Voll ine - Der Sportpodcast

Andri Struzina & Oscar Sarmiento

Voll Ine ist der Sportpodcast aus der Schweiz für alle, die Sport nicht nur schauen, sondern darüber diskutieren, mitfiebern und auch mal herrlich danebenliegen wollen. Woche für Woche sprechen die Hosts Andri Struzina und Oscar Sarmiento über aktuelle Themen aus der Sportwelt – einmal aus der Sicht eines Athleten und einmal aus der Perspektive eines Fans. Webseite/Shop: www.volline.ch Instagram: @volline_podcast . Hosted on Acast. See acast.com/privacy for more information.

  1. 8h ago

    #233 - VOLL INE mit... Michael Schmid

    Hüt sind mir nöd elei: Zu Gast isch de Michael Schmid. Er isch früener Liechtgwichts-Ruderer gsi, im Einer de Vorgänger vom Andri, und isch hüt Postdoc für Sportpsychologie a de Uni Bern. Zum Iistieg kläred mir, wieso s gmeinsame Doppelzweier-Training uf em Sarnersee nie es zweits Mal stattgfunde hät (Spoiler: 2,5 Kilo zvill und kei Luscht meh ufs Abnäh). De Michi verzellt sin Wäg. Mit 14 gwünnt er überraschend de U15-Schwiizermeistertitel im Einer und merkt, was mit vollem Iisatz möglich isch. Mit 20 chunnt d Krise: z chli fürs Schwärgwicht, z schwer fürs Liechtgwicht, also vo 80 uf 70 Kilo abnäh. 2008 macht er es Jahr kei Wettkampf und fangt erstmals mit emne Sportpsychologe aa. Churz nach de Geburt vo sim Sohn hört er denn uf, statt no zwei Corona-Jahr bis Tokio aazhänke. Und wieso er de Druck a de Startlinie bis hüt nöd vermisst, nöd emal a de Patrouille des Glaciers mit em Andri. Denn gaht’s id Forschig. Wieso hät d Sportpsychologie immer no es Stigma? Wieso optimiert de EVZ alles, nur nöd das, was en Spieler bim Penalty dänkt? Und git’s de perfekti Moment zum Rücktritt (Messi, Kroos, Simon Ammann)? Für sini Studie hät de Michi über 340 ehemaligi Schwiizer Olympionikinne und Olympionike befragt. Sie händ im Schnitt höcheri Abschlüss und meh Bruefsprestige als sogar ihri eigete Gschwüschter. Dezue chunnt d These vom Chnopf vor em Olympiafinal: Wär würd ihn drücke und eifach verschwinde? De Andri hett ihn, sait er, öfter druckt. Für vill bedütet de Rücktritt drü Sache glichziitig: Verluscht, Entlaschtig und Chance. Und d Identität sött nie nur uf eim Pfiiler stah, sondern au uf Studium, Fründe oder ebe emne Podcast. Zum Schluss red mer drüber, was d Schwiizer Verbänd besser chönnted mache, vom Alumni-Netzwerk bis zum Götti-System à la Mark Cuban. De Michi hät en Appell a alli Athletinne und Athlete: Lesed eui Mails und machet bi de Befragige mit. De Andri hät drü Reminder bruucht. Will mir no lang nöd fertig gsi sind (s «Inner Game of Tennis» wartet no), chunnt de Michi sicher wieder. Vill Spass bim Lose! ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

