牛哥解經（27）：【寓哲學於文學嘅大文豪】莊子同沙特：時差二千年，地隔八千里，以文學語言共同展開「痛苦探索」丨命中自由（1）丨《兩種自由的追求・莊子與沙特》

——「莊子與沙特的生活年代、社會背景有極大不同，但他們都代表了社會下層（莊子）或社會中層（沙特）的知識分子在社會現實生活中找不到出路、卻又非要發現一條小路的痛苦探索」 專門研究道家嘅劉笑敢喺一九八零年代寫咗《兩種自由的追求・莊子與沙特》（下稱《兩種自由》）呢本書仔，顧名思義，就係要將兩位相隔超過二千年嘅中西哲人作比較，更要對比兩者嘅自由觀。一睇到呢度，心水清嘅讀者就會問，到底兩者可唔可以有效咁比較呢？到底先秦哲學講唔講到「自由」呢？ 劉笑敢對於呢兩條問題嘅答案都係：可以。 喺呢個總共四到五集嘅小系列「命中自由」，我希望能夠同你用少少嘅時間，重溫兩位哲人從巨大嘅「命」限底下，所思索嘅自由。為此，我哋會睇下點解莊子同沙特係可以有效對比，以及兩者對自由嘅睇法到底係點。 由於我唔完全同意劉笑敢嘅論述（佢本人喺《兩種自由》寫完十年後，寫嘅〈後記〉亦指出《兩種自由》嘅限制或未盡之處），所以我並唔會只使用《兩種自由》嘅理解。而我會使用劉笑敢嘅論述，只係因為箇中有令人容易記憶、以及有部分有意義嘅對比。對於沙特哲學嘅補充，會使用勞思光嘅《存在主義哲學新編》；對於莊子哲學嘅補充，會使用徐復觀嘅《中國人性論史》。 今集，我哋主要從背景同文學手段嚟對比兩者。內容包括： 「人物對比」：雖然莊子同沙特生活喺唔同文化、地區，但如果我哋嘗試抽取佢哋背景嘅特徵，咁就會發現兩者有相當多可以對比嘅地方。 「以文學翅膀思考」：雖然莊子同沙特都以文學為手段呈現思想，但兩者所使用嘅文學方式有所不同。劉指出莊子係「莊子是中國古代第一個浪漫主義文學家」，而沙特就係存在主義嘅文學流派領袖。