De Döschkassen

Heiko Kroll

Seit Jahren hat sie einen festen Platz in den Tageszeitungen von Boyens Medien: die Platt-Kolumne „De Döschkassen“. Mit dem etwas anderen Blick auf die Themen, die die Menschen bewegen, aber auch für Abseitiges unterhält „Sabbelbüddel“ Heiko Kroll immer freitags seine stetig wachsende Fangemeinde - auch via „Podkassen“.

  1. 1d ago

    Wat is’n Podcast?

    Hüüt mok ick mol Reklame in eegene Sook. Veele Lüüd, de mi op mien Döschkassen ansnackt, wunnert sick, wenn ick ehr vertell, dat man den Döschkassen ook heuern kann. Ick nehm‘ den Text, den ick schriff, nömli jedet Mol ook mit ’n Mikrofon op. To’n Anheuern even. Ick segg dorto „Podkassen“. Overs an un för sick is dat je dat, wat man in’t Allgemeine as „Podcast“ kinnt. Nu weet ick overs gor ni so recht, wat Podcast eegentli heeten deiht. Dat is je ’n Woord dat ut twee Wöörd tosomklabüstert is. Pod un Cast. Beides ingelsch. Also heff ick mi mol kloog mokt. „Pod“, dat kann ganz veele Bedüüdung‘ hebben, un twor: Fruchtfleesch, Halter, Kapsel, Sockel, Hülse, Gondel, Bohrfudder, Blosenbinse, Vanillestang‘, Ünnerwotertank, Lafette un noch menniged mehr, dat overs allns nix mit ’n Opnohm to’n Anheuern to kriegen hett. Jo, un „Cast“ hett jüst so veele Bedüüdung‘ nömli: Verdeeln, geeten, arbeiden, betoneern, siedli aflogern, Gips, Gewölle un noch veel mehr. Ook dat hett nix mit wat to kriegen, dat man sick anheuern kann. Nanu? Wat is dat denn? Wat is denn de düütsche Översettung vun Podcast? Tscha, ganz eenfach: De Översettung vun’t ingelsche Podcast op Düütsch is – Achtung: „Podcast“. Schier. Denn weet je nu all ganz genau bescheed, ne. So kunn man also in‘ Buumart gohn un seggen: „Moin, ick harr gern so’n Podcast.“ Denn wurr man vun ’n finnigen Verkööper de Gegenfroog heuern: „Wat wüllt se nu genau? Wüllt se ’n Sockel ut Gips? Dat kann losgohn. Oder wüllt se veellicht ’n Vanillestang-Gewölle? Denn mööt se no’t Reformhuus!“ Dösig, ne? Overs annerlei. Wenn Ju den Döschkassen heuern wüllt, denn gelingt Ju dat op www.boyens-medien.de/doeschkassen oder even överall, wonehm dat Podcasts gifft. Ju künnt ook friedags den QR-Code in de Zeidung blang den Döschkassen afskänn‘, wenn Ju ’n Handy hebbt. Overs nu froogt mi blots ni, wat Handy heet, denn dat Woord för Ackersnacker gifft dat in’t Ingelsche överhaupt ni… In düssen Sinn

  2. Oct 1

    De mobile Insel

    Jo, de Stimmung is ni jüst good bi uns in’t Land. Man weet ni so genau, wo dat wiedergohn schall. Overs vörigen Sünndag, as ick mit mien Reisebus no ’n poor Doog mit’n Truppe vun ’n scheune Tour ut Oldenborg in Oldenborg wellerkeem, leeg de Lösung boben op de Brunsbüttler Hochbrüüch ganz düütli vör mi. Wat een dor in de Höchte vun uns Dithmarschen nömli toerst in de Ooogen steekt, dat sünd so veele Propellers, dat man ehr gor ni so gau telln kann. De Propellers heuert nattüürli to all de Windenergieanlogen. De dorsten Anlogen sünd je Generatoorn, de vun‘ Wind andreeven ward. So. Un so’n Generator is je an un för sick nix wieder as’n Elektromotor, de annersrüm löppt. Dat heet: Wenn man op de Generatoorn Strom gifft, denn drifft se de Propellers an, de denn je Wind mokt. Nu is Dithmarschen je ’n Insel. Dat kümmt dör de Nordsee in Westen, de Eider in Noorn, den Gieselau-Kanol un den Nord-Ostsee-Kanol in Osten un de Elv in Süden. Un blang all de Propelleranlogen hebbt wi je ook al ’n ganzen Schwung Solaranlogen. Wenn uns dat nu also to bunt ward, denn schickt wi den Strom vun de Solar-Anlogen eenfach in de Windrööd, stellt de Propellers so, dat se no Osten pusten doht, kappt de Brüüchen in Brunsbüttel, Ho’dunn, Schopstedt un so wieder, un denn leggt wi eenfach af. „Alle Propellers AK vörut, Herr Kaleu“, heet dann denn. Wi kunnen je erstmol no England fohrn. Un wenn uns dat dor ni gefallt, denn stellt wi de Propellers anners in un fohrt wieder. Veellicht no de Karibik oder sünstwonehm hen, wo dat Klima angenehm is. Veele Lüüd schimpt je över all de Windrööd, de uns Gegend verschannelt. Overs vör den Achtergrund schull man vun de Dingers noch veel mehr buun un gern ook noch mehr Solaranlogen, dormit wi genog Saft vör unse Tour hebbt. Nä, wat hebbt wi ’n Glück. Na jo, in de Karibik wurrn se sick veellicht wunnern, wenn dor ’n niede Insel ansuust keem, op de veele Lüüd Platt schnackt. Overs dat wurr sick mit de Tied wiss trechloopen… In düssen Sinn