    #233 - VOLL INE mit... Michael Schmid

  2. Oct 29

    #232 - Voll Ine im PB-Fieber

    Hüt isch alles halb: e halbi Folg, zwei Halbmarathon und trotzdem kei halbi Sach. Und nei, mir sind nöd plötzlich en Laufpodcast worde, au wenn de Oscar churz de Mathias Kyburz und de Andri de Viktor Röthlin gid. De Andri fangt mit Antwerpe aa: es paar belgischi Bierli am Fritig, de Samstig «clean» und am Sunntig 1:11:46, fascht ohni z lide. Er verzellt vo 13 Grad ohni Wind, vonere Strecki voller 90-Grad-Kurve dur d Altstadt, null Höhemeter und vo de beste Stimmig, won er je amne Halbmarathon erläbt hät: Guggemusig, Lüüt mit Tischli und Wii am Strosserand, Konfetti. Dezue d Frog, wieso er sich als Wheelsucker hinder sinere Gruppe versteckt und si denn uf de Zielgrade überholt hät, und wieso sin Liechtathletik-Trainer ihm sogar Sub 1:10 zuetraut hät. Nach Stockholm und Antwerpe isch übrigens Kopehage im Gspröch, aber nur mit einere Bedingig: Grennt wird am Samstig. Denn de Oscar am Halbmarathon vom Swiss City Marathon z Luzern, wo er nach em Experiment mit sim KI-Laufcoach «Claudio» sogar i d Ziitig cho isch. Am Renntag fiebrig, mit Huste und Halsweh, d Wuche vorher im Schnitt 5,5 Stund gschlofe, und denn s Reel vom Michael Jordan sim Flu Game, zwei Espresso und s Motto «PR oder ER». Mir redet über en Startblock ohni Ordnig, d Stimm vom Andri im Chopf («Brems!»), Stiigige, wo im Chopf hundertmol schlimmer gsi sind als in echt, en Drittel vom Lauf in Zone 5 und en Aaruef vo de Luzerner Ziitig bi Kilometer 19,5. Wieso er abgnoh hät, was AC/DC mit em letschte Kilometer z tue hät und wie sich 1:40:08 aafühlt, wenn d Sub 1:40 so nöch gsi wär: alles i de Folg. Trotzdem über 6 Minute schnäller als die alti PB und Type-2-Fun vom Feinschte. Zum Schluss: wieso beidi PBs im Voll ine Shirt gloffe worde sind (technischs Doping?), de Plan für de Marathon du Médoc mit Wii bi jedem Verpflegigsposte und d Erkenntnis, dass mer s Training am Läbe aapasst und nöd umgekehrt. Nächst Wuche gits denn s Gspröch mit em Michi Schmid, Sportpsycholog, ehemalige Profiruderer und Andris Vorgänger im Liechtgwicht. ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

  3. Oct 22

    #231 - VOLL INE mit... Philippe Döbeli (Schweizer Handballverband)

    Mir sind grad voll im Laufmodus. De Andri hät Antwerpe hinder sich, nöchscht Wuche wartet Luzern. Hüt gaht’s aber um Handball. Und das, obwohl de Oscar sini Handball-Karriere nach zwei Jahr beendet hät, will ihm eine («meh Bär als Mensch») de Ball so a Grind gschosse hät, dass er e liechti Gehirnerschütterig gha hät. Drum hämmer hüt öpper iiglade, wo würkli Ahnig hät. Zu Gast isch de Phil, Manager Marketing, Sponsoring & Events bi Handball Schwiiz. Er chunnt ursprünglich vom Fussball und hät denn im Tech-Sales vomene Startup mit Cold Calls und Pitches gschaffet. Jetzt isch er im Handball, und de Verband isch für ihn fast wie es Startup. Er verzellt, wieso Handball für ihn die unterschätzteschti Sportart vo de Schwiiz isch: schnell, dynamisch, vill Gool und nach 60 Minute fertig. Mir redet drüber, wieso es Länderspiel früehner «kei Produkt» gsi isch und wie mer Handball vom Provinz-Image id Städt bringt. Und Jamaica bewiist, dass d Grössi vomene Land im Sport nüt heisst. S grosse Thema isch Schwiiz gäge Dänemark am Sunntig, 8. November, am 16:00 i de Swiss Life Arena. S Ziel sind 12'000 Lüüt und de Zuschauerrekord für es Handballspiel i de Schwiiz. Bi de Ufnahm sind 9'200 Tickets verchauft gsi. De Gegner isch Olympiasieger, Welt- und Europameister Dänemark. Und debii isch de Mathias Gidsel, de wohl bescht Spieler vo de Wält. De Phil redet au offe übers Lehrgeld. S WM-Quali-Spiel gäge Italie im Hallestadion hät 4'850 Zuschauer gha. Das isch finanziell positiv gsi, aber nöd das, wo mer sich erhofft hät. Drum sind d Ticketpriis jetzt bewusst tüüf. Mir diskutiered, ob «was nüt chostet, isch nüt wert» im Sport no zieht und wieso d Nati im TV rund 30 Mal meh Sichtbarkeit hät als d Liga. Es gaht au drum, was de Andy Schmid für de Schwiizer Handball bedüütet und was passiert, wenn d Nati verlüürt. Spoiler: histah, säge, dass das nöd hätt dörfe passiere, und Sport isch halt Sport. Dezue chömed no sini 60 bis 90 Wuchekilometer mit Start am 5i am Morge. Er erklärt, wieso er mit 1,71 m höchstens uf em Flügel en Chance hett. Es gaht au um en 22 Tonne schwäre Videowürfel und um 11'000 Gschichte, wo am 8. November gschribe werdet. 🎁 Verlosig: Mir verlosed zwei VIP-Tickets fürs Spiel, und de Abig verbringsch mit em Oscar und em Andri. Zum Mitmache folgsch Handball Schwiiz (handball.ch) und eus (@volline_podcast) uf Instagram und markiersch, wer du mitnäh wötsch. Alli Details findsch im Post. Für alli andere git’s no Tickets uf handball.ch. Bliibed gsund, mached vill Sport, mir ghöred eus nöchscht Wuche! 🤾‍♂️ ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

