【相招來看戲】靠譀古ê特殊能力，tī異世界流浪食好料|とんでもスキルで異世界放浪メシ 台語白話字 Tâi-gí POJ (Pe̍h-ōe-jī)

啥物是異世界?異世界hâm咱這種一般ê世界有啥mih無仝？

聽講異世界ê人攏有魔法，án-ne in ê生活是m̄是比咱較利便？A̍h是講咱ê科學chiū是厲害kah逆天無leh講道理？

Che是1齣主角無代無誌走去異世界，食1堆好食物ê故事，其實除起異世界重要ê元素魔法kah冷兵器ê戰鬥，這齣根本to̍h是「佮寵物四界pha-pha走，ta̍k頓攏teh食生臊」ê美食節目，邀請各位來共阮鬥捧場聽看覓，感恩，ló͘-la̍t，多謝hâⁿ！


訂閱做工á人Youtube頻道：https://www.youtube.com/@chokangalang
完整ê漢羅／POJ對照文稿khǹg ti官方網站：https://cho-kang-a-lang.github.io/


漢羅全文：

靠譀古ê特殊能力，tī異世界流浪食好料


各位朋友，ta̍k-ê好，我是主持人Niau-tāu，歡迎收聽做工á人phá-kheh-su̍h-to͘h。日本A-ní-meh足流行轉世到異世界ê故事，chit-kái，beh kā ta̍k-ê紹介1齣輕鬆koh好看，主角tī異世界旅行兼食好料ê A-ní-meh，chit-má咱趕緊來聽故事--lo͘h ！

Bàng-gah ê起頭是按呢，異世界有1 ê國家，進行勇者召喚，beh ài呼勇者過來幫贊in tàu phah魔王，咱ê主角Mu-khó͘-tah，to̍h án-ne去hông叫--來。Chit種異世界轉世攏有固定ê版路，to̍h是nā勇者hông召喚了後，神明ē賞in特殊能力，得tio̍h能力了後，勇者攏m̄免練武功，隨to̍h會當使用。Án-ne咱話koh講翻頭，hâm Mu-khó͘-tah kāng梯--ê koh有3 ê高中生，tih leh鑑定勇者能力ê時，主角以外ê人，m̄是劍術足厲害，to̍h是魔法真高強，3 ê高中生鑑定ê結果攏chiâⁿ適合戰鬥，m̄-koh Mu-khó͘-tah ê特殊能力soah是hō͘人捎無總ê「網路商店」，chit 3 ê高中生看tio̍h Mu-khó͘-tah ê能力了後，笑hai-hai講，án-ne是beh按怎hâm人去phah魔王--lah。然後in 4 ê to̍h去拜見國王，場面話講soah，國王to̍h邀請in來替家己ê國效勞，koh講凡勢魔王ē知影怎樣hō͘ in koh轉去家己ê世界。Mu-khó͘-tah看tio̍h國王規khian腹肚食kah肥chih-chih，王后koh規身軀攏是金tang-tang ê珠寶，感覺pān勢m̄-tio̍h--leh，雖罔伊tī日本kan-na是1 ê上kài普通ê食頭路人，m̄-koh人情世事ûn-ná是bat--寡，伊想想--leh to̍h kā國王講，歹勢--lah，伊m̄是勇者，留tī chia mā是無啥路用，伊會離開恬恬á過日子，bē惹麻煩。國王看伊ê特殊能力，a̍h知he「網路商店」是啥碗糕，根本mā無聽--過，人看--khài koh無膽，根本無sêng 1 ê勇者，to̍h hō͘伊20 ê金幣，放伊走--ah。

Mu-khó͘-tah to̍h用國王hō͘伊ê金幣chhiàⁿ 1隊護衛，保護伊離開chit-ê國家。聽chit寡護衛講，chit-ê國家ê國王siáu貪koh真愛四界戰爭，beh離開to̍h ài khah緊--leh，若無，到時國界nā去hông封鎖，to̍h走無路--ah。Beh封鎖是因為國王驚人ē一直soan--去，時到to̍h掠無人thang去做兵--a。