  3. Sep 24

    Dat ölige Märchen

    Dor weern mol ’n poor Ölprinzen, de dat Öl, dat annerwegens ut de Eer holt hebbt, an all de Königrieke verköfft hebbt, de Öl hebben wulln. Mit de Tied hebbt de Ölprinzen begreepen, dat de Königrieke je narms anners Öl kriegen kunnen, dorüm hebbt se dat Öl vun Johr to Johr düürer mokt. Un as dat in un üm de Länners, in de veel vun dat Öl ut de Eer holt wurr, ook noch Krieg geeven hett, hebbt de Ölprinzen dat Öl för noch mehr Dolers verkööpen wullt. Overs ni all de Königrieke hebbt dorbi mitmokt. Se hebbt sick gegen de hogen Priese wehrt. Doch een König, nömli Frie’ch de Lange to Merz, wull sick mit de Ölprinzen ni vertörn. Dorüm hett he sien Ministers anwiest, dat se dat Volk bibring‘ schulln, wat dat ni anners gung. Se hebbt nu mol so veel för de edlen Dropens betohn musst. Ook Frie’ch sülms hett sien Volk jümmers verseekert, wat dat keen annere Möglichkeit geev. Frie’ch weer ’n plietschen König, de dat al to veel Mammon bröcht harr, as he noch gor keen König weer. He harr overs ni begreepen, wat ’n König blots dör sien Volk König ween kann. Overs he harr Glück, denn sien Volk harr genau dat ook noch ni begreepen. Ünner Frie’ch sien Volk geev dat veele, de sick över sien Regentschop opgreegt hebbt. Liekers sünd se nästen Dag weller no de Tanksteed fohrt üm to betohln, wat se even to betohln harrn. Overs de Stimmung wurr ni beter. Dorüm hett Frie’ch toletzt op ’n beten vun de Stüüern, de he sülms an den düüern Sprit verdeent hett, verzicht‘, üm dat Tanken so’n ganz lütt beten günstiger to moken. De Ölprinzen hebbt ehr Glück gor ni foten kunnt. Se hebbt ’n düchti grooted Fest fiert, un se all hebbt sick ’n Bild vun Frie’ch den Langen to Merz mit ’n gullenen Rohm över ehre Betten hungen. Intwüschen gungen in Frie’ch sien Königriek al Lüüd pleite, de sick to Opgoov mokt harrn, Lüüd un Sooken dör de Gegend to transporteern. Overs Frie’ch hett wusst, dat man mit Schwund nu mol to reeken harr. Liekers, de Lüüd ut sien Volk weern wieder an schimpen. Overs wenn se noch ni pleite sünd, denn tankt se noch hüüt den düüern Sprit… In düssen Sinn