    #231 - VOLL INE mit... Philippe Döbeli (Schweizer Handballverband)

  4. Oct 15

    #230 - 5 Jahr VOLL INE (Jubiläumsfolg)

    Kei Sportwuche, kei Gast oder besser gseit: s Geburtstagschind isch de Gast. Zum Jubiläum sitzed mir wieder im OG-Studio z Steinhuse, det wo vor füf Jahr s Cover entstande isch: de Andri im Ruder-Einteiler, de Oscar im viel z tüüre FC-Kopenhagen-Shirt mit em Rasmus Falk hine druf (inklusive Usnüechterigsmoment a de Kasse). Mir verzelled, wie alles agfange hät: Corona-Summer 2021, Tokio-Quali verpasst, e warmi Nacht uf de Terrasse vo ere Finca z Granada, und de Oscar fragt: «Bro, meinsch nöd, das wär öppis Cools?» Wer de Name erfunde hät, weiss bis hüt niemer. Am Oscar sin Brüeder bhauptet felsefescht, er seigs gsi. S grosse Voll-ine-Quiz: De Oscar alias Mr. Date hät d Zahle usgrabe, de Andri muess rate. Rund 16'000 Minute Gelaber sind 179 Fuessballmätch, also meh als vier Super-League-Saisons (mir hoffed, mir sind spannender). Am Stück wäred das 11 Täg Voll ine. Glost worde simmer i 141 vo 196 Länder: d USA sind eusi zweitgröschti Hörerschaft, Singapur schlat Grossbritannie, Bangladesch schlat Liechtestei, und i de Mongolei hät eus genau eimal öpper glost. Im Vatikan, z Monaco und z San Marino isch es null. Dezue die wenigscht glosti Folg (danke Dario …) und eusi unbestritteni Erfolgsgarantin Eliane Christen. Mir losed eus sälber zue: Zum erste Mal spiled mir d erschti Folg ab und kommentiered live. Es git ASMR-Radiostimme, schüüchs Lache, Trainingsbangers, Road to Paris und vill Understatement. Fremdschäme pur, aber gelöscht wird nüt, das ghört dezue. Füf Jahr Gschichte: Mir händ nördlich vom Polarkreis z Kiruna ufgnoh, i de Jugi z Stockholm und direkt usem Weltcup-Hotelzimmer. De Curling-Running-Gag bschert eus bis hüt bösi (und konstruktivi) Nachrichte. I de Unsportlich-Folg isch de Andri richtig usenandgnoh worde. Es sind 72 Gäst gsi, vom Nici Huber bis zum Stefan Küng, und d Wunschliste gaht vom Odermatt bis zum Pogačar. Und denn d Nomination für d Swiss Podcast Awards: Top 4 nebe Blick, Blue Sports und Ochsner Sport, als einzige ohni Medienhuus im Rugge. Gwunne hämmer nöd. Quotejüngling halt. Und was bliibt: Momänt, wo s ohni Podcast nie gä hett, vom TV-Regiewage übers Foti mit em Patrick Fischer bis zur Zämearbet mit em Swiss City Marathon (und bald mit eme Verband, meh dörfed mir no nöd säge). Hörerinne und Hörer, wo eus im Zug oder im Hallestadion aspreched. Und d Erkenntnis: Voll ine isch de Liim vo ere Fründschaft. Gstritte hämmer i füf Jahr kei einzigs Mal. Mir händ es neus Cover, es neus Logo, es neus Shirt und e neui Website, aber suscht bliibt alles gliich. Verzelled eus i de Kommentär, uf Insta oder über d Website eure Voll-ine-Moment vo de letschte füf Jahr. Und stimmed ab: Wänd ihr de Jingle zrugg? Merci vo Herze, dass ihr dabi sind. Uf die nächschte 230 Folge🩷​🧡​💛​ ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

