maelfu ya familia wakihangaika kupata vipasha joto na mlo. Mashirika ya kibinadamu ya Umoja wa Mataifa yasema makumi ya maelfu ya makazi yameharibiwa baada ya siku moja tu ya mvua. Wakati huo, zaidi ya watu milioni 1.7 bado wamekimbia makazi yao, huku milioni 1.4 wakikabiliwa na njaa kali. Mashirika hayo yanasema familia sasa zinapata mlo mmoja wa moto kila baada ya siku mbili badala ya kila siku.” Mwenyeji wako ni Augustine Aramba, karibu!

Ratings & Reviews

5
out of 5
5 Ratings

About

Mtazamo wa Kimataifa Habari za kiutu

More From United Nations