  4. Sep 17

    Ebbe un Floot un dat Gewicht

    Wenn man sick an de Nordsee stellt un lang genog aftöövt, denn kriegt man to sehn, wat dat Woter mol dor is un denn weller ni. Ebbe un Floot seggt de Fachmann dorto. Nu is mi in de School al vertellt worrn, wat dat mit de Ebbe un de Floot dör de Gravitatschoon vun unsen Mond kümmt. De Eer, so schall dat ween, treckt den Mond an un de Mond treckt an de Eer. So dreiht se sick üm’nanner. Un bi de Treckerie ritt de Mond even ook an dat Woter op de Eer. Wenn de Mond to’n Bispeel jüst över Meldörp steiht, denn is Floot in‘ Spiekerkoog. Un weil de Eer sick eenmol an Dag dreiht, steiht de Mond even ook eenmol an Dag över Meldörp. Is je klor. Overs – Oogenblick mol – worüm hebbt wi denn alle twölf Stünnen, also tweemol an Dag Floot? Hebbt wi noch ’n Mond vun den ick nix weet? Nä, seggt de Fachlüüd, dat is Füsik. De Eer un de Mond dreiht sick tosom as twee Lüüd bi’t Danzen, dorüm treckt de Mond op de een‘ Sied dat Woter an un op de anner Sied ward dat Woter to desülbige Tied wechsleudert as so’n Hulahup-Reifen. Overs wi künnt op’n Diek ni ünnerscheeden, wat wi jüst Antreck- oder Wechsleuder-Floot hebbt. För uns is een Floot jüst so as de annere. Overs wenn sick dat so mit dat Woter verhölt, denn mutt sick dat je mit mi jüst so verholn. Denn weer ick je tweemol an Dag lichter un tweemol an Dag swörer, weil ick je tweemol an dag antrocken oder wechsleudert wurr un tweemol an Dag weer gor nix los. Wenn ick also bi Ebbe in de Bodstuuv op de Woog stoh, denn mutt de Woog je mehr anwiesen as bi Floot. Is doch so, oder ni? Wenn man bi Ebbe, seggt wi mol, 180 Pund wiggt, denn wiggt man bi Floot, also wenn de Mond an een treckt oder man wechsleudert ward, je veellicht blots noch 140 Pund. Dat mutt je so ween, denn dat Woter, dat denn Ünnerscheed mang Ebbe un Floot utmokt, wiggt je wiss veel mehr. Jungedi, worüm bün ick dor ni al veel fröher op kom‘? Dor mokt dat Afnehm‘ je glieks dreemol so veel Spoß. Jo. Ick stell mi vun nu an blots noch no’n Tidenkalenner op de Woog… In düssen Sinn

  5. Sep 10

    Reklame för ümsünst

    Man seggt je, wat dat keen slechte Reklame gifft, ne. Dor is wat an. Den Bewies dorför hebbt wi vörigen Sünndag bi de Wohl in Sachsen-Anhalt sehn. Dor hett je ’n Partei wunnen, de ehrn Noom ick hier nu mol för mi behol. Ick nööm ehr eenfach mol XYZ. Meist 44 Perzent hett de XYZ in Sachsen-Anhalt holt. Un üm dat vörweg to nehm‘: Ick heff mit de XYZ nix an‘ Hoot. Dat de XYZ jedenfalls so veele Krüüze kreegen hett, liggt wiss to’n een‘ doran, dat de annern Partein mit de annern Bookstooven in de vergang’nen Johrn keen würkli goode Figuur mokt hebbt, besünners ni op de Bunnesevene. Dat striedt de annern Partein overs jümmers af. To’n annern liggt dat, no mien Ansehn, doran, dat de XYZ so veel kostenlose Reklame kriegt. Siet Johrn gifft dat ümmer weller Demos gegen de XYZ. Dor kümmt duusende Lüüd tosom un röppt: „Wech mit de XYZ!“ Dor sünd Plakate vun privot druckt worrn, wonehm opsteiht, „Rote Karte für die XYZ“, un so wieder. Ook jede Menge Opkleevers gegen de XYZ gifft dat, de an etliche Steeden kleevt. In etliche Land- un Bunnesdags-Debatten seggt de annern Partein, dat se niemols mit de XYZ tosomarbeiden wurrn. An besten weer dat, wenn de XYZ ganz gau verboden wurr. Wo kümmt dat vun? De XYZ weer noch narms an de Regeerung. Blangbi glööv ick ook gor ni, dat se regeern kunn, weil se so veel mit sick sülm to kriegen hett. Overs jeden Dag geiht dat överall veel mehr as üm annere Partein üm de XYZ. XYZ hier un XYZ dor. So veel Reklame harr de XYZ sick allent gor ni leisten kunnt! Nä, slechte Reklame gifft dat ni. Wat hangen blifft is XYZ. De eenzige Möglichkeit, de XYZ in de Bedüüdunglosigkeit verschwinnen to loten, is, ni över ehr to snacken, ni to kommenteern, wat vun ehr seggt ward un natüürli ook, dat de annern Partein weller mehr Politik för de Minschen moken wurrn, op de ehr Schullern uns Land steiht. Un denn heff ick noch ’n Tipp: Man schull de dorste Partei mit dat „A“ an Anfang würkli in XYZ ümnööm. Denn wurr se nömli meist ganz achter in’t Telefoonbook stohn… In düssen Sinn