  5. Oct 8

    #229 - de dicki Ronaldo hett am meiste Spass gha

    Die neu Ära isch da! Mir hend es neus Logo, en neui Website und en eigete Shop. Sprich, as isch di letscht Folg mit em alte Cover (RIP). Es riese Merci a d Babsi fürs ganze Rebranding und für d Geduld mit üs. Inhaltlich bliibt aber alles bim Alte: gföhrlichs Halbwüsse wie immer. Zum Start kläred mir, öb mer Zone 2 am Oktoberfest cha biohacke und wie de Andri sini Brülle uf de Achterbahn verlore het. Usserdem gits Tipps, was mer bim Taper und bim Carboloading lieber nöd sött mache. Dänn verzellt de Oscar vom Padelturnier bim Padelhub z Hochdorf. De Final isch verbotlet worde, aber bi de Tombola het er abgruumed. Im Fuessball gahts um d Nati. Sie holt trotz de Absänze vom Xhaka und vom Embolo vier Sieg us vier Spiel i de Nations League, und trotzdem nervt d Länderspielpause. Dänn chunnt s grosse Thema vo de Wuche: De Cristiano Ronaldo wird zum Ufwärme gschickt, chunnt nöd zum Iisatz und flügt drufabe mit em Privatjet uf Madrid. Mir diskutiered, wie mer als Legende sött ufhöre, und vergliched das mit em Messi. De Messi verabschiedet sich mit Standing Ovation und ere ziemlich durchkommerzialisierte Drohneshow vo de Albiceleste. Zum Schluss gönd mir no zum Velo. A de EM händ drü Millimeter zwüsched em Evenepoel und em Ciccone entschiede. Dänn no zur Formel 1: Z Malaysia het si endlich wieder mal Spass gmacht, au wenn d FIA vier Auto per Software abgschaltet het. Neue Shop und Website uf volline.ch, und folged üs uf Instagram! ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

  6. Oct 1

    #228 - McNaughty und die Impfzertifikate

    Voll Ine brucht wieder mal en Labertag. Egal ob Oktoberfest, Crew Girl oder Halbmarathonprep, d‘Jungs laufed heiss mit de Theme usem Alltag wo sie beschäftigt. Zuesätzlich muess natürli au no d‘Causa Xhaka/Embolo mit all sine Integre belüchtet werde bevor denn no d‘Velo WM mitem Überraschigssieger McNulty und de Dominatorin Demi Vollering de Abschluss macht. Du gsehsch, es lohnt sich. Darum wie immer, VOLL INE lose! ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

  7. Sep 25

    #227 - VOLL INE mit... Reto Schorno (Swiss City Marathon)

    Höche Bsuech im Studio z Steinhuse: Reto Schorno, Gschäftsfüehrer vom Swiss City Marathon, isch de Maa, wo de Oscar i letschter Ziit immer wieder i d Laufschueh zwingt. Und grad zum Afang es Gständnis: Er sälber isch kei Läufer, sondern ehemaligi Hammerwerfer. Sis Motto: En Psychiater muess au kei Psycho si. Mir redet über s Konstrukt hinter em Ahlas: Verein, Mandat a d Athletic Sport Consulting, wo im gliiche Büro au d Lucerne Regatta, d Ruder-WM 2027 und de Luzerner Stadtlauf organisiert. Über d Entstehig vor bald 20 Johr als Tourismusprojekt, wieso de Name «Swiss City» worde isch (Spoiler: «Switzerland Marathon» tönt im Usland nach Bärge) und wieso bewusst kei Start- und kei Priisgäld für Elite zahlt wird. Retos Credo: Es git kei schnälli und langsami Strecke, nur schnälli und langsami Läufer. Denn gohts um de Laufboom: 15'000 Aamäldige, 6'500 uf de Warteliste, Matcha Latte statt Vodka Energy und d Frog, wie gsund de Hype würkli isch, wenn für Strava und d Follower au mit Fieber gstartet wird. Dezue Rennbandite mit gfälschte Startnummere, Manne, wo i de Fraue-Kategorie ufs Podest laufed, Politiker vor de Wahle am Strosserand, Klimachläber und en gheime Plan B. Plus d Gschicht vo de Monika us Chur, wo am allererste Marathon aaglüütet hät, ob mer de Start nöd chli chönnt verschiebe. Zum Schluss d Brugg zum Rudere und wieso sich de Laufhype nöd eifach uf d Regatta überträge lot, en Usblick uf s 20-Johr-Jubiläum mit de European Masters Marathon Championships und en eigeti Podcast-Serie ab em 10. November. Und für alli, wo no en Startplatz für de 25. Oktober suechet: Tipps zur Startplatzbörse und zur Warteliste. ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