Mu-khó͘-tah想講，好佳哉，家己走了有緊。伊ê特殊能力「網路商店」，雖罔無法度戰鬥，m̄-koh to̍h kah咱平素時tī網路頂買物件kāng款，啥to買有。Koh tú好伊真gâu煮食，ta̍k頓飯攏煮kah m̄-nā芳貢貢koh真好食款。想bē到食物ê芳味soah kā傳說--ni̍h ê魔獸「Fén-lī-luh」siâⁿ--來，硬beh chham Mu-khó͘-tah phah契約，講beh做伊ê契約魔獸，窮實to̍h是it tio̍h伊煮飯ê手路，拍算ta̍k頓攏beh食chheⁿ-chhau--ê。Mu-khó͘-tah看眼前chit隻生做ná像大隻野狼ê魔獸面á惡khia̍k-khia̍k，伊m̄敢拒絕，mā kan-na ē-tàng接受chit-ê契約，後--來to̍h ka號名叫做Fé-luh。

Fé-luh m̄-nā愛食，koh足gâu食，Mu-khó͘-tah chŏaⁿ開始煩惱錢無夠用，m̄知是beh怎樣chiah好。尾--á，去ho͘想tio̍h講ē-sái去做換手ê買賣，to̍h是kā tī網路商店買ê物件thǹg hō͘公會。頭起先，伊先用鹽hâm胡椒來試1-ē-á市草，結果hâm公會喝價了後趁kah十幾倍ê利純，錢是暫時免煩惱--ah，m̄-koh Mu-khó͘-tah猶是心內tám-tám，因為Fé-luh去到tó位攏ē受tio̍h人ê注目，che hâm伊想beh恬恬á過日ê心願to̍h有têng-tâⁿ。

當然--lah，Fé-luh感覺Mu-khó͘-tah真正是ke煩惱--ê，無論是貴族a̍h是國王，軍隊a̍h是啥mih有--ê無--ê，伊攏看bē上目，伊ê本領m̄是teh講笑--ê，凊彩to̍h聽好hō͘ 1 ê國家無--去，何況伊koh有女神teh ka保庇，啥攏無teh驚，顛倒是chit箍主人ê級數有夠kē，實在是hō͘伊看bē落--去，無ka訓練--chè beh thài ē用--chit！想--tio̍h to̍h做，伊chŏaⁿ開始教主人beh按怎使用魔法，m̄-koh用教--ê效果實在無kài好，Fé-luh規氣kā Mu-khó͘-tah tàn去hâm魔獸戰鬥，按算beh hō͘主人tī無拚ē死ê狀況kā魔法學--起-來。Fé-luh驚主人受傷，時到to̍h無人thang煮好料--ê ho͘食，專工koh tī伊ê身軀頂設1 ê魔法ê保護罩，普通ê魔獸根本to̍h傷伊bē-tio̍h。M̄-koh Mu-khó͘-tah 1-ē看tio̍h魔獸niâ，腳to̍h一直chhoah，伊kan-na是1 ê tī公司上班ê普通人，看tio̍h hiah-nī chē魔獸chông--來，腳尾免講mā冷吱吱。不過伊無想beh死，姑不將hē性命戰鬥，結果chit步koh真正有效--lih，魔法to̍h án-ne學--起-來，Fé-luh感覺chit箍主人--hoⁿh，無ka逼是bē-sái--lah。

戰鬥soah Mu-khó͘-tah規ê人軟sîo-sîo，thiám kah beh死，chit-ê時陣伊感覺家己ài食寡甜路--ê人chiah ē khah好，to̍h tī網路商店買規堆無kâng口味ê pháng hâm Fé-luh做夥食。掌管風ê女神tī天頂看kah chih-chài bē-tiâu，伊to上愛食甜ê物件--ā，to̍h藉口講beh hō͘ Mu-khó͘-tah保庇，叫Mu-khó͘-tah ta̍k禮拜攏ài chhoân祭品去ka祈禱，而且koh tī Mu-khó͘-tah ê耳空邊指示講一定ài有紅豆á pháng。Mu-khó͘-tah心內nauh講che nah ē是啥物神明leh指示，根本to̍h是女神teh ka點菜--mah！

Mu-khó͘-tah ê第2 ê契約魔物是1隻「Su-lái-muh」，去ho͘號做Sú-ih，Sú-ih古錐koh tah心，hâm強勢ê Fé-luh無kāng，hō͘ Mu-khó͘-tah疼命命。久--來，Fé-luh to̍h tiāⁿ leh khām-phu-lián講主人大細心，仝款ê要求，對伊to̍h無耐性，對Sú-ih to̍h輕聲細說，Sú-ih聽--tio̍h，to̍h隨kā Fé-luh sai-nai講，「Fé-luh阿叔你無kah意Sú-ih nih！」Fé-luh看伊古錐ê模樣，總算是了解主人是按怎ē hiah théng-sēng Sú-ih。