  6. Sep 3

    Schutz vör de Schützers

    Vör twee Johr heff ick mi ’n nieded Smartfohn köfft, in so’n ganz bekannten Elektronik-Loden. Un vun den Verkööper heff ick mi to den Ackersnacker noch ’n Anti-Vier’n-Programm andreihn loten. Dat kunn ick ook för mien Kompjuter to Huus un so wieder insetten. Ganz wat Gooded schull dat ween, un blots fief Euros schull dat kosten. De Verkööper weer so fründli, un ick heff mi dorop inloten. Op de fief Müüs keem dat nu ook ni mehr an. Üm dat Schutz-Programm to aktiviern, heff ick to Huus noch düt un dat ingeeven musst. Ook mien Bankverbinnung. Ick geev to, wat ick mi dat allns ni so ganz genau dörleest heff, as dat nu mol so is, bi so veeled, to dat man hüütigendogs tostimm‘ mutt. Tscha, een Johr wieder hett de Anti-Vier’n-Firma sick denn overs mitmol 129 Euros vun mien Konto holt. Dat weer ’n düchtigen Sprung vun fief Euros. Ick wull mi dat noch trüchholn, overs in’t Lüttgedruckte harr ick dat allns to Anfang tostimmt. Dat Geld weer wech. Dor wull ick den Schiet direkt künnigen. Also bün ick op de Internet-Sied vun de Firma gohn. Irgendwat mit Affe un Mäck weer de Noom, meen ick. Annerlei. Dor jedenfalls, wonehm dat op de Sied no de Künnigung gohn schull, keem blots de Mellung, „diese Seite kann nicht angezeigt werden“. Hmm. No dat ick mi denn dör ettliche Internetforums leest harr, keem ick op de Lösung. Tehmli figeliensch weer dat, ganz versteekt. Un denn gung dat los. Siet de Künnigung, keem jede Week mehrere E-Mails vun de Open-Firma. Ick schull doch blieven un op den Schutz ni verzichen. Un denn gung de Pries no ünnen. Intwüschen schall ick blots noch even över 30 Euros in’t Johr betohn. Ach wat, mit 30 Euros reekend sick de Krom anschiend ook. Overs de künnt mi mohl dor kleihn, wonehm de Sünn ni schient. An’t Enn vun dat Kapitel froog ick mi: Wenn de dorste Firma een vör Vier’n ut‘ Internet schützen schall, wokeen schützt een denn vör de Firma? Un vun den Elektronik-Loden lot ick mi ni nochmol so’n Plünnkrom andreihn. Ick bün doch ni bleud… In düssen Sinn

  7. Aug 27

    Unsichtbore Tiern

    Wenn wat buut warrn schall, ’n niede Stroot, ’n Gebüüd oder so, denn künnt so’n Ünnerfang‘ je twee Situatschoon‘ in de Mööt kom‘: Entweder de Buuarbeiders finnd bi’t Kleihn ’n oln Leepel, denn nehmt de Archäologen de Buusteed erstmol ’n Tied lang in Beslag. Oder Naturschützers wiest ’n Tier no, dat vör’t Utstarven steiht. Denn kann dat duuern, bet wieder buut warrn dörft oder dor kümmt gor nix no. Nu weer ick jüst mit de Gemeend Tellnstedt (Tellingstedt) op Tour. Matthias Schlüter, de Börgermeister weer ook mit, un he hett de Lüüd ünnerwegens vertellt, wat in’t Dörp jüst so los is. Dorbi heff ick wat opsnappt: Achter den Buumart an de Südermöhl schall ’n frisched Gewerbegelänne entstohn. Doröver hett de BSS-Ümwelt ut Kiel ’n Warnung utsprooken: De Sellschop hett faststellt, wat dat Gelänne ’n potenziellen Levensruum för „Knoblauchkröten“ dorstellt. Un wenn de Puchs dor würkli levt, denn weer dat problematisch, wat de Buuarbeiden angeiht. Nu geiht dat overs erst richti los: Knoblauchkröten sünd Tiern, de tomeist ünner de Eer levt. Se kleiht sick in, bet to ’n halven Meter un deeper. Dat mutt ’n recht langwieliged Leven ween, overs se wüllt dat je ni anners. De Puchs fangt an no Knoflook to rüüken, wenn man ehr argert. Overs dorför mutt man ehr je erstmol sehn. Notowiesen sünd se blots dör ehr Eiers, also dör den Laich. Un de is an de Steed betlang noch ni nowiest worrn. Overs dat kann noch kom‘, denn de lütten Stinkers, vun de dat ni mehr veel gifft, de wannert. Ick weet ni, wat se ünner de Eer wannert oder wat se dorför an de Luft kümmt. Jedenfalls hett de Börgermeister vun Tellnstedt erstmol dacht, wat man em op’n Arm nehm‘ wull. Overs he hett noleest un faststellt, wat dat de Hüppers würkli gifft. Tscha. Ick wurr mol seggen, wat de Knoblauchkröten ’n echten Joker för Natuurschützers sünd, wenn dat dorüm geiht, Buuarbeiden to stoppen. Man kann ehr ni sehn, overs veellicht sünd se je dor. Un wenn ni, denn kümmt se veellicht loter. So is dat nu mol mit unsichtbore Tiern… In düssen Sinn

