Noss chors Radiotelevisiun Svizra Rumantscha (RTR)

La stad n'è betg anc propi arrivada. Dis da bellezza e temperaturas chaudas paran dad esser lunsch davent. Perquai emprova Noss chors da far vegnir la stad cun chanzuns. Tgi sa?! Forsa ch'i funcziuna...

«Noss chors» dechantan la stad en tut sias fassettas. I vegn chantà dal sulegl, da las muntognas, d'esser ad alp u era da splers e fluras. Forsa che la stad auda las melodias ed arriva lura finalmain era tar nus.

Sco part da las festivitads «Sut igl ischi - 600 onns Ligia Grischa» chanta la Surselva per la 46avla giada en il rom d'ina festa districtuala. Per vegnir en atmosfera da festa, lascha Noss chors chantar a tut ils chors participants gia avant l'occurrenza.

Ils 30 chors che èn part da la Festa da chant districtuala che ha lieu ils 15 da zercladur a Trun, emplainan quest'emissiun cun registraziuns dal passà. Sper insaquantas registraziuns da festas, udis era chanzuns registradas a concerts u per portatuns.

Sper ina gronda maioritad da chanzuns rumantschas, datti era ina u l'autra surpresa en in'autra lingua.

En occasiun da la Festa da musica chantunala che ha lieu ils 8 e 9 da zercladur a Claustra, prenda Noss chors nanavant in grondius project che unescha chant e musica. I sa tracta qua da las «perlas rumantschas».

Per il dirigent, cumponist ed arranschader sursilvan Corsin Tuor valan las chanzuns popularas rumantschas sco perlas. Cul patratg da pussibilitar da sunar questas grondiusas melodias era a las musicas instrumentalas, ha el lantschà dal 2006 in project che sa numna «perlas rumantschas».

Ditg curt: Corsin Tuor ha arranschà u per part era laschà arranschar ina tscherna da chanzuns or da la scena da chors rumantscha. Suenter ha el registrà quests arranschaments cun la Bürgermusik Luzern. Dus ulteriurs albums han cumplettà ses project ad ina uschenumnada trilogia. Questa cuntinuaziun ha el realisà cun la Brassband Berner Oberland. Plinavant è questa giada il chant da chor vegnì integrà en ils arranschaments per musica da brass. L'ensemble vocal «Ensemble deCanto» ed ils dus chors «Vokalensemble incantanti» e «Cantus Firmus Surselva» èn stadas las furmaziuns da collavuraziun per las parts chantadas. Ina tscherna d'arranschaments ch'èn sin ils albums II e III emplainan quest'emissiun da Noss chors.

Chantar ensemen fa bain a l'olma u betg? Noss chors ha rimnà in schelta da chanzuns popularas rumantschas, tudestgas e talianas. Ina u l'autra chanzun è segir era gia stada part d'in chant da cumpagnia ad ina festa.

Cun chanzuns sco «Vo Luzärn uf Wäggis zue», «Quattro cavai che trottano» fin tar «La canzun dil bau» datti in viadi popular cun variaziun linguistica. Sper insaquantas chanzuns fitg enconuschentas preschenta Noss chors era intgina melodia populara main renumada – tgi sa, forsa sa mida quai suenter quest'emissiun?

Per il mais matg datti uschè bleras chanzuns sco per nagin auter mais da l'onn. Durant l'ura da Noss chors udis ina schelta da chanzuns da quest mais. I vegn chantà da siemis, miraclas ed auter pli.

Chanzuns sco «Siemis da matg» da Gion Antoni Derungs u «Mai» dad Armon Cantieni emplainan l'emissiun dad oz cun tuns e suns primavauns rumantschs. Sper diversas cumposiziuns da cumponists or dal ravugl grischun, datti d'udir er ina u l'autra chanzun tudestga ed englaisa. «In the merry month of may» da Michael East u «Im wunderschönen Monat Mai» da Robert Schumann procuran variaziun linguistica e stilistica.

Il SKJF è vegnì fundà avant bunamain 10 onns a Turitg. Qua sa tracti d'ina uniun che promova il chant d'uffants e giuvenils. Tranter auter organisescha questa societad mintga pèr onns in festival da chant d'uffants e giuvenils. Il novavel festival ha avant dacurt gì lieu a Neuchâtel.

En connex cun il SKJF che ha gì lieu quest onn a Neuchâtel ha Noss chors rimnà registraziuns da chors d'uffants e giuvenils da differentas regiuns da la Svizra. Cun frestgezza e schlantsch chantan las vuschs giuvnas chanzuns tradiziunalas da noss pajais ma era chanzuns en linguas estras. As laschai inspirar da la levezza e dal moviment dal chant giuven.