Radio Manoplas

Radio Manoplas

Falangullo (ou podcast) de entrevistas. Intéresanos falar, e sobre todo escoitar, a persoas con vidas suxestivas e inspiradoras. Media hora para coñecer as súas historias contadas por elas mesmas que remata cunha canción.

  1. Nov 6

    6×12 #RadioManoplas: Charo Lopes Sánchez

    A duodécima entrevistada da sexta tempada é Charo Lopes Sánchez. Naceu nunha das vizosas vilas da comarca do Barbanza: Boiro. Antes de partir cara a Compostela, onde estudaría Xornalismo, encetou —xunto a outras compañeiras e, ás veces, coa influencia dalgúns docentes— unha vida na que o interese pola política e a cultura agromaba. Charo vive a beleza a través da escrita e da imaxe. Escribe en galego internacional, tamén chamado reintegrado, e exprésase tanto na poesía como noutros formatos creativos. Aproveitando que gravamos a entrevista nos locais parroquiais do Cristo da Vitoria, falamos do libro Begonha Caamanho, uma das nossas, no que Charo participa cun fermoso texto que percorre a traxectoria desta muller. Na fotografía, con frecuencia a través do retrato, Charo cuestiona e reclama outro xeito de nos relacionarmos coa imaxe. Ao tempo, propón miradas críticas e creativas, como as que se poden atopar na revista dixital na que participou: caleidoscopica.gal Chama a atención como o feminismo se entrelaza coa vida de Charo. Un exemplo disto é a súa participación como fotógrafa no proxecto “Homes de Coidado”, da UVigo. Rematamos coa ollada de Charo sobre a militancia independentista, unha experiencia que lle permitiu, a ela e a outras compañeiras, convivir e relacionarse con sectores da sociedade habitualmente empobrecidos, encarcerados ou marxinados. Rematamos esta estimulante conversa con Charo coa peza: "No somos nada", de La Polla Records. Botádenos unha man compartindo este proxecto, que podedes na nosa web: radiomanoplas.org e nas principais plataformas.

About

Falangullo (ou podcast) de entrevistas. Intéresanos falar, e sobre todo escoitar, a persoas con vidas suxestivas e inspiradoras. Media hora para coñecer as súas historias contadas por elas mesmas que remata cunha canción.