  8. Aug 20

    Billers för’n Mors

    Mien Madam köfft an un för sick blots dat, wat jüst in’t Angebot is. Dat is je ook good. Dor kann man veel bi spoorn. Nu keddelt ehr overs „alle“ Angebote, ook Angebote för Sooken, de wi gor ni bruukt. Se seggt, dat se düsse Verkoops-Strategie eenfach ni standholn kann. Un se töövt jeden Sünnobend op all de Prospekte, de bi uns in’t Huus flattert. Se hett ook to jeden Supermart de entspreekende „Äpp“. Un wurr se so’n Äpp vun’ Waffenhöker hebben, denn harrn wi wohrschienli al foffteihn Flinten in’t Schapp. Na jo, ganz so slimm is dat ni. Se kiekt je mehr no Angebote bi de sick dat üm ’n poor Euros dreiht. Un se steiht to ehr lütted Laster. Dat mutt ick anstandslos anerkinn‘. Jedenfalls hebbt wi siet vörige Week Schiethuuspoppier op Tant‘ Meier, op dat Tierbillers afdruckt sünd. Dat weer in’t Angebot. Natüürli. Noch dorto, seggt mien Seute, finnd se de Tiern dorop „nüüdli un so scheun bunt“. Överhaupt mach se allns lieden, wat bunt is, oder rosa. Oder bunt un rosa. Op dat Schiethuuspoppier heff ick betlang, Katten, Giraffen, Elefanten, Zebras, Neeshöörn un Löwen mit ’n Kroon op’n Dööz entdeckt. Dorto kümmt noch ’n poor Blööd, ’n poor Sterns un ’n poor Wulken. Overs ick mutt seggen, wat mi dat sworfallt, dat Poppier no’t Geschäft sien Zweck tokom‘ to loten. Katten to’n Bispeel mach ick würkli gern. Overs ick wurr in Droom ni dorop kom‘, mi mit ’n Katt den Mors… also nä. Echt ni. Ni mol mit ’n Bild vun‘ Katt. Ook ni mit Billers vun irgendwülke annern Tiern. Veellicht wurrn mi ’n poor Minschen infalln, mit de ehr Billers ick sowat dohn kunn. Overs – nää – dat bringt je ook keen würkliche Erleichterung, denn erleichtert heff ick mi je al, wenn dat to den Vörgang kümmt, üm den dat hier geiht. Overs dat is nu as dat is. De Dag ward kom‘, an den dat Tier-Poppier all ween ward. Un ick kann blots an alle Herstellers vun so’n Poppier appelleern: Entwickelt blots keen Schiethuuspoppier mit Nogels oder Wierdroht oder dor bin. Un wenn doch, denn verköfft dat bidde, bidde ni in’t Angebot… In düssen Sinn

See All (369)

About

Seit Jahren hat sie einen festen Platz in den Tageszeitungen von Boyens Medien: die Platt-Kolumne „De Döschkassen“. Mit dem etwas anderen Blick auf die Themen, die die Menschen bewegen, aber auch für Abseitiges unterhält „Sabbelbüddel“ Heiko Kroll immer freitags seine stetig wachsende Fangemeinde - auch via „Podkassen“.

Information

  • Creator
    Heiko Kroll
  • Years Active
    2019 - 2026
  • Episodes
    369
  • Rating
    Clean
  • Copyright
    © Boyens Medien
  • Show Website
    De Döschkassen

You Might Also Like