    #227 - VOLL INE mit... Reto Schorno (Swiss City Marathon)

  8. Sep 17

    #226 - Sydney-Sweeney-Livereaktion, kaputti Tennisschläger und gföhrlichi Hot Takes

    Nach langem sitzed mir wieder zäme vor Ort z Steinhuse – back in the hood, back to the roots. De Andri startet mit ere Promi-Rateruti us Crans-Montana: mit wem er i de Gondele ufe isch (Didier Défago, OK-Chef vo de Ski-WM) und wär ihm unde z Sierre über de Wäg gloffe isch. Dezue d Frag, wieso mer sich uf 3000 Meter halbtot strampled, nur will eim en Ski-Legende vo de Gondele us zueluegt. De Oscar hät derwiil e Erkenntnis gmacht: de Laufschueh macht öppis us. Bewusst ohni Carbon, dünni Sohle, fluoreszierend – und uf de Tartanbahn grad alli Rekord bis zäh Kilometer pulverisiert. Fazit: Placebo plus Freud am neue Material. Plus es Update zum «Claudio», sim sälber boute KI-Coach, wo s Training um s Oktoberfescht ume plant statt umgekehrt. Denn s grosse Thema: zum erste Mal e Live-Reaktion im Voll ine. Mir lueged beidi zum erste Mal die Sportwette-Werbig mit de Sydney Sweeney – 22,4 Millione Views uf X, 33 Millione uf Insta i füf Täg. Mir rede drüber, was das Bild mit junge Sportlerinne und Sportler macht, wieso im Sport grad kei «one size fits all» existiert, über 200 Millione Dollar Digitalwerbig vo de US-Wettaabieter i de erste siebe Mönet, über s Suchtpotenzial – und über d Erkenntnis, dass mir mit dere ganze Diskussion genau i de Streisand-Falle sitzed. De Name vo de Firma säged mir us Prinzip nöd. Tennis: de Zverev holt als erste Dütsche sit em Boris Becker 1989 d US Open – aber mit nur zwei Top-10-Sieg i allne vier Grand Slams die Saison und ere halbe Konkurrenz im Lazarett. Gratuliere trotzdem. Bi de Fraue stürzt d Rybakina d Sabalenka nach 99 Wuche vo de Nummere 1, und mir diskutiered Schlägerzertrümmerig als Ventil – inklusive Oscars Padel-Reu. Iishockey: de Patrick Fischer isch vier Jahr gsperrt, dörf aber theoretisch Klubcoach werde – und lanciert parallel «Team Patrick Fischer». Denn d Prognose zum Saisonstart: EVZ Platz 8 oder doch 4–6, Enttüschige bi Fribourg, Lugano und Bern, Hot Takes zum Ambri sine 30 Millione Schulde und zum Josh Holden. Meischtertipp: eimal Zürich, eimal Fribourg back-to-back. Alles usem Podcast vom gfährliche Halbwüsse. Velo: de Stefan Küng gwünnt zum zweite Mal s Vuelta-Zitfahre nach em Oberschänkelbruch, de Enric Mas als erste Spanier sit em Contador 2014 im Gsamtklassemänt, und d WM-Tipps stönd (van der Poel gäge Remco). Und d Voll-ine-Family liferet im Parasport wieder ab: Gold und Silber für d Flurina Rigling, Silber für de Fabian, nün Medaille für d Schwiiz total. D Lichtathletik chunnt z churz – s Ultimate Championship verdient e eigeni Folg. Chunnt nächst Wuche. ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

See All (259)

Trailer

About

Voll Ine ist der Sportpodcast aus der Schweiz für alle, die Sport nicht nur schauen, sondern darüber diskutieren, mitfiebern und auch mal herrlich danebenliegen wollen. Woche für Woche sprechen die Hosts Andri Struzina und Oscar Sarmiento über aktuelle Themen aus der Sportwelt – einmal aus der Sicht eines Athleten und einmal aus der Perspektive eines Fans. Webseite/Shop: www.volline.ch Instagram: @volline_podcast . Hosted on Acast. See acast.com/privacy for more information.

Information

  • Creator
    Andri Struzina & Oscar Sarmiento
  • Years Active
    2021 - 2026
  • Episodes
    259
  • Rating
    Explicit
  • Copyright
    © Andri Struzina & Oscar Sarmiento
  • Show Website
    Voll ine - Der Sportpodcast

You Might Also Like