Sú-ih tăⁿ開始ê戰鬥能力hâm主人差不多，m̄-koh練功練2禮拜了後to̍h比主人koh khah厲害--ah，而且Fé-luh koh ē教Sú-ih戰鬥ê mê角。Só͘-pái Sú-ih hâm Fé-luh攏真興戰鬥，ài食啥in 2隻家己ē去phah，主人bih tī後壁，心驚驚，等in掠--轉-來chiah請公會kā魔獸處理好勢，家己chiah the̍h肉紲lŏe料理。

Mu-khó͘-tah用網路商店ê材料煮--出-來ê料理，ē hō͘食chit寡物件ê異世界生物，能力暫時增加真chē。有1 táu去hō͘ Fé-luh食--tio̍h，sûi to̍h感覺精神有夠好，接載bē tiâu chŏaⁿ走去拍獵。隔轉工Mu-khó͘-tah早起精神，看tio̍h 1堆tha̍h kah ná像山ê魔獸，chhoah 1 tiô；後--來伊to̍h盡量用Fé-luh in phah--來ê肉做料理，m̄敢hō͘ in食siuⁿ chē網路商店ê食物。原本Fé-luh to̍h真顯目--ah，若koh hông知影伊ê主人有chit款pà-koh ê能力，實在m̄是啥物好代，Mu-khó͘-tah to kan-taⁿ想beh恬恬á過日子to̍h好。

M̄-koh tī錢chit方面to̍h免koh煩惱--ah，彼寡lia̍h--tio̍h ê魔獸，肉先ka取--起-來，其他--ê角--lah，羽毛--lah，皮--lah等等ê材料攏賣hō͘公會，Fé-luh phah ê魔獸當然m̄是啥物四界看四界有--ê，有1寡魔獸，級數siuⁿ koân，價數驚--人，連公會to̍h m̄敢收，公會mā無夠錢thang ka買，chit聲Mu-khó͘-tah免講mā好額--ah！

Mu-khó͘-tah ta̍k禮拜攏ài kā風ê女神祈禱，其實to̍h是hō͘女神點伊愛食ê點心。風ê女神ng-ng-iap-iap bih leh偷食，終其尾mā是去hō͘其他ê女神發現--ah，in 3位女神真受氣，有好食--ê竟然無鬥相報，根本to̍h是歹朋友。土ê女神kah火ê女神mā決定beh kā Mu-khó͘-tah保庇，一下看chiah發見講，ĕ，Mu-khó͘-tah kan-taⁿ ē-tàng用土kap火ê魔法，só͘-pái，風ê女神ê保庇無啥應效，根本to是leh偷食步--mah！風ê女神辯解講，伊保庇Fé-luh，Mu-khó͘-tah koh是Fé-luh ê主人，hō͘伊點菜mā是應該--ê-a！掌管水ê女神聽到chia to̍h哭--ah，講án-ne to̍h kan-na伊無thang食，因為伊ê保庇對Mu-khó͘-tah mā無啥路用，其他ê女神看kah真m̄甘，頭殼mo͘h teh燒，佳哉Mu-khó͘-tah緊ka想步講，你ē-sái保庇Sú-ih，án-ne to̍h hâm風ê女神ê做法是仝款--ê。

Mu-khó͘-tah本底是kan-na接受1 ê女神 ê指示niâ，chit-má，soah變做有4 ê女神teh ka點菜，聽hiah chē指示實在是有淡薄á吵，m̄-koh in是女神neh，Mu-khó͘-tah是koh ē-sái講啥？

To̍h án-ne，Mu-khó͘-tah ùi 1 ê城市旅行到另外1 ê，路--ni̍h有Sú-ih hâm Fé-luh做伴，有時á看人tú-tio̍h困難to̍h kâng tàu-saⁿ-kāng，tú-tio̍h--ah賣寡網路商店ê物件做議量，不sám時女神ē來點in kah意ê食物，kā公會tàu處理1寡in無法度解決ê魔獸mā有時有陣--lah。

Mu-khó͘-tah tī chit ê異世界上thiám ê